မတ်မလီု၊ ဨပရဴ ၅
ကံၚ်ဇြဳပၞာန် လလောၚ်တြးကၠုၚ် ဒေါအ်ပန်ပှော်ဗွဲယာယဳဂှ်ဝွံ ပ္တိတ်ဒၟံၚ်ဇြဟတ် သွက်ဂွံဒုၚ်ကေတ်တဲ ပရေၚ်ဍုၚ်သ္အာၚ်တံ မသ္ပစၟတ်သမ္တီဂှ်တုဲ ရန်မံၚ် သွက်အဝဵုဂွံဗိုန်သၟးရဏောၚ်ဂှ် ဗော်သွးကောန်ဂကူကရေၚ် KNU ဗဟဵု လလောၚ်ပ္တိတ်လဝ် နကဵုစၟတ်တ္ၚဲ ဂိတုဨပရဴ ၄ တေံရ။
ကံၚ်ဇြဳပၞာန် လလောၚ်ပ္တိတ်လဝ် နူဂိတုဨပရဴ ၂ စဵုကဵု ဂိတုဨပရဴ ၂၂ ပွိုၚ်ပိသတ္တာဟဂှ် နဒဒှ်အခိၚ်ကာလဒေါအ်ပန်ပှော်ဗွဲယာယဳတုဲ တၚ်လလောၚ်တြးဏံဝွံ ၜိုတ်ပပၞရဏောၚ်တုဲ ဒၞါဲညးဍုၚ်ကွာန်တံ မံၚ်တန်တဴတံဂှ် ကံၚ်ဇြဳပၞာန် ပန်ပှော်ဗ္တိုက်ဒၟံၚ် နကဵုတၚ်ရန်တၟံနွံနွံရောၚ်ဂှ် KNU ဗဟဵု သ္ဂးရ။
အခိၚ်ညးဍုၚ်ကွာန်ကောန်အရာပ်တံ ဒးဘဲတိချဳ ဇၞော်ကုဇြဟတ်ဂှ်လေဝ် ဒပ်ကံၚ်ဇြဳပၞာန် ပန်ပှော်ဗ္တိုက်ဒၟံၚ်နကဵုက္ၜၚ်ကျာ၊ လွဟ်ဇၞော်ဒရုၚ် ကေုာံ ဗ္တိုက်ထောံမခတိုဟ်တံဂှ် ဟွံဒေါအ်ဒေၚ်မွဲသာ် ဒၞါဲညးဍုၚ်ကွာန်နွံတံဂှ် ပန်ပှော်ဗ္တိုက်ကၠုၚ်ဒၟံၚ်အဆက်က်တုဲ ညးဍုၚ်ကွာန်တံဝွံ ဘဲတိချဳသၟးဟွံက အကြာလွဟ်ဇၞော်ကဵု ပရေၚ်ဗ္တိုက်ကဵုပၞာန်ကျာတံဂှ် ဒးမံၚ်တန်တဴဒၟံၚ် နကဵုဓဝ်ဖေက်လၟိုန်ရောၚ် လလောၚ်ပ္တိတ်လဝ်ရ။
ပ္ဍဲကဵုတၚ်လလောၚ်တြး ကံၚ်ဇြဳပၞာန် ဒေါအ်ပန်ပှော်ဗွဲယာယဳဂှ် ကံၚ်ဇြဳပၞာန် တိုန်စိုပ်ကောံဓရီု BIMSTEC မကၠောန်ဗဒှ်ဒၟံၚ် ပ္ဍဲၜၚ်ကံက်လၟုဟ်ဂှ်တုဲ ပ္တိတ်ဒၟံၚ်ဇြဟတ် ညံၚ်သ္ဂောံဂွံပရေၚ်ဍုၚ်သ္အာၚ်တံ မသ္ပစၟတ်သမ္တီဂှ်တုဲ ရန်ဒၟံၚ် ညံၚ်အဝဵုဍေံတံ ဂွံတန်ကြန်သၟးရဏောၚ်ဂှ် KNU ဗဟဵု သ္ဂးရ။
သ္အာၚ်နူဂှ်ပၠန် သ္ပဒၞန်ကဵုဍုၚ်သ္အာၚ်တုဲ ပရေၚ်ဗ္စာရဏာမၞိဟ်လေဝ်ဟွံမွဲ စိုတ်ဆန္ဒပရေၚ်ဍုၚ်ကွာန်လေဝ် ဟွံမွဲမွဲသာ် ကမၠောန်ကဵုလဟီု ဟွံကိတ်ညဳဒၟံၚ်ဂှ် ကၠးတၟးဒၟံၚ်ရောၚ် သာ်ဝွံ ပါလုပ် ပ္ဍဲတၚ်လလောၚ်တြးဂှ်ရ။
ကံၚ်ဇြဳပၞာန် လလောၚ်ပ္တိတ်လဝ် ဒေါအ်ပန်ပှော် ပွိုၚ်ပိသတ္တာဟကီုလေဝ် ကမၠောန်ကဵုလဟီု ဟွံဒှ်မွဲ ကၠောန်သ္ပဒၟံၚ်ပရေၚ်ဗ္တိုက်ပန်ပှော် အပ္ဍဲတိဍာ်ထိၚ်ဒဝ် KNU အရိုဟ်တ္ၚဲတုဲ ပ္ဍဲဂိတုဨပရဴ ၂ ကဵု ၃ ဂှ် ပန်ပှော်ဏာလဝ် လွဟ်ဇၞော် ပ္ဍဲပွိုၚ်ဍုၚ်မုၚ်ကဵု ပွိုၚ်ဍုၚ်ယှိုဲကျေန် တိဍာ်ဒပ်မဟာ ၃ ခရိုၚ်ညံၚ်လေဝ်ပေန် KNU ရ။
ဟိုတ်နူပန်ပှော်ကၠုၚ်လွဟ်ဇၞော် သာ်ဏံဂှ်တုဲ သ္ၚိညးဍုၚ်ကွာန် အပ္ဍဲကွာန်(ညောၚ်ခြေထောက်) ဒးဇီုကပိုက်လီုလာ်အာလဝ်တုဲ ပ္ဍဲကဵုကွာန်(ငထွေစုပ်) ဂှ်လေဝ် မၞိဟ်ဗြဴမွဲတၠ ကလိဂွံဝပ်တုဲ သ္ၚိဒၟံၚ်ဂမၠိုၚ်လေဝ် ဇီုကပိုက်လီုလာ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဗဟဵုရ။
သ္အာၚ်နူဂှ်ပၠန် ပ္ဍဲဂိတုဨပရဴ ၂ တေံဂှ်လေဝ် ပေါဲဗ္တိုက်က္တဵုဒှ်ဟွံမွဲမွဲသာ် ဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ ပ္ဍဲတိဍာ်ဒပ်မဟာ ၅ ခရိုၚ်ဘာပန် KNU ဂှ်တုဲ ကောန်ၚာ်သၟတ် ၂ တၠ ချိုတ်တုဲ ၃ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုင်ဂလာန် သ္ကိုပ်ဗိုလ်ဇၞော် သဝ်ကလာဒိုဝ် ညးမၞုံအခေါၚ်ဟီုဂး ဒပ်မဟာ ၅ ရ။
ပရိုင်-ဩင်လောန်တိုင်(မ်)
ဗီု-Social Media