နေဗျဳဒဝ်၊ ဨပရဴ ၅
ရန်ကဵုပရေၚ်ညိၚ်ဝတ်တုဲ သွက်ကမၠောန်ဟံၚ်ပြာ်ဘဲဒဏ်တိချဳတံဂှ် ဒေါအ်ပန်ပှော်ဗွဲယာယဳရောၚ် ကံၚ်ဇြဳပၞာန် လလောၚ်ပ္တိတ်ကၠုၚ် ကၠာဟွံဂွံပေၚ် ၂၄ နာဍဳဏီဂှ် ကၠောန်ကၠုၚ်လဝ် ပရေၚ်ဗ္တိုက်တံရောၚ် ညးဒေသတံကဵု ဂကောံပၠန်ဂတးတံ ဟီုရ။
ရန်ကဵုပရေၚ်ၜိုဟ်သြိုဟ်ညိၚ်ဝတ်တုဲ နူဂိတုဨပရဴ ၂ စဵုကဵုဂိတုဨပရဴ ၂၂ ပွိုၚ်ပိသတ္တာဟဂှ် ကံၚ်ဇြဳပၞာန် လလောၚ်ပ္တိတ်လဝ် နဒဒှ်ကာလဒေါအ်ပန်ပှော်ဗွဲယာယဳ ပ္ဍဲဂိတုဨပရဴ ၂ အခိၚ်ဗ္တံတေံရ။
ဆ္ဂး ပ္ဍဲဂိတုဨပရဴ ၃ အခိၚ်နူဂယးဂှ်တှ်ေ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် လ္ပာ်ဍုၚ်ဝိုၚ်မဝ် တွဵုရးကချေၚ်ဂှ်တုဲ လ္တူဍုၚ်ဗာန်မဝ်ဂှ်လေဝ် ဗ္တိုက်ထောံမံၚ်မခတိုဟ် နူကဵုပၞာန်ကျာဂှ် သ္ကိုပ်ဗိုလ်ဇၞော် နဝ်ဘူ ညးမၞုံအခေါၚ်ဟီုဂး KIO ဟီုကဵု ဌာန်ပရိုၚ်မဳဒဳယျာဂမၠိုၚ်ရ။
လအာတုပ်သာ်ဂှ်ကီု ပ္ဍဲတွဵုရးရခေၚ်ဂှ်လေဝ် ကွာန်နွံပ္ဍဲပွိုၚ်ဍုၚ်သေတ်တိုဲကဵု ပွိုၚ်ဍုၚ်ကျံက်ဖျူတံဂှ် ကံၚ်ဇြဳပၞာန် ရပ်စပ်စကာ က္ၜၚ်ကျာဗ္တိုက်၊ လွဟ်ဇၞော်၊ ဒရုၚ် ကေုာံ က္ဍိုၚ်ကျာစုတ်လဝ်စက်တံဂှ်တုဲ ဗ္တိုက်ထောံလဝ်မခတိုဟ်ရောၚ် နိဿဲကေတ် ဂလာန်ညးဒေသတံတုဲ ပရိုၚ်အပ္ဍဲဒေသဂမၠိုၚ် ထ္မံက်ထ္ၜးလဝ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ကံၚ်ဇြဳပၞာန်တံ ကမၠောန်ကဵုလဟီုဍေံတံ ဟွံကိတ်ညဳဂှ်ဝွံ ဟွံစွံၚုဟ်မး ကုလမျီုမၞိဟ်တုဲ ဟွံမွဲပၟိက်ကဵုပရေၚ်ၜိုဟ်လလမ်မွဲသာ် ညံၚ်အဝဵုဂွံတန်ကြန်ဂှ် ကၠောန်ဒၟံၚ်အတိုၚ်တြေံရဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကံၚ်ဇြဳပၞာန်ဂှ်တှ်ေ အတိုၚ်ဒ္ဂေတ်စရိုတ်ဍေံတံရ ကမၠောန်ဂှ်မွဲဗီု လဟီုဂှ်မွဲဗီု။ ဟိုတ်ဂွံလလောၚ်တြးလဝ် ဒေါအ်ပန်ပှော်လၟုဟ်ဂှ်လေဝ် သွက်ဂွံရီုဗၚ် ညးဍုၚ်ကွာန်ဒးဘဲတိချဳတံဂးတုဲ အခိၚ်ဂကောံဍုၚ်သ္အာၚ်တံ စိုပ်ဒၟံၚ်ဂှ် ဍေံတံမိက်ဂွံဂြောပ်လဒဵု ဗီုပြၚ်ဍေံတံမၞုံပၟိက်ကဵုပၞာန်ဂှ်တုဲ လလောၚ်ပ္တိတ်ကၠုၚ်သာ်ဏံ မဒှ်ရ။ စေတနာနွံတုဲ ကၠောန်လဝ်ဟွံသေၚ်” သာ်ဝွံ သ္ဂးရ။
ပ္ဍဲတၚ်လလောၚ်တြးဒေါအ်ပန်ပှော် ကံၚ်ဇြဳပၞာန်ဂှ်တှ်ေ စွံဓဝ်ဂရုဏာ ကုညးဍုၚ်ကွာန်ဒးဒုၚ်စသိုၚ်ဒၟံၚ် အလုံဍုၚ်မွဲ ဟိုတ်နူဘဲဒဏ်တိချဳတံဂှ်တုဲ ရန်တၟံ ညံၚ်ဂွံရေၚ်တၠုၚ် ကမၠောန်ရီုဗၚ်ဟံၚ်ပြာ် ကေုာံ ကမၠောန်ကလေၚ်ဖျေံဒၞါဲဝါဲတံ နကဵုအသိၚ်မာန်ရောၚ် မဒှ်ရ။
အလဵုအသဳညဳသၟဟ်ဂကူ NUG ဂှ်တှ်ေ ကံၚ်ဇြဳပၞာန် လလောၚ်တြးကၠုၚ် ဒေါအ်ပန်ပှော်ဂှ်ဝွံ ဆၜိုတ်လီဠာန်လဝ်ရဏောၚ်ဂှ် ခၠေဝ်ကၠုၚ်ရ။ နတဲဏံ ကံၚ်ဇြဳပၞာန် ဗ္တိုက်ကဵုပၞာန်ကျာ၊ ထ္ပက်ပၞာန်ဗလးတိတံဂှ် ကၠောန်ဒၟံၚ်ဟွံပိုတ်သ္ကုတ်ရောၚ် သ္ဂးရ။
နူဂိတုဨပရဴ ၃ အခိၚ်နူဂယး စဵုကဵုအခိၚ်လဒေါဝ်တ္ၚဲဂှ် ပ္ဍဲရးသက်ကိုၚ်ကဵု ရးမာန္တလေဝ် ပ္ဍဲကဵုပန်ပွိုၚ်ဍုၚ်ဂှ် ဗ္တိုက်လဝ်ကဵုပၞာန်ကျာတုဲ ထ္ပက်ဒၟံၚ်ကရောၚ်ပၞာန်ရောၚ် ဌာနဝန်ဇၞော်ကာစဵုဒၞါ NUG လလောၚ်ပ္တိတ်လဝ်ပရိုၚ်ရ။
ပ္ဍဲရးမာန္တလေဝ် ခရိုၚ်မျေန်ချာန်၊ ပွိုၚ်ဍုၚ်(တောၚ်သာ) ဘာတန်လဒေါဝ် ကွာန်(သဲတော) ကဵု ကွာန် (အရှေ့ဘက်ရေကျော်) ဂှ် ပ္ဍဲဂိတုဨပရဴ ၃ အခိၚ်နူဂယး ၂ နာဍဳဂှ် ထောံဏာလဝ်မခတိုဟ် ၁၂၀ မမ ဒ္စါံမ နကဵုက္ဍိုၚ်ကျာဗ္ဂပ်စုတ်လဝ်စက် ပိဖ္ဍိုက်ရ။
သ္အာၚ်နူဂှ်ပၠန် အခိၚ်နူဂယး ၜိုတ် ၆ နာဍဳဂှ်လေဝ် နူကဵုဗ္ဒိုပ်ဗၠာဲသၟိၚ်(ငါ့သလောက်) ပွိုၚ်ဍုၚ်ညံၚ်ဥူဂှ် ဒပ်ကံၚ်ဇြဳပၞာန် ထ္ပက်ကရောၚ်ပၞာန် နကဵုကွဳစက်ခြပ်ပသဲ ၂ ဖ္ဍိုက်တုဲ သ္ၚိညးဍုၚ်ကွာန်ပိုၚ် မၞုံအပ္ဍဲကွာန် မွဲဒမြိပ်ဂၠံၚ်တံဂှ်လေဝ် ပန်ပှော်လဝ်ကဵုလွဟ်စက်ဇၞော် ပါလုပ်သီုကဵု လွဟ်နာနာရ။
ပ္ဍဲအခိၚ်နူဂယး ၜိုတ် ၉ နာဍဳဂှ်လေဝ် က္ၜၚ်ကျာသၞေၚ်ဝဲ တိုန်ကၠုၚ် နူကဵုဌာန်ဂအုပ်ဗ္ဒိုပ်ကျာဟုမ္မလေန် ရးသက်ကိုၚ်ဂှ်ဝွံ ပ္ဍဲကဵုကွာန် နွံပွိုၚ်ဍုၚ်ဟုမ္မလေန်ဂှ် ပေါဲဗ္တိုက်ဒှ်လဝ်ဟွံမွဲမွဲသာ် ထောံဏာလဝ်မခတိုဟ် ၁၃ မရောၚ် NUG သ္ဂးရ။
အခိၚ်လဒေါဝ်တ္ၚဲဂှ်တှ်ေ ပ္ဍဲကဵုကွာန်နာတ်ကျဳ ကဵု ကွာန်မုဌော နူပွိုၚ်ဍုၚ်ကနဳဂှ် က္ဍိုၚ်ကျာစုတ်လဝ်စက် တိုန်ကၠုၚ် နူဌာန်ဂအုပ်ပၞာန်ရးဗာယပ် ၜါမ ထောံဏာလဝ်မခတိုဟ် ဗ္တိုက်လဝ်တုဲ ပန်ပှော်ဏာလဝ် ပ္ဍဲကဵုကွာန်ဒံၚ်ပျံက် နကဵုသၞာတ်စက်ဂှ်လေဝ် လလောၚ်ပ္တိတ်လဝ်ရ။
ပ္ဍဲတွဵုရးဍုၚ်မန်ဂှ်တှ်ေ ကြဴနူကံၚ်ဇြဳပၞာန် လလောၚ်တြးဒေါအ်ပန်ပှော်တုဲ ပေါဲဗ္တိုက်ဆေၚ်မုက်တံကဵု ပရေၚ်ဗ္တိုက်ထောံလဝ်မခတိုဟ်တံ ဟွံမွဲကီုလေဝ် ချဳဒရာၚ်ပရေၚ်ပၞာန်တံ ဆက်နွံဒၟံၚ် အတိုၚ်တြေံဏောၚ်ဂှ် နာဲနဂါ ဟီုရ။
“နူဂၠံၚ်ရေဝ်မွဲကဆံၚ် ဗပေၚ်ဒၟံၚ်ဇြဟတ် ပ္ဍဲပွိုၚ်ဍုၚ်ရေဝ် နူကဵုကွာန်အစေန်ဂှ် နွံ။ တုဲပၠန် လ္ပာ်ဒပ်အမၠံက်ကွာန်အၜေတ် ပွိုၚ်ဍုၚ်မုဟ်ဍုၚ်ဂှ်လေဝ် ဗပေၚ်ဒၟံၚ်ဇြဟတ်တံ နွံတုဲ နူကဵုဇြပ်ဗု ဗပေၚ်ဒၟံၚ်ဇြဟတ် ချဳဒရာၚ်ဒၟံၚ် လ္ပာ်အနာန်ကွေန်ဂှ်လေဝ် နွံ။ သ္အာၚ်နူဂှ်ပၠန် ပ္ဍဲပွိုၚ်ဍုၚ်မုဟ်ဍုၚ်ဂှ် နကဵုဗီုပြၚ်ပၠဒပ်ဂှ် ကွဳစက်ဂမၠိုၚ် ချဳဒရာၚ်ဒၟံၚ်နွံ” သာ်ဝွံ သ္ဂးရ။
အပ္ဍဲကာလဒေါအ်လဝ်ပန်ပှော်ဂှ် နကဵုဂကောံရပ်လွဟ်ဂမၠိုၚ် ပကောံဇြဟတ်ကီု၊ သၠဲတိကီု၊ ဂၠံၚ်ပရေၚ်ဆက်စၠောံ ညးဍုၚ်ကွာန်ဂမၠိုၚ်ရပ်စပ်အာကၠုၚ်ဒၟံၚ်တံဂှ် ပလီုပလာ်ဗ္တိုက်ဒၟံၚ်ဂှ်ရ ခၠေဝ်ပလန်အာဏောၚ်ဂှ် ကံၚ်ဇြဳပၞာန် လလောၚ်တြးလဝ်ရ။
ဣဏံဝွံ ရံၚ်ကဵုအကာဲအရာတုဲ ဒှ်အရာခၠေဝ်သ္ပကၠုၚ် ညာတ်ကေတ် ဂွံကၠုၚ်စေဝ်လ္တူ ပ္ဍဲပရေၚ်ပၞာန်၊ ပရေၚ်ဍုၚ်ကွာန်တံမာန်ဏောၚ်ဂှ်တုဲ အပ္ဍဲကာလဒေါအ်ပန်ပှော်ဗွဲယာယဳဏံဂှ်လေဝ် ပွမဆုဲပြံၚ်ဗပေၚ်ကၠုၚ် မကမ်လွဟ်လက်နက်၊ ဇြဟတ်မၞိဟ်၊ ဇွောံမတံ ကၠောန်ကၠုၚ်လေပ်ဂှ် ညးလ္ၚတ်ဂမၠိုၚ် ထံက်ထ္ၜးလဝ်ရ။
ပ္ဍဲဂိတုမာတ် ၂၈ ဂှ် ဟိုတ်နူတိချဳ ဇၞော်ကဵုဇြဟတ်တုဲ သွက်ဂွံကၠောန်ပရေၚ်ဟံၚ်ပြာ်တံဂှ် ပ္ဍဲဒေသဒးလဝ်ဘဲဒဏ်တိချဳတံဂှ် အလဵုအသဳညဳသၟဟ်ဂကူ NUG ဒေါအ်လဝ်ပန်ပှော်ပွိုၚ်ၜါသတ္တာဟဏောၚ် လလောၚ်တြးလဝ်ရ။
ကြဴနူဂှ်တုဲ ဂကောံမဟာမိတ်ကောဒေံပိဂကောံ၊ ကံၚ်ဇြဳပၞာန် ကေုာံ ဒပ်ပၞာန်ဗၠးၜးကချေၚ် KIO တံ ဒေါအ်ကၠုၚ်ပန်ပှော်ညးသ္ကအ်တုဲ လလောၚ်ပ္တိတ်ကၠုၚ် တၚ်လလောၚ်တြးဂမၠိုၚ်ရ။
ဆ္ဂး ကံၚ်ဇြဳပၞာန်သီအဝဵုဂှ်တှ်ေ ထောံကၠုၚ်မခတိုဟ် လ္တူဍုၚ်ကွာန်ဂမၠိုၚ် နူကဵုပၞာန်ကျာ၊ ပန်ပှော်ကဵုလွဟ်ဇၞော်ကီု၊ ထ္ပက်ကရောၚ်ပၞာန် ပကောံကၠုၚ်ကောန်ပၞာန်တံဂှ် ဆက်ကၠောန်ဒၟံၚ်ဖိုဟ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media