မတ်မလီု၊ ဨပရဴ ၅
ပ္ဍဲကောံဓရီုပရေၚ်ဂကူမန် သၞာံ ၂၀၂၅ မကၠောန်ဗဒှ်ဒၟံၚ်လၟုဟ်ဂှ် သဳကၠဳဒၟံၚ် သ္ဇိုၚ်မူကၟိန်ဍုၚ်ဖေဝ်ဒရာ ကေုာံ သၞောဝ်သ္ဇိုၚ်ဒက်ပ္တန်ဍုၚ်မန်ရာမညဂှ် ဗော်ဍုၚ်မန်တၟိ လလောၚ်ပ္တိတ်လဝ် ပရိုၚ်ရ။
တ္ၚဲကောံဓရီု တတိယ ပ္ဍဲဂိတုဨပရဴ ၄ ဂှ် ဆက်ကၠောန်ဗဒှ်ဒၟံၚ် ကောံဓရီုပရေၚ်ဂကူမန် နကဵုအစဳဇန် ၁၂ တၚ်တုဲ သွာၚ်ညးကဵုညး ကလေၚ်ပ္တိုန်ထ္ၜးဒၟံၚ် သ္ဇိုၚ်မူကၟိန်ဍုၚ်ပံၚ်ကောံဖေဝ်ဒရာ ညးစၞးဂမၠိုၚ် မသဳကၠဳလဝ် ပ္ဍဲကဵုတ္ၚဲကၠာတေံဂှ်ရ။
သ္အာၚ်နူဂှ်ပၠန် သွက်ဂွံဒက်ပ္တန် ဂကောံပံင်ကောံဂကူမန်ဂှ် ဆက်သဳကၠဳဒၟံၚ်တုဲ ဂွံပ္တိုန်ထ္ၜးသဳကၠဳအာ မူဝါဒသၟတ် ကေုာံ မူဝါဒဂဥုဲၜူမာဲတံ နွံဒၟံၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲတ္ၚဲကောံဓရီု ပထမဂှ် ဗော်ဍုၚ်မန်တၟိ မဒှ်ကမ္မတဳကၠောန်ဗဒှ်ကောံဓရီုပရေၚ်ဂကူမန်ဂှ်တှ်ေ ပ္တိုန်ထ္ၜးလဝ် လၟေၚ်ကမၠောန်ဂမၠိုၚ် နကဵုအစဳဇန် ၁၃ တၚ်ရ။
ဗဒှ်ထ္ၜး သ္ဂုတ်သွာတ် မဖျေံစၟတ်လဝ် နူကဵုကောံဓရီုပရေၚ်ဂကူမန် သၞာံ ၂၀၂၂ ကေုာံ ပ္တိုန်ထ္ၜး ပရေၚ်ကမၠောန် ရေၚ်တၠုၚ် ချူဓဇက်ကၠုၚ်လဝ် သၞောဝ်သ္ဇိုၚ်ဒက်ပ္တန်ဍုၚ်မန်ရာမညတုဲ ညးမတိုန်စိုပ်ကၠုၚ်တအ် ဗွိုၚ်ညးကဵုညး သဳကၠဳလဝ်နွံရ။
တ္ၚဲဒုတိယဂှ်တှ်ေ ညးစၞးမတိုန်စိုပ်ကၠုၚ်ဂမၠိုၚ် သဳကၠဳသၞောဝ်သ္ဇိုၚ်ဒက်ပ္တန်ဍုၚ်မန်ရာမည လှဲလှဲလးလးတုဲ ကလေၚ်ပ္တိုန်ထ္ၜးလဝ် ပ္ဍဲကောံဓရီုဂှ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
မွဲအဆက်ဓဝ် သ္ဇိုၚ်မူကၟိန်ဍုၚ်ဖေဝ်ဒရာဂှ်လေဝ် ဗွိုၚ်ညးကဵုညး ဆက်သဳကၠဳလဝ်တုဲ ပ္ဍဲတ္ၚဲတတိယဂှ်တှ်ေ ကလေၚ်ပ္တိုန်ထ္ၜးလဝ် သ္ဇိုၚ်မူ မသဳကၠဳလဝ်တံဂှ်ရ။
ပ္ဍဲကောံဓရီုပရေၚ်ဂကူမန် မကၠောန်ဗဒှ်တုဲအာ ပွိုၚ်ပိတ္ၚဲဂှ် အတိုၚ်တၚ်နၚ် လလောၚ်ပ္တိတ်ဂွံလဝ်ဂှ်မ္ဂး ဖျေံစၟတ်လဝ်တၚ်သ္ဂုတ်သွာတ် ဟွံမွဲဏီကီုလေဝ် ပ္ဍဲဂိတုဨပရဴ ၅ ကောံဓရီုတ္ၚဲလက္ကရဴအိုတ်ဏံတှ်ေ ဖျေံစၟတ်အာ တၚ်သ္ဂုတ်သွာတ်မွဲမွဲမာန်ဏောၚ် ဂွံစၟဳကေတ်ရ။
ကောံဓရီုဏံဂှ် စကၠောန်ဗဒှ်လဝ် ပ္ဍဲဂိတုဨပရဴ ၂ လ္တူဍုၚ်မတ်မလီုတုဲ ညးစၞးနူဗွိုၚ်သၚ်၊ ဗွိုၚ်ဗော်ဍုၚ်မန်တၟိ၊ ဗွိုၚ်ဗော်ညဳသၟဟ်မန်၊ ဗွိုၚ်ကဆံၚ်ရး ကေုာံ ဗွိုၚ်ပွိုၚ်ဍုၚ်၊ ဗွိုၚ်ဂကောံဘိက်ထေက်၊ ဗွိုၚ်ပူဂဵုဘိက်ထေက်၊ ဗွိုၚ်မှာဇန်တံ အပံၚ်ဖအိုတ် ၂၄၆ တၠ တိုန်စိုပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−NMSP