တၞၚ်သဳ၊ ဨပရဴ ၆
ရးတၞၚ်သဳ ပွိုၚ်ဍုၚ်တၞၚ်သဳ ပ္ဍဲကဵုကွာန်(ချောၚ်းနောက်ပြန်) ဂှ် ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတုဲ ကောန်သ္ဂံၚ် PDF ၜါတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ပကဖ ခရိုၚ်ဗိက်ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုဨပရဴ ၄ အခိၚ်လဒေါဝ်တ္ၚဲ ၜိုတ် ၁၂ နာဍဳဂှ် ထောံဏာလဝ်မခတိုဟ်မွဲမ ပ္ဍဲကဵုကွာန်(ချောၚ်းနောက်ပြန်) နကဵုက္ၜၚ်ကျာဂျက်ဖိုက်တာ မွဲဖ္ဍိုက်တုဲ သီုကဵုပန်ဏာလဝ် နကဵုသၞာတ်စက်ရ။
ဟိုတ်နူဒပ်ကံၚ်ဇြဳပၞာန် ထောံမခတိုဟ် ဗ္တိုက်ကၠုၚ်ဂှ်တုဲ ကောန်သ္ဂံၚ် PDF ၜါတၠ ကလိဂွံဝပ် ဟွံဒးဂွိၚ် နွံရောၚ် ညးတာလျိုၚ် ပကဖ ဂကောံဒပ်စဵုဒၞါညးဍုၚ်ကွာန် ခရိုၚ်ဗိက် မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဨပရဴ ၅ အခိၚ်နူဂယးဂှ်လေဝ် လ္ပာ်ကံၚ်ဇြဳပၞာန် ဂေတ်ကွာန်(ချောၚ်းနောက်ပြန်) ကဵု ကွာန်(သိန်းခွန်) နကဵုက္ၜၚ်ကျာ ၜါဝါတုဲ ထောံဏာလဝ်မခတိုဟ်ကီုလေဝ် ကောန်သ္ဂံၚ်ဇီုကပိုက်ဒး ဟွံမွဲပုဟ်ဂှ် သ္ဂးရ။
ဟိုတ်နူဘဲတိချဳတုဲ လ္ပာ်ကံၚ်ဇြဳပၞာန် လလောၚ်တြးကၠုၚ် ဒေါအ်ပန်ပှော်ဗွဲယာယဳ နူဂိတုဨပရဴ ၂ စဵုကဵုဂိတုဨပရဴ ၂၂ ပွိုၚ်ပိသတ္တာဟကီုလေဝ် ပ္ဍဲဗလးတိဏံဂှ်တှ်ေ ပေါဲဗ္တိုက်ဟွံမွဲမွဲသာ် ဆက်ဗ္တိုက်ထောံကၠုၚ်ဒၟံၚ်မခတိုဟ်ရ။
ပ္ဍဲကဵုဂၠံၚ်သွံရာန်ဗၞိက်ပယျဵု သေံ−ဗၟာ ဂၠံၚ်တၞၚ်သဳ−မဝ်ဒံၚ်ဂှ် စနူဂိတုဒဳဇြေမ်ဗာ ၁၈ တုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် က္တဵုဒှ်ဒၟံၚ်ရ။
ဟိုတ်နူပေါဲဗ္တိုက်ဂမၠိုၚ်တုဲ ညးဒေသ ဗ္ဒါဲ ၃၀၀၀ နူကဵုကွာန်ဍာ်ဗု၊ ထုၚ်မခါ၊ ချောင်းနှစ်ပေါက်၊ သိန္နောတံ ဒးပါဲမံၚ်ဘဲပၞာန် ၃ ဂိတုပြၚ်ကၠုၚ်ယျဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Myeik PDF