မတ်မလီု၊ ဨပရဴ ၆
ပ္ဍဲတွဵုရးဍုၚ်မန် ညးသၟတ်ဒးဒုၚ်ရပ်လဝ် ဟိုတ်နူရပ်စပ်ဂဥုဲၜူမာဲတံဂှ် ကံၚ်ဇြဳပၞာန် ပလံၚ်ဏာဒၟံၚ် ဇရေၚ်တန်ဗ္တောန်ကွတ်ပၞာန်တံ နွံဒၟံၚ်ရောၚ် ညးမစုက်လုက်ကဵုကံၚ်ဇြဳပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံဒပ်ဗၠာဲသၟိၚ် ကေုာံ ဂကောံအုပ်ဓုပ် ကံၚ်ဇြဳပၞာမ်တံဝွံ ဟိုတ်နူပရိုၚ်ဂဥုဲၜူမာဲတုဲ ဂၠိုက်ဂၠါဲရပ်ဒက်ဒၟံၚ် သၟတ်တံ နွံတုဲ ပ္ဍဲဒၞါဲမၞိဟ်ဂၠိုၚ်တံဂှ်လေဝ် ကၟာတ်လဒဵုစၟဳတ်တုဲ သၟတ်မဂွံဆဵုကေတ် ဂဥုဲၜူမာဲတံဂှ် ပလံၚ်ဏာဒၟံၚ် ဇရေၚ်တန်ဗ္တောန်ကွတ်ပၞာန်တံရ။
သၟတ်ဒးဒုၚ်ရပ် ဟိုတ်နူဂွံဆဵုကေတ် ဂဥုဲၜူမာဲကၠာတေံဂှ်တှ်ေ ပံက်ကၠုၚ်ဂဗုတ် ကေတ်ကၠုၚ်အရေဝ် နကဵုၝောံပိုဒ်ဂဥုဲၜူမာဲ နာနာတုဲ အခိၚ်လၟုဟ်ဂှ်တှ်ေ ဟိုတ်နူတၚ်နွံပၟိက် သွက်တန်ဗ္တောန်ကွတ်ပၞာန်တံဂှ်တုဲ ပလံၚ်ဏာဒၟံၚ် ဇရေၚ်တန်ဗ္တောန်ကွတ်ပၞာန်တံရ။
ညးသၟတ်ဒေသ ဟွံမိက်ထ္မံက်ယၟုမွဲတၠဂှ်တှ်ေ သၟတ်ရပ်စပ်ဂဥုဲၜူမာဲတံဝွံ နူတမ်ဝါဒိတေံရ ဍေံတံ စိုတ်ဓာတ်ဟွံခိုၚ်ကၠိုက်ဂှ်ရ ဒၟါနူပၠောပ်ဒးကဵုယိုက်လျိုၚ်ပၞာန်တုဲ ညးဍုၚ်ကွာန်တံရ ဒးဒုၚ်အာဖဵုအဆက်လက္ကရဴတံဂှ်ဏောၚ်တုဲ ပ္ဍဲကဵုသၞောတ်ပရေံပရေံဏံ အနာဂတ်သၟတ်တံ ကၠေံဒၟံၚ်ရောၚ် ဟီုရ။
“အာပၠောပ်ထောံ မၞိဟ်စိုတ်ဓာတ်ဟွံခိုၚ်ကၠိုက်တံဂှ်တှ်ေ ဖဵုအဆက်လက္ကရဴတံဂှ် ညးဍုၚ်ကွာန်တံရ ဒးဒုၚ်ဏောၚ်ဂှ် ညာတ်ကေတ်ရ။ လုကဴကၠောန်ညံၚ်ဂွံဗၠးၜးနူ သၞောတ်ပရေံ ခေတ်ပရေံဏံ ဟွံမာန်မ္ဂး ပရူပရာဇၞော်နူဏံတံလေဝ် မံက်ကၠုၚ်မာန်ဏောၚ်။ ပရေၚ်လွဳလွတ်ကဵု စပ်ကဵုဂဥုဲၜူမာဲတံဂှ်လေဝ် ကၠောန်ခိုဟ်ဟ်ဟွံမာန်ပုဟ်။ သၟတ်အခေါၚ်ဗ္တောန်ပညာနွံတံဂှ်လေဝ် ဟွံဂွံကတ်ဗ္တောန်ပညာ ခိုဟ်ဟ်ပုဟ်။ တွဵုရးလဵုဒှ်ဒှ် အနာဂတ်သၟတ်တံဂှ်တှ်ေ ဗၠိုက်တၞီအာဒၟံၚ် အပ္ဍဲသၞောတ်ပရေံပရေံဏံအိုတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ကၠာတေံ နကဵုသၟတ်မရပ်စပ်ဒၟံၚ်ဂဥုဲၜူမာဲဂမၠိုၚ် ယဝ်မိက်ဂွံထပိုတ်ဂဥုဲၜူမာဲမ္ဂး ကမၠောန်လွဳလွတ်ကဵုညံၚ်ရဴဂွံကလေၚ်ဒှ်အတိုၚ်တြေံတံ နွံလဝ်တုဲ အခိၚ်လၟုဟ် ကံၚ်ဇြဳပၞာန် ကော်ပၠောပ်နၚ် ကဵုလုပ်ပၞာန် ဗွဲအဓမ္မဂှ်ဝွံ ရပ်စပ်စကာဒၟံၚ် သၟတ်ဂမၠိုၚ် သွက်ဒတုဲဖဵုဍေံတံဏောၚ်ဂှ် ညးဆက်ဟီုရ။
ဒံက်တာသဳရိမန်ဆာန် ညးမၞုံအခေါၚ်ဟီုဂး ဒပ်စဵုဒၞါဍုၚ်မန် MSDF ဂှ်တှ်ေ ပလံၚ်ဗစိုပ်ဏာ သၟတ်ရပ်စပ်ဒၟံၚ်ဂဥုဲၜူမာဲတံ သ္ဂောံလုပ်ပၞာန်ဂှ်ဝွံ ဒဒှ်ရထ္မံက်ထ္ၜးဒၟံၚ် ဒှ်ဒၟံၚ်အခက်အခုဲဇၞော်ကုဇြဟတ် ပ္ဍဲအရာပကောံကောန်ဒပ်တၟိတၟိတံဂှ်ဏောၚ်တုဲ သွက်ဂွံဗပေၚ်ဇြဟတ်ဒပ်ပၞာန်ဍေံတံမာန်ဂှ် ပ္တိတ်ဒၟံၚ်ဇြဟတ်ရောၚ် ပါ်ပါဲလဝ်ရ။
“သၟတ်သုၚ်စောဲဒၟံၚ် ဂဥုဲၜူမာဲ အပ္ဍဲတွဵုရးဍုၚ်မန်တံဂှ် ကံၚ်ဇြဳပၞာန် ဒးပလံၚ်ဗစိုပ်ဒၟံၚ် တန်ဗ္တောန်ကွတ်ပၞာန်ဂှ်တှ်ေ ပ္ဍဲကံၚ်ဇြဳပၞာန်ဂှ် ဇြဟတ်ဍေံ ပိုတ်ဒၟံၚ်တုဲ ပ္ဍဲအရာပကောံကောန်ဒပ်တၟိတၟိတံဂှ်လေဝ် ဒးဂဗဒၟံၚ်ကဵု အခက်အခုဲဇၞော်ကုဇြဟတ်ရောၚ်ဂှ် မံက်ကၠးဒၟံၚ်ရ။ ဂွံဒှ်ဒပ်ဍိုက်ပေၚ်ကဵုအစောံစရာဲဂှ် ဒးလွဳပကောံ ကောန်ဒပ်မၞုံကဵုကာယ ထတ်ယုက် မၞုံကဵုစိုတ်ဓာတ် မခိုက်ကၠိုက်တံဂှ်စောၚ်။ ဆ္ဂး ပ္ဍဲကဵုကံၚ်ဇြဳပၞာန်ဂှ် ဂၠံၚ်သ္ဇက်ဂွံရုဲစှ် သာ်ဏံ ဟွံမွဲတုဲ သွက်ဂွံဗပေၚ်ဇြဟတ်ဒပ်ပၞာန်ဍေံတံဂှ် ဒးပလံၚ်ဏာမံၚ် သၟတ်မရပ်စပ်ဒၟံၚ်ဂဥုဲၜူမာဲတံ သၟတ်ယာယဉာဏ ဟွံဖောအ်ဗြေဝ်တံ ပ္ဍဲတန်ဗ္တောန်ကွတ်ပၞာန်ဍေံတံဂှ်ရောၚ် မ္ဒးသ္ၚဳဂၠိပ်ဏာရ” သာ်ဝွံ သ္ဂးရ။
ကံၚ်ဇြဳပၞာန် ကျဒၟံၚ်ပၞာန် အပ္ဍဲပေါဲပၞာန် မက္တဵုဒှ်ဒၟံၚ် အလုံဍုၚ်မွဲဂှ်ဝွံ ဟိုတ်နူနွံပၟိက်ကဵုဇြဟတ်ပၞာန်တုဲ ရပ်ဒက်ညးသၟတ်တံ နကဵုနဲကဲနာနာသာ်တုဲ ပကောံကၠုၚ်ဒၟံၚ်ကောန်ပၞာန် ဗွဲအဓမ္မဂှ်ရ နကဵုသၟတ်ဂမၠိုၚ် စွံသတိတုဲ အာကၠုၚ်အိုတ်ဂှ် ညးဖ္တိုက်ဖ္အောဝ်လဝ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဂှ်တှ်ေ နူကဵုရဲကဵုပရိုၚ် သၟဝ်တဲဍေံတံမွဲကဆံၚ် ကဵုတြးဒၟံၚ်ဂဥုဲၜူမာဲ အကြာညးသၟတ်တံ နွံတုဲ ဍန်ကၠုၚ်သၟတ်တံ နကဵုဂဥုဲၜူမာဲတုဲ ရပ်ဒက်ပကောံကၠုၚ်ကောန်ပၞာန်တၟိတၟိတံ နွံဂှ် ညးဒေသတံ ဟီုရ။
ပ္ဍဲတွဵုရးဍုၚ်မန်ဂှ်တှ်ေ ကံၚ်ဇြဳပၞာန် ကြဴနူပၠောပ်ကၠုၚ်လမျီုသၞောဝ်ယိုက်လျိုၚ်ပၞာန်တုဲဂှ် လၟေၚ်ဂိတု ကဵုဒၟံၚ်တန်ဗ္တောန်ကွတ်ပၞာန်တုဲ တုဲကၠုၚ်ပ္ဍဲဂိတုမာတ် ၁၇ တေံဂှ်လေဝ် ပံက်ကၠုၚ်လဝ် တန်ဗ္တောန်ကွတ်ပၞာန် လၟေၚ် ၁၁ တုဲ အခိၚ်လၟုဟ်ဂှ်လေဝ် ပကောံကၠုၚ်ဒၟံၚ်မၞိဟ်တၟိ သွက်တန်ဗ္တောန်ကွတ်ပၞာန် လၟေၚ် ၁၂ ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန် ပ္ဍဲကဵုတန်ဗ္တောန်ကွတ်ပၞာန်ကံၚ်ဇြဳပၞာန် နူလၟေၚ် ၁ စဵုလၟေၚ် ၁၁ ဂှ် ညးဒးဒုၚ်ရပ်ပလဝ်ကောန်ပၞာန် နွံကၠုၚ် ၂၀၀၀ ပြၚ်ဣရ။
ပရိုၚ်−သြၚ်လောန်တိုၚ်(မ်)
ဗီု−CJ