ဘာအၚ်၊ ဨပရဴ ၆
ပ္ဍဲတွဵုရးကရေၚ် လ္တူဍုၚ်ဘာအၚ် သ္ဘၚ်အတးသြၚ်ဗ္တဳ (နန်းဖော့အွာ) မကၠောန်ဗဒှ်အာ ပ္ဍဲပရၚ်ၜဳသၚ်လောန် ပွိုၚ်မွဲဂိတုပြၚ်ဂှ် ရုပ်သီထောံယျဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္ဘၚ်အတးသြၚ်ဗ္တဳ မကဵုလဝ်ယၟု (နန်းဖော့အွာ) ဂှ် ဂကောံကံၚ်ဇြဳပၞာန်တွဵုရးကရေၚ် စဳဇန်လဝ် သ္ဂောံကၠောန်ဗဒှ်အာ ပွိုၚ်မွဲဂိတုကီုလေဝ် ပ္ဍဲဂိတုမာတ် ၂၈ တုဲကၠုၚ်တေံ ဟိုတ်နူဘဲတိချဳ မက္တဵုဒှ်အာ ပ္ဍဲဍုၚ်ဗၟာ သ္ကုတ်လဒေါဝ်တံဂှ်တုဲ ကံၚ်ဇြဳပၞာန်တွဵုရးကရေၚ် ရုပ်သီထောံ သ္ဘၚ်အတးသြၚ်ဗ္တဳဂှ်ရ။
အခိၚ်ညးဍုၚ်ကွာန်ဂမၠိုၚ် ဒးဒၟံၚ်ဘဲတိချဳဂှ် ဂကောံကံၚ်ဇြဳပၞာန်တွဵုရး ကၠောန်ဗဒှ်အာ သ္ဘၚ်အတးသြၚ်ဗ္တဳ လ္တူဍုၚ်ဘာအၚ် မိပ်ပ်ဏောၚ်ဂးသာ်ဏံဂှ်ရ ညးဍုၚ်ကွာန်ဒေသဂမၠိုၚ် ပါ်ပါဲကၠုၚ်ညးသ္ကအ် ဂၠိုၚ်ကၠုၚ်တုဲ ရုပ်သီထောံ သ္ဘၚ်အတးသြၚ်ဗ္တဳ မသ္ဂောံကၠောန်ဗဒှ်အာဂှ်ရ။
ကၞာထး ကေုာံ ဆေၚ်ဖျာ မသိုၚ်လဝ် လ္တူသြၚ်ဗ္တဳတံဂှ် အကြာတ္ၚဲတံဏံ ရုပ်သီဒၟံၚ်တံ နွံကီုလေဝ် ပ္ဍဲဂၠံၚ်ဇိုၚ်ၜဳတံကဵု ပ္ဍဲရုၚ်အကြာအရာပ်လ္ၚဵုတံဂှ်တှ်ေ ဆက်သိုၚ်ဒၟံၚ် ကၞာထးဝေၚ်ဍာ်တံ နွံဂှ် တမ်ရိုဟ်ပရိုၚ် နူဘာအၚ်မွဲတၠ သ္ဂးရ။
သွက်ဂွံကၠောန်ဗဒှ်အာ သ္ဘၚ်အတးဍုၚ်ဘာအၚ် ပါလုပ်သီုကဵုအတးသြၚ်ဗ္တဳ၊ သၚ်္ကြာန်တွာ်တံ ဗွဲမမိပ်မြဟ် မွဲဒမြိပ်ဂၠံၚ်ဇိုၚ်ၜဳဂှ်တုဲ နူရုၚ်သ္ကိုပ်အုပ်ဓုပ်အရာပ် သၟဝ်တဲဂကောံကံၚ်ဇြဳပၞာန်တွဵုရးတံ ဗက်ကံက်ဒၟံၚ်သြန် မွဲသ္ၚိ စဵုကဵု ၅၀၀၀ ဒ္ကေဝ်ရ။
ဂကောံကံၚ်ဇြဳပၞာန်တွဵုရးဂှ်တှ်ေ ၜိုန်ရဟွံကၠောန် သ္ဘၚ်အတးသြၚ်ဗ္တဳ (နန်းဖော့အွာ) ဂှ်ရကီုလေဝ် ပ္ဍဲဂၠံၚ်ဇိုၚ်ၜဳဘာအၚ်ဂှ်တှ်ေ ဆက်သိုၚ်ဒၟံၚ် ကၞာထးဝေၚ်ဍာ် နူကဵုဌာနအလဵုအသဳတံကဵု ကၞာထးဗ္စဖျုၚ်ကၟုဲတံဂှ်တုဲ ပ္ဍဲဂၠံၚ်ဇိုၚ်ၜဳဂှ် ဆက်ကၠောန်ဗဒှ်အာ သ္ဘၚ်အတး အတိုၚ်အခိုက်ကၞာရဏောၚ်ဂှ် ဂွံတီကေတ်ရ။
သၞာံတုဲတေံ ပ္ဍဲသ္ဘၚ်အတးဍုၚ်ဘာအၚ် မွဲဒမြိပ်ဂၠံၚ်ဇိုၚ်ၜဳဂှ် ကၞာထး နူဌာန ဂကောံကံၚ်ဇြဳပၞာန်တွဵုရးတံသၟးရ နွံတုဲ ကၠောန်ကၠုၚ်လဝ်သၚ်္ကြာန်တွာ်၊ ဗ္စဖျုၚ်ကၠုၚ်ကၟုဲတံ နွံတုဲ မၞိဟ်ကၠုၚ်စိုပ်ဝေၚ်ဍာ်အတးတံလေဝ် နွံကၠုၚ် ၜိုတ်ဓမ္မတာရ။
ပရိုၚ်−သြၚ်လောန်တိုၚ်(မ်)
ဗီု−CJ