ဍာ်ဗု၊ မေ ၃
ဟိုတ်နူပေါဲဗ္တိုက်ၜါလ္ပာ် ဒှ်ဒၟံၚ် ပ္ဍဲပွိုၚ်ဍုၚ်ဍာ်ဗု ရးတၞၚ်သဳဂှ်တုဲ ညးပါဲဘဲပၞာန် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ် ဗ္ဒါဲမွဲလ္ၚီ နွံပၟိက်ဒၟံၚ်ကဵု အရီုဗၚ်ကာမံက်တိုန်ရောၚ် ညးမရီုဗၚ်ကဵုဒၟံၚ် ပရေၚ်ပါဲဘဲပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဨပရဴ ၂၀ တုဲကၠုၚ်တေံတုဲ ဒပ်ပၠန်ဂတးတံ လုပ်စိုပ်ဗ္တိုက်ကၠုၚ် ဗ္ဒိုပ်ဒပ်ပျူသဝ်ထဳ ကေုာံ ဗ္ဒိုပ်ဒပ်ကံၚ်ဇြဳပၞာန် မဖျေံလဝ်ဒပ်ဗပေၚ်လဝ်ဇြဟတ် ပ္ဍဲကွာန်မေန်တာ ပွိုၚ်ဍုၚ်ဍာ်ဗုဂှ်တုဲဂှ် ပေါဲဗ္တိုက်ၜါလ္ပာ် က္တဵုဒှ်ဒၟံၚ်ရ။
ဟိုတ်နူပေါဲဗ္တိုက်တံဏံတုဲ ညးဒေသဗၞတ်လ္ၚီ နူကဵုကွာန်(မင်းသား၊ စိန်ဘုံ၊ ဘုရားသုံးဆူ၊ ဆင်စွယ်၊ ရေငံကြီး၊ ကျောက်တလုံး) တံ ဒးဂြိပ်ဒဴပါဲဒလေတ်ဒၟံၚ် ပ္ဍဲဒၞါဲဗၠးဘဲ ကေုာံ ပ္ဍဲကဵုကွာန် ဒၞါဲမကြပ်တံဂှ်ရ။
ညးဍုၚ်ကွာန်ပါဲဘဲပၞာန်ဂမၠိုၚ်ဝွံ ဒးပါဲဒၟံၚ်ဘဲပၞာန်ဂှ် လအ်ကၠုၚ်ကြပ်ပွိုၚ်ၜါသတ္တာဟတုဲယျတုဲ ဟိုတ်နူပေါဲဗ္တိုက်ဂမၠိုၚ်တုဲ ဂွံရာန်ဇွောံမစၞစ ကေုာံ ဂဥုဲဇဗတံဂှ် အာကၠုၚ်ဟွံဂွံတုဲ နွံပၟိက်ဒၟံၚ်ကဵု အရီုဗၚ်ကာတၟေၚ်ရ။
ၜိုန်ရီုဗၚ်ထံက်ပၚ်ကဵုဒၟံၚ် ကုညးဍုၚ်ကွာန်ပါဲဘဲပၞာန် နွံပၟိက်ဒၟံၚ်ကဵု အရီုဗၚ်ကာမံက်တိုန်တံ နူကဵုဂၠံၚ်တရဴ မပြေပြံၚ်တံဂှ်ကီုလေဝ် ဍာ်ဇမၠိၚ်မ္ဂး ဇွောံမပိုတ်ကၠုၚ်မာန်ရောၚ် ညးမရီုဗၚ်ကဵုဒၟံၚ်ပရေၚ်ပါဲဘဲပၞာန်မွဲတၠ ဟီုရ။
အပ္ဍဲဂိတုမာတ်တုဲကၠုၚ်တေံ ပ္ဍဲရးတၞၚ်သဳဂှ် မ္ၚးနူပေါဲဗ္တိုက် အကြာဒပ်ကံၚ်ဇြဳပၞာန်ကဵု ဇြဟတ်ပၠန်ဂတးတံဂှ် ဟိုတ်နူဗ္တိုက်ကၠုၚ်ကဵုပၞာန်ကျာတုဲ ကောန်အရာပ် ဗ္ဒါဲထပှ်ဠက် ဒးပါဲလဝ်ဘဲပၞာန်ရောၚ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသန FE5 Thanintharyi ရ။
ပရိုၚ်−သြၚ်လောန်တိုၚ်(မ်)
ဗီု−CJ