မနဳလာ၊ မေ ၃
ဖဳလေတ်ဖေန် မ္ဒးဆေၚ်ကၠုၚ်ဒၟံၚ်မုက် ကုပရေၚ်ကြုက် မဂၠါဲကၠုၚ်ဒၟံၚ်သၞ ဂၠိုၚ်ကၠုၚ် ပ္ဍဲၜဳကြုၚ်သၠုၚ်ကျာ မဒှ်ဒၟံၚ်ပရေၚ်ကယျာန်ဓဝါန်ဂှ် အခိၚ်ညးတအ် ဒက်ဒၟံၚ်မဟာမိတ် ပရေၚ်ဂီုကၠီုဂှ် နျူဇြဳလာန် ကေုာံ ဖဳလေတ်ဖေန်တဝွံ ပ္ဍဲဂိတုဨပရဴ ၃၀ ဂှ် ထ္ပက်လဝ်စၟတ်တဲ တၚ်တုပ်စိုတ်ပရေၚ်ပၞာန်မွဲရ။
ပေါဲထ္ပက်စၟတ်တဲ တၚ်တုပ်စိုတ် စပ်ကဵုဒပ်ပၞာန်ၜါဍုၚ် ဂွံအခေါၚ်လုပ်တိတ် အကြာဝန်ဇၞော်ကာစဵုဒၞါဖဳလေတ်ဖေန် ဂဳဘာတိုဝ် တဳယိုဝ်ဒိုတ်ရိုဝ် ကေုာံ ဝန်ဇၞော်ကာစဵုဒၞါ နျူဇြဳလာန် ဂျူဒေတ် ကိုဝ်လေန်ဂှ် သမ္မတဖဳလေတ်ဖေန် မာကောသ် တိုန်စိုပ်လဝ်ရ။
အတိုၚ်တၚ်တုပ်စိုတ်ဏံမ္ဂး ပ္ဍဲၜါဍုၚ်ဏံ ဍုၚ်လဵုဟွံဟီု ပ္ကတ်ပ္ကေၚ်ပရေၚ်ပၞာန်ပံၚ်တောဲကီု၊ ပံၚ်တောဲရေၚ်တၠုၚ်အရာတၞဟ်သ္အာၚ်ကီုဂှ် ဒပ်ပၞာန်သီုၜါဍုၚ် ဂွံအခေါၚ်လုပ်တိတ် မဒှ်ရ။
သၞာဲဒဴနျူဇြဳလာန်တအ် သ္ပဒတန်လဝ် တၚ်တုပ်စိုတ်ဏံတုဲကီုလေဝ် ဂွံဂယိုၚ်လမျီုဂှ် ကၠတ်ထဝ်လ္တူဖဳလေတ်ဖေန် ဒးသ္ပဒတန်ဒၟံၚ်ဏီဏောၚ် မဒှ်ရ။
ဟိုတ်နူဖဳလေတ်ဖေန် ဒက်ကၠုၚ်မဟာမိတ်ပရေၚ်ဂီုကၠီုတုဲ ကြုက် ဟွံပြေစိုတ်တုဲ စပ်ကဵုဖျေံလဝ်သၞောတ်ကမ်လှောဝ်အမေရိကာန် ပ္ဍဲဖဳလေတ်ဖေန်ဂှ်တုဲလေဝ် ဒစဵုဒစးလဝ်ရ။
သၞာံတုဲကၠုၚ် ပ္ဍဲဂိတုဂျူလာၚ်တေံဂှ်လေဝ် ဖဳလေတ်ဖေန်ဝွံ ထ္ပက်လဝ်စၟတ်တဲ လိက်ကသုက်လအာတုပ်သာ်ဏံ ကုဂျပါန်တုဲ ကြုက်ဂှ်တှ်ေ ဟီုကၠုၚ်လဝ် ဒဒှ်ရအပ္ဍဲဒေသ ဟွံမွဲပၟိက်ကဵုဂကောံပရေၚ်ပၞာန် မဒှ်ရ။
ဟိုတ်နူအမေရိကာန် ဖျေံလဝ်သၞောတ်ကမ်လှောဝ် ပ္ဍဲဖဳလေတ်ဖေန်တုဲ အပ္ဍဲဒေသ ပရေၚ်ပြိုၚ်ပ္ကာန်လွဟ်လက်နက် ဒှ်ကၠုၚ်မာန်ဏောၚ်ဂှ် ကြုက် ကဵုလဝ်သတိရ။
ဖဳလေတ်ဖေန်ဂှ်တှ်ေ ကလေၚ်ဟီုလဝ်ကုကြုက် ညံၚ်ဟွံဂွံလုပ်ပလာပ်ပထုဲ ပ္ဍဲကေၚ်ကာအပ္ဍဲဍုၚ်ညးတံရ။
လက်ထက်သမ္မတတြေံ ဒူတာတေတေံ ပရေၚ်ဆက်ဆောံကုကြုက် ဟွံပြေပြံၚ် နွံလဝ်ကီုလေဝ် ပ္ဍဲလက်ထက်သမ္မတမာကောသ်ဂှ်တှ်ေ ဖဳလေတ်ဖေန်ဝွံ သၠုၚ်ပ္တိုန်လဝ် ပရေၚ်ဒက်မဟာမိတ်ပရေၚ်ပၞာန်ရ။
သွက်ဂွံတာဒၞါ ပရေၚ်ကြုက် မဂၠါဲဒၟံၚ်သၞတံဂှ် နကဵုဖဳလေတ်ဖေန် ဒဒှ်ရဒက်အာမဟာမိတ်ပရေၚ်ပၞာန် ကုဍုၚ်ဒဒှ်ေဒယှ်တၞဟ်ဟ်တံဏီဏောၚ်ဂှ် ဝန်ဇၞော်ကာစဵုဒၞါဖဳလေတ်ဖေန် ဟီုလဝ်ရ။
ဟိုတ်နူပြဝ ကြုက်ဂၠါဲသၞတံဂှ်တုဲ မွဲအခိၚ်မ္ဂး ဒးဒုၚ်ကၟာတ်လဒဵု အခေါၚ်တတ်ကၠောံအာကၠုၚ် ပ္ဍဲၜဳကြုက်သၠုၚ်ကျာဂှ်မာန်ဂှ်ရ ထေက်ကဵုဒးညာတ်ကေတ် နဒဒှ်ပြဒ္ဒညာ မဆက်စပ်ကဵုဍုၚ်သ္အာၚ်မွဲဂှ် ဖဳလေတ်ဖေန် ဟီုလဝ်ရ။
Ref: AFP