မတ်မလီု၊ မေ ၃
အခိၚ်ရာသဳဥတုဖံက်ပၠန်ဒၟံၚ်ဂှ် ဟိုတ်နူဒမြိပ်ၜဵုတိတ် အောန်စှ်ေကၠုၚ်တုဲ ၜဵုစဲတ္ၚဲတိတ်နူတွဵုရးဍုၚ်မန် ၚုဟ်သၠုၚ်တိုန်ကၠုၚ်ရောၚ် ညးမကၠောန်ၜဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ၜဵုစဲတ္ၚဲ ၜဵုဒမျိုၚ်ဂှ် ကၠာၜဵုဟွံဂွံတိတ်ဏီဂှ် ၚုဟ်နွံကၠုၚ်လဝ် ပွဳပွူ ၂၀၀ ဒ္ကေဝ်ဓဝ်တုဲ စနူဂိတုမေ သတ္တာဟပထမဏံတုဲ မွဲပသာ ၚုဟ်ၜဵု ထ္ပက်တိုန်ကၠုၚ်လဝ် စဵုကဵု ၆၅၀ ဒ္ကေဝ်ရ။
ၚုဟ်ၜဵုစဲတ္ၚဲဝွံ ဟိုတ်နူရာသဳဥတုဖံက်ပၠန်တုဲ ဒမြိပ်ၜဵုတိတ် ယအ်စှ်ေအာလဝ် တီတီကီု၊ နူဒေသတၞဟ်ဟ်တံလေဝ် ကၠုၚ်စိုပ်ရာန်လဝ်ကီုတုဲ ၚုဟ်ၜဵု ထၠာ်တိုန်ကၠုၚ်ရ။
ညးကၠောန်ၜဵုမွဲတၠဂှ်တှ်ေ ၚုဟ်ၜဵုစဲတ္ၚဲ ဂွံသၠုၚ်တိုန်ကၠုၚ်ဂှ်ဝွံ ဟိုတ်ဒၟါနူဒမြိပ်ၜဵုတိတ် စှ်ေကၠုၚ်ၜိုတ်ကဝက်ပြၚ်ကီု၊ ဟိုတ်နူလ္ပာ်လ္ဂုၚ်တေံ ကၠုၚ်စိုပ်ရာန်ကၠုၚ်ဒၟံၚ်နွံဂှ် ဟီုရ။
“ၜဵုဂှ် သၞာံဏံ စှ်ေအာၜိုတ်ကဝက်ရ။ တုဲတှ်ေ လၟုဟ် ၚုဟ်ၜဵုတိုန်ဂှ် ရဲစက်ဗုတ်တံ ရာန်တုဲ ၚုဟ်တိုန်လဝ်ဟွံသေၚ်ပုဟ်။ လ္ပာ်လ္ဂုၚ် လ္ပာ်ဨရာဝတဳတေံ ၜဵုဟွံမွဲစကွေံတုဲ အခါစိုပ်ကၠုၚ်လ္ပာ်ဏံဂှ် ၚုဟ်ဍေံတိုန်အာသာ်ဏံရ။ ဂွံၚုဟ်ၜဵု မွဲလ္ၚီကီုလေဝ် ညးမကၠောန်ၜဵုတံ ၜဵုဟွံမွဲတုဲ ဗီုလဵုဂွံအာဂှ်ရော” သာ်ဝွံ သ္ဂးရ။
ၚုဟ်ၜဵုစဲတ္ၚဲ ထၠာ်တိုန်ကၠုၚ်ကီုလေဝ် ၜဵုဗွဲမဂၠိုၚ်ဝွံ ဟွံမွဲပ္ဍဲတဲညးမကၠောန်ၜဵုတံရတုဲ အာနွံဒၟံၚ် ပ္ဍဲညးမကြိုၚ်စွံလဝ်တံကဵု ညးစအကြာတံသၟးတံဂှ်ရ နကဵုညးမကၠောန်ၜဵုဂမၠိုၚ် စပ်ကဵုၚုဟ်ၜဵုခိုဟ်ကၠုၚ်ဂှ်တုဲ ဟွံဂွံဒုၚ်စသိုၚ်ဂုန်ဖဵုဍေံပုဟ်ဂှ် ညးဆက်ဟီုရ။
မွဲလ္ပာ်ဂှ်ပၠန်လေဝ် ကမၠောန်ၜဵုစဲတ္ၚဲဝွံ အပ္ဍဲဂိတုဨပရဴဏံ ဟိုတ်နူဗြဲဂူဒၟံၚ်ကြပ်အရိုဟ်တ္ၚဲ ရာသဳဥတုဖံက်ပၠန်တုဲ ကၠာရာသဳၜဵုဟွံဂွံအိုတ်ဂှ် ဒးဒေါအ်ဇူကမၠောန်တံဂှ်တုဲလေဝ် ဒမြိပ်ၜဵုတိတ် ယအ်စှ်ေအာလဝ် တီတီရ။
သ္အာၚ်နူဂှ်ပၠန် အပ္ဍဲကာလရာသဳၜဵုဏံဂှ် ကောန်ကလောန်စိုန်သကီု အောန်ကီု၊ ၚုဟ်ကၠေၚ်စက် သၠုၚ်တိုန်ကၠုၚ်သၟးဟွံက ဟိုတ်နူခရိတ်အိုတ်နာနာ က္ဍၚ်ကၠုၚ်ဂှ်တုဲ ကၠောန်ဖအောန်ဖျေံကၠုၚ် ကမၠောန်ၜဵုတံဂှ်ရ ၜဵုတိတ်အောန်လဝ်ရောၚ် ညးကၠောန်ၜဵုဂမၠိုၚ် ဟီုလဝ်ရ။
ပ္ဍဲတွဵုရးဍုၚ်မန်ဂှ်တှ်ေ ကမၠောန်ၜဵုစဲတ္ၚဲဂှ် ကၠောန်ၜိုတ်ဒၟံၚ် ပ္ဍဲပွိုၚ်ဍုၚ်ပံၚ်၊ ပွိုၚ်ဍုၚ်ဇြပ်ဗု ကေုာံ ပွိုၚ်ဍုၚ်ရေဝ် အဓိကတုဲ လၟေၚ်သၞာံ လျိုၚ်တာန်ၜဵု တိတ်ဒၟံၚ် ၄၀၀၀၀ ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ