မတ်မလီု၊ မေ ၃
ဟိုတ်နူကသဳတိဇၞော်ကဵုဇြဟတ် ချဳဇတဝ်အာလဝ် ပ္ဍဲဍုၚ်ဗၟာ သ္ကုတ်လဒေါဝ်ဂှ်တုဲ အပ္ဍဲကာလဒေါအ်ပန်ပှော် ဗွဲယာယဳ ကံၚ်ဇြဳပၞာန် မလလောၚ်တြးလဝ်ဂှ် ဗ္တိုက်ထောံကၠုၚ်မခတိုဟ် နူကဵုပၞာန်ကျာတုဲ ညးဍုၚ်ကွာန်ကောန်အရာပ် ဗ္ဒါဲ ၁၂၀ တၠ ဒးချိုတ်အာလဝ်ရ။
အပ္ဍဲကာလကံၚ်ဇြဳပၞာန် ဒေါအ်လဝ်ပန်ပှော် နူဂိတုဨပရဴ ၂ စဵုကဵုဂိတုဨပရဴ ၂၂ ဂှ် လၟေၚ်ဒဒှ်ထောံဂြာတ်လဝ်မခတိုဟ် ဗ္တိုက်ကၠုၚ်လဝ်နူကဵုပၞာန်ကျာ ပ္ဍဲကဵု ၄၀ ပွိုၚ်ဍုၚ်ဂှ် နွံကၠုၚ်လဝ် ၇၁ ပရူတုဲ ညးဍုၚ်ကွာန်ဒေသ ၁၁၈ တၠ လမျီုဒးအိုတ်အာလဝ်ရောၚ် စၟတ်သမ္တီ Myanmar Peace Monitor ထ္မံက်ထ္ၜးလဝ်ရ။
အပ္ဍဲကာလဒေါအ်ပန်ပှော်ဂှ် ပါဲနူရးလ္ဂုၚ်တုဲ ပ္ဍဲရးဒေသ ကေုာံ တွဵုရးသှ်ေတံဂှ် ကံၚ်ဇြဳပၞာန် ဆက်ကလိလောန်ကၠုၚ်လဝ် ပရေၚ်ဗ္တိုက်ကဵုပၞာန်ကျာတံဂှ်တုဲ ရးမာန္တလေဝ် ကဵု ရးသက်ကိုၚ် မ္ဒးဂဗလဝ် ဘဲတိချဳ သ္ကာတ်မြဟ်အိုတ်ဂှ်ဝွံ ဒှ်ဒေသ ဒးဒုၚ်ဗ္တိုက်ထောံလဝ်မခတိုဟ်ဂၠိုၚ်အိုတ်ရ။
ပွိုၚ်ဍုၚ်ဒးဒုၚ်ဗ္တိုက်ကဵုပၞာန်ကျာဂၠိုၚ်အိုတ်တံဂှ်တှ်ေ ပ္ဍဲရးမာန္တလေဝ် ဒၞါဲဂကောံဇြဟတ်ပၠန်ဂတးတံ ထိၚ်ဒက်လဝ် မပ္တံကဵုပွိုၚ်ဍုၚ် (စဥ◌့်ကူး၊ သပိတ်ကျင်း) ၊ ပ္ဍဲရးသေံသၟဝ်ကျာဂှ် ပွိုၚ်ဍုၚ်နံၚ်ချဵု၊ ပ္ဍဲတွဵုရးကချေၚ်ဂှ် ပွိုၚ်ဍုၚ်အေန်ဒဝ်ရ။
သ္အာၚ်နူဂှ်ပၠန် ပ္ဍဲကဵုဒေသပေါဲဗ္တိုက်သ္ကာတ်မြဟ်ဒၟံၚ် မပ္တံကဵုပွိုၚ်ဍုၚ်(လေးမျက်နာ) ရးဨရာဝတဳ၊ ပွိုၚ်ဍုၚ်ကျံက်ဖျူ တွဵုရးရခေၚ်၊ ပွိုၚ်ဍုၚ်ကအ်ကြိက် ကေုာံ ပွိုၚ်ဍုၚ်ဘာပန် တွဵုရးကရေၚ်တံဂှ်လေဝ် ပါလုပ်ဒၟံၚ် ပ္ဍဲကဵုပွိုၚ်ဍုၚ်ဒးဒုၚ်ဗ္တိုက်လဝ်ကဵုပၞာန်ကျာ ဂၠိုၚ်အိုတ်ရ။
အတိုၚ်စၟတ်သမ္တီ BNI-Myanmar Peace Monitor ဂှ်မ္ဂး စနူသၞာံ ၂၀၂၁ ဂိတုမာတ်တုဲ ဒပ်ကံၚ်ဇြဳပၞာန် စရပ်စပ်စကာကၠုၚ်ပရေၚ်ဗ္တိုက်ကဵုပၞာန်ကျာတံဂှ်တုဲ နူဏံ အခိၚ်ကောန်ဒပ်ဂမၠိုၚ် ဗ္ဒိုပ်ဒပ်ဂမၠိုၚ် ဆောံလေၚ်ဂၠိုၚ်ကၠုၚ်ဂှ် သာတုဲသ္ပပဓာန်ကၠုၚ် ပရေၚ်ဗ္တိုက်ကဵုပၞာန်ကျာတံရ။
မွဲဒမြိပ်ကာလသီလဝ်အဝဵု စဵုကဵုသၞာံဏံ ဂိတုဨပရဴ ၂၂ ဂှ် လၟေၚ်ဒဒှ်ဗ္တိုက်ကဵုပၞာန်ကျာ ထောံဂြာတ်မခတိုဟ်တံဂှ် နွံကၠုၚ်လဝ် ၂၀၉၀ ပြၚ်တုဲ ညးဍုၚ်ကွာန်ကောန်အရာပ် ဗ္ဒါဲ ၂၁၅၀ တၠ ဒးချိုတ်အာလဝ်ရ။
ဟိုတ်ဂှ်ရ ဥက္ကဌအာဇြဳယာန် မပါလုပ် နကဵုဂကောံအလဵုအသဳဍုၚ်သ္အာၚ်ဂမၠိုၚ် ညံၚ်ရဴဒုၚ်တၠုၚ်တၚ်လလောၚ်တြးဒေါအ်ပန်ပှော် ကံၚ်ဇြဳပၞာန်ဂှ် သွက်ဂွံမၚ်ရံၚ်အာ ပြဝအဆက်လက္ကရဴတံဂှ်လေဝ် ထံက်ထ္ၜးလဝ်ရ။
ဍုၚ်မလေဝ်ယှာ မဒှ်ဥက္ကဌအာဇြဳယာန်ဂှ်တှ်ေ သွက်ဂွံကၠောန် ကမၠောန်ကဵုအရီုဗၚ်ပရေၚ်ဗ္စာရဏာမၞိဟ် ပ္ဍဲဒေသဒးဘဲတိချဳတံမာန်ဂှ် ဖ္တိုက်ဖ္အောဝ်လဝ် ဂကောံၜါလ္ပာ် သွက်ဂွံထပ်ပပဵုပ္တိုန် ကာလဒေါအ်ပန်ပှော်ရ။
ပရေၚ်ဒေါအ်ပန်ပှော် မလလောၚ်တြးလဝ် ကြဴနူဍုၚ်ဗၟာ ဒးဘဲသဘာဝတုဲဂှ် သွက်ဂွံဆက်ထိၚ်ဒဝ် ပပဵုပ္တိုန်အာယုက်ဂှ် ဖ္တိုက်ဖ္အောဝ်လဝ် ကုကံၚ်ဇြဳပၞာန်ကေုာံ အလဵုအသဳညဳသၟဟ်ဂကူ NUG ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ဌာနကာဍုၚ်သ္အာၚ်မလေဝ်ယှာ မလလောၚ်ပ္တိတ်လဝ် ပ္ဍဲဂိတုဨပရဴ ၃၀ တေံရ။
ပြဟ်ဟ်ဏံ နကဵုကံၚ်ဇြဳပၞာန် မပပဵုပ္တိုန်လဝ်အာယုက်ကာလဒေါအ်ပန်ပှော် စဵုကဵုဂိတုဨပရဴအိုတ်ဂှ် သွက်ဂွံဆက်ပပဵုပ္တိုန်အာယုက် အပ္ဍဲဂိတုမေဂှ် ဟွံဂွံလလောၚ်တြး ဗွဲမလုပ်သၞောဝ်ဏီရ။ လအာတုပ်သာ်ဂှ်ကီု NUG လေဝ် ပ္ဍဲဒေသဒးဘဲတိချဳကဵု ဒေသမဆက်စပ်တံဂှ် ဒေါအ်လဝ်ပၞာန်ထ္ပက် စဵုကဵုဂိတုဨပရဴ ၂၀ တုဲ စပ်ကဵုပရေၚ်ဒေါအ်ပန်ပှော်ဂှ်တုဲ ဒဵုကဵုအခိၚ်လၟုဟ် လလောၚ်ပ္တိတ်လဝ်ပရိုၚ်ဂှ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီု−Social Media