ကအ်ကြိက်၊ မေ ၃
ကရောၚ်ပၞာန်ဒပ်ကံၚ်ဇြဳပၞာန် မတိုန်ကၠုၚ်ကဵုအရီုဗၚ်ပၞာန် ဗ္ဒါဲဍုၚ်ကြုၚ်ဒဵုကဵု သၠုၚ်ကျာကအ်ကြိက် တွဵုရးကရေၚ် ဒၞါဲပေါဲဗ္တိုက်မသ္ကာတ်မြဟ်ဒၟံၚ်ဂှ် ဒးဂိဒၟံၚ်တုဲ ဒပ်ကံၚ်ဇြဳပၞာန်တအ် ဆက်ဗ္တိုက်ဒၟံၚ်ကဵုပၞာန်ကျာ လ္တူကွာန်ဂမၠိုၚ်ရောၚ် တမ်ရိုဟ်ပရိုၚ်ဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဨပရဴအိုတ်တုဲကၠုၚ်တေံတတုဲ လ္ပာ်ကွာန်(နွားခြံကုန်း) ဗ္ဒါဲဍုၚ်ကြုၚ်ဒဵုဂှ် အကြာဒပ်ကံၚ်ဇြဳပၞာန် တိုန်ကၠုၚ်ကဵုအရီုဗၚ်ပၞာန် ကေုာံ ဂကောံဇြဟတ်ပၠန်ဂတးမဟာမိတ် သၟဝ်သ္ကိုပ်သ္က KNLA ဂှ် ပေါဲဗ္တိုက်ၜါလ္ပာ် သ္ကာတ်မြဟ်လဝ်တုဲ လ္ပာ်ဒပ်ကံၚ်ဇြဳပၞာန် ဒးဂိအာတုဲ သီဂွံလဝ် လွဟ်လက်နက်မကမ်ဂမၠိုၚ်ရောၚ် တမ်ရိုဟ်ပရိုၚ်ဇြဟတ်ပၠန်ဂတးတံ ထ္မံက်ထ္ၜးလဝ်ရ။
သွက်ဂွံကလေၚ်သီ နူ(နွားခြံကုန်း) စဵုကဵု ၉ တိုၚ် လ္တူသ္ကုတ်ဂၠံၚ်ကြုၚ်ဒဵု−ကအ်ကြိက် မဒှ်သ္ကုတ်ဇြဟတ်ပၠန်ဂတးတအ် အုပ်ဓလီုလဝ်ဂှ်ကီု၊ သွက်ဂွံကဵုအရီုဗၚ်ပၞာန်ကီုဂှ် စနူဂိတုဨပရဴ သတ္တာဟတတိယတုဲ နူမတ်မလီု ဘာအၚ်ဂှ် ဒပ်ကံၚ်ဇြဳပၞာန် ကၠုၚ်စိုပ်ကဵုဒၟံၚ်အရီုပၞာန် ပ္ဍဲဒေသဂြာၚ် ဗ္ဒါဲဍုၚ်ကြုၚ်ဒဵု နကဵုဇြဟတ်လၟိဟ်ဗွဲမဂၠိုၚ်ရ။
ဒပ်ကံၚ်ဇြဳပၞာန် မဒးဂိလဝ် ပ္ဍဲပေါဲဗ္တိုက်တံဂှ်ဝွံ ပ္ဍဲဂိတုမေ ၁ အခိၚ်ဇိုၚ်သဝ်တ္ၚဲဂှ် ဗ္တိုက်ကၠုၚ်လဝ်ပၞာန်ကျာ လ္တူကွာန်(ကြာအၚ်းစု၊ ချောၚ်းဖျား) နူကဵုဗွဲဒိုဟ်ဨသာန် ဍုၚ်ကြုၚ်ဒဵုဂှ်တုဲ ကောန်အရာပ်ဇီုကပိုက်ဒးဟွံမွဲကီုလေဝ် စမြိုၚ်သ္ၚိလ္ၚဵု ဇီုကပိုက်ဒးနွံလဝ်ရောၚ် တမ်ရိုဟ်ပရိုၚ်ဒေသဂမၠိုၚ် ကဵုလဝ်သမ္တီရ။
ဟိုတ်နူပေါဲဗ္တိုက်တုဲ ညးဍုၚ်ကွာန်ဒေသ နူကဵုကွာန် ဗ္ဒါဲဍုၚ်ကြုၚ်ဒဵုတံဝွံ ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲရ။
သ္အာၚ်နူဂှ်ပၠန် ပ္ဍဲဂိတုမေ ၂ အခိၚ်လဒေါဝ်တ္ၚဲဂှ်လေဝ် ဒပ်ကံၚ်ဇြဳပၞာန် ဗ္တိုက်ကၠုၚ်လဝ်ပၞာန်ကျာ လ္ပာ်သၠုၚ်ကျာကအ်ကြိက် တိဍာ်ဒပ်မဟာ ၆ KNU ဂှ် တမ်ရိုဟ်ပရိုၚ်ဒေသဂမၠိုၚ် သ္ဂးရ။
အခိၚ်ပေါဲဗ္တိုက်ကအ်ကြိက် ကြုၚ်ဒဵု လအ်ကၠုၚ်ကြပ်ပေၚ်ပိသတ္တာဟဂှ် ဟိုတ်နူဒပ်ကံၚ််ဇြဳပၞာန် ဗ္တိုက်ကဵုပၞာန်ကျာ ကေုာံ ပန်ကဵုလွဟ်ဇၞော်တံဂှ်တုဲ ညးဍုၚ်ကွာန်ဒေသ နူကဵုဒေသကြုၚ်ဒဵု ကအ်ကြိက် ၂၀ ပြၚ် လမျီုဒးအိုတ်အာတုဲ ဗ္ဒါဲ ၃၀ တၠ ဇီုကပိုက်ကလိဂွံလဝ်ဝပ်တုဲ ညးဍုၚ်ကွာန်ဒေသ ဂၠိုၚ်ကဵုဠက် ဒးဂြိပ်ဒဴပါဲဒလေတ်လဝ်ရ။
အခိၚ်တ္ၚဲဒးပါဲဘဲပၞာန် ဂၠိၚ်သ္ၚောဲကၠုၚ်ဗက် ညးဍုၚ်ကွာန်ပါဲဘဲပၞာန်ဂမၠိုၚ်ဝွံ ဒးဂဗဒၟံၚ်ကဵု ပြဒ္ဒညာပရေၚ်ထတ်ယုက် ပြဒ္ဒညာကလိဂွံဇွောံမစၞစ ကေုာံ ဒၞါဲမံၚ်စံၚ်တံဂှ်တုဲ နွံပၟိက်ဒၟံၚ်ကဵု အရီုဗၚ်ဂမၠိုၚ်ဖိုဟ်ရောၚ် ဂကောံမှာဇန် မအာစိုပ်ရီုဗၚ်ကဵုဒၟံၚ်ဂမၠိုၚ် သ္ဂးရ။
ဒပ်ကံၚ်ဇြဳပၞာန်ဂှ်တှ်ေ သွက်ဂွံကလေၚ်သီကေတ် ဂၠံၚ်ကအ်ကြိက်−ကြုၚ်ဒဵုကီု သွက်ကရောၚ်ပၞာန်အံၚ်ဇေယျ နွံဒၟံၚ်ပ္ဍဲသ္ကုတ်ဂၠံၚ်အာယှ ဂွံဖံက်တိတ်မာန်ဂှ် ပလံၚ်ကဵုဒၟံၚ်ပၞာန်အရီု နူကဵုဇြဟတ်ဒပ် မဖျေံလဝ်သ္ဇိုၚ် ပ္ဍဲဒေသဂြာၚ်တံဂှ်တုဲ ကုဌာန်ဂအုပ်တမ်ဒပ်ကံၚ်ဇြဳပၞာန် ကေုာံ ကရောၚ်ပၞာန်ဒပ်ကံၚ်ဇြဳပၞာန် မကၠုၚ်ကဵုပၞာန်အရီုတံဂှ်လေဝ် ဗ္တိုက်ဒၟံၚ်နွံရ။
ပရိုၚ်−သြၚ်လောန်တိုၚ်(မ်)
ဗီု− CJ