ဘာပန်၊ မေ ၆
ပ္ဍဲတွဵုရးကရေၚ် ခရိုၚ်ဘာပန်ဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ကဵုလွဟ်ဇၞော် ကေုာံ ထောံဂြာတ်ကၠုၚ်မခတိုဟ် နကဵုက္ၜၚ်ကျာတံဂှ်တုဲ အပ္ဍဲဂိတုဨပရဴ ပွိုၚ်မွဲဂိတုဂှ် ညးဍုၚ်ကွာန်ကောန်အရာပ် ဇီုကပိုက်ချိုတ်အာလဝ် နွံတုဲ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံအိုတ်ဂှ် KNU ဗဟဵု လလောၚ်ပ္တိတ်လဝ်ပရိုၚ် ပ္ဍဲဂိတုမေ ၅ တေံရ။
တုဲကၠုၚ် နူဂိတုဨပရဴ ၁ စဵုကဵု ဂိတုဨပရဴ ၃၀ အပ္ဍဲပွိုၚ်မွဲဂိတုဂှ် အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA ဒပ်မဟာ ၅ ဂှ် ပေါဲဗ္တိုက်ဍောတ်ဇၞော် ဒှ်လဝ် ၁၃၉ ဝါရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အပ္ဍဲပေါဲဗ္တိုက်ဂမၠိုၚ်ဂှ် လ္ပာ်ဒပ်ကံၚ်ဇြဳပၞာန်ဂှ် ကဆံၚ်သ္ကိုပ်ဗိုလ် ၂ တၠ၊ ကဆံၚ်အကြာပ်ဒပ်ဇၞော် ၁ တၠ မပါလုပ် ၃၉ တၠ ချိုတ်အာလဝ်တုဲ ဒုအကြာပ်ဒပ် ၁ တၠ မပါလုပ် ၅၅ တၠ ဇီုကပိုက်ကလိဂွံလဝ်ဝပ်တုဲ စမြိုၚ် ၉ မ ဒးလီုလာ်အာလဝ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် လ္ပာ်ဒပ်ကံၚ်ဇြဳပၞာန် ပန်ပှော်လဝ်နကဵုလွဟ်ဇၞော် ပ္ဍဲကဵုကွာန်ညးဍုၚ်ကွာန်ဂမၠိုၚ်မမံၚ်တန်တဴဂှ် ၇ ဝါ၊ ထောံဂြာတ်လဝ်မခတိုဟ် ၁၄ မ နကဵုက္ၜၚ်ကျာဗ္တိုက်တံဂှ်တုဲ ကောန်အရာပ် ၂ တၠ ချိုတ်အာလဝ်တုဲ ၇ တၠ ဇီုကပိုက်ကလိဂွံလဝ်ဝပ်ရ။
ဟိုတ်နူဒပ်ကံၚ်ဇြဳပၞာန် ဗ္တိုက်ကဵုပၞာန်ကျာ ကေုာံ ပန်ပှော်ကဵုလွဟ်ဇၞော် သာ်ဏံဂှ်တုဲ ဒၞါဲညးဍုၚ်ကွာန်ကောန်အရာပ်ဂမၠိုၚ် ကၠောန်ၜိုတ်စသုၚ်တံဂှ်လေဝ် ဇီုကပိုက်လီုလာ်အာလဝ်တုဲ ဒးဂြိပ်ဒဴပါဲဒလေတ်ဒၟံၚ်ဒၞါဲဗၠးဘဲလမျီု သီုကဵုဓဝိၚ်ရောၚ် KNU ဗဟဵု လလောၚ်ပ္တိတ်လဝ်ရ။
ပ္ဍဲခရိုၚ်ဘာပန် တိဍာ်ဒပ်မဟာ ၅ KNU ဂှ် ဟိုတ်နူဒပ်ကံၚ်ဇြဳပၞာန် ပန်ဗ္တိုက်ကၠုၚ်တုဲ လၟိဟ်ညးပါဲဘဲပၞာန် ထောံလသာသ္ၚိဌာန်ဒးဂြိပ်ဒဴပါဲဒလေတ်ဒၟံၚ်တံ နွံဒၟံၚ် ဗ္ဒါဲ ၇၀၀၀၀ တုဲ ညးဍုၚ်ကွာန်ပါဲဘဲပၞာန်ဂမၠိုၚ်ဝွံ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်ဂမၠိုၚ်ရောၚ် ဂွံတီကေတ် အတိုၚ်တၚ်လလောၚ်တြး ကမ္မတဳစပ်ကဵုညးဒဒိုက်ကရေၚ်အပ္ဍဲဍုၚ် CIDKP ရ။
ဒပ်ကံၚ်ဇြဳပၞာန်ဂှ်တှ်ေ ဒေါအ်ပန်ပှော်ဏောၚ် ၜိုန်လလောၚ်တြးလဝ်ကီုလေဝ် ပ္ဍဲတိဍာ်ဗော်သွးကောန်ဂကူကရေၚ် KNU ကီု ပ္ဍဲကဵုတိဍာ်ဒပ်ပၠန်ဂတးကောန်ဍုၚ်အရၚ်ဂမၠိုၚ် မထိၚ်ဒဝ်လဝ်တံဂှ် ပွမဗ္တိုက်ကဵုပၞာန်ကျာ၊ ပန်ကဵုလွဟ်ဇၞော် ကေုာံ ဗ္တိုက်ထောံမခတိုဟ် နကဵုဒရုၚ်တံဂှ် သၠုၚ်ပ္တိုန်အသိၚ် ကၠောန်ကၠုၚ်ဒၟံၚ်တုဲ ဒမြိပ်ညးဍုၚ်ကွာန်ကောန်အရာပ်ဂမၠိုၚ် ဇီုကပိုက်ချိုတ်အာတံ သၠုၚ်တိုန်ကၠုၚ်လဝ်ရ။
ဟိုတ်နူပေါဲဗ္တိုက်ကြုၚ်ဒဵု၊ ကအ်ကြိက် မက္တဵုဒှ်ဒၟံၚ်လၟုဟ်တံဂှ်တုဲ ဒပ်ကံၚ်ဇြဳပၞာန် ဗ္တိုက်ကၠုၚ်ဒၟံၚ်ပၞာန်ကျာ အပ္ဍဲတိဍာ်ဒပ်မဟာ ၇ ကဵု တိဍာ်ဒပ်မဟာ ၆ KNU ကြပ်အရိုဟ်ဒဒှ်တ္ၚဲတုဲ အပ္ဍဲကာလပေါဲဗ္တိုက်ဏံ ဟိုတ်နူဒပ်ကံၚ်ဇြဳပၞာန် ဗ္တိုက်ထောံကၠုၚ်မခတိုဟ်တုဲ ကောန်အရာပ် ၂၀ တၠပြၚ် ဒးချိုတ်အာလဝ်တုဲ ၃၀ တၠပြၚ် ဇီုကပိုက်ကလိဂွံလဝ်ဝပ်ရောၚ် ဂွံတီကေတ် နူကဵုပရိုၚ်ဗလးတိရ။
ပရိုၚ်−သြၚ်လောန်တိုၚ်(မ်)
ဗီု- KHRG