ဝါယှေန်တာန်၊ မေ ၆
သမ္မတအမေရိကာန် ဒဝ်နေဝ်ထြာမ် ဟီုကၠုၚ်လဝ် ဒဒှ်ရဟွံလုပ်ပြိုၚ် သွက်အာယုက်သမ္မတ မရနုက်ကဵုအလန်တတိယဂှ်ရ။
ဂွံလုပ်ပြိုၚ် နဒဒှ်သမ္မတ မရနုက်ကဵုပိဝါဂှ်ဝွံ သၞောဝ်သ္ဇိုၚ်ဒက်ပ္တန်အမေရိကာန် တာဒၞါလဝ်တုဲတုဲရောၚ် တၠပညာဂမၠိုၚ် ဟီုလဝ်ရ။
နကဵုညး ဒှ်ညးမယိုက်ဂၠေၚ်လျိုၚ်သမ္မတ ၈ သၞာံတုဲ ဒှ်ညးမယိုက်ဂၠေၚ် အာယုက်သမ္မတ ၜါဝါဂှ် ထြာမ် ဟီုကၠုၚ်လဝ်ရ။
သမ္မတထြာမ် အာယုက်မၞုံ ၇၈ သၞာံဂှ် ကၠာတေံ ကေၚ်ဟီုကၠုၚ်လဝ် ဒဒှ်ရလုပ်ပြိုၚ်အာ သွက်ဂွံဒှ်သမ္မတအမေရိကာန် သီုမရနုက်ကဵုပိဝါ၊ ပန်ဝါဏောၚ် မဒှ်ရ။
ဒဒှ်မဟီုကၠုၚ်သာ်ဏံဂှ်ဝွံ ရန်ကဵုသွက်သ္ဂောံသ္ပစရဵု ကုမဳဒဳယျာ မထ္မံက်ထ္ၜးကၠုၚ်ပရိုၚ်ပတောံတံဂှ်ဏောၚ်ဂှ် ဗွဲကြဴဏံ ထြာမ် ပြံၚ်လှာဲဟီုကၠုၚ်လဝ်ရ။
ကမ္ပဏဳညး The Trump Organization ဂှ် စသွံတြးဒၟံၚ်ခၟံက် Trump 2028 ဂှ်တုဲ ကြဴနူအာယုက်သမ္မတညးအိုတ်အာ ပ္ဍဲသၞာံ ၂၀၂၉ ဂိတုဂျာန္နဝါရဳတေံတုဲမ္ဂး ထြာမ် ကလေၚ်လုပ်ပြိုၚ်အာ နဒဒှ်သမ္မတမွဲဝါပၠန်ဏောၚ် ပရိုၚ်သာ်ဏံ မံက်တိတ်ဒၟံၚ်ရ။
ထြာမ်ဂှ်တှ်ေ ဟီုကၠုၚ်လဝ် ညးမအာတ်မိက်ညး သွက်ဂွံဆက်ယိုက်ဂၠေၚ် နဒဒှ်သမ္မတဂှ် နွံတၟာဂလိုၚ်ရ။
အတိုၚ်သၞောဝ်သ္ဇိုၚ်ဒက်ပ္တန်အမေရိကာန် မကလေၚ်ပလေဝ်လဝ် မရနုက်ကဵု ၂၂ ဝါဂှ်မ္ဂး ယြဴညးလဵုမွဲမှ အခေါၚ်ဂွံယိုက်ဂၠေၚ်လျိုၚ်သမ္မတ လ္တူၜါဝါဟွံမွဲပုဟ်ဂှ် ဖျေံစၟတ်လဝ်ရ။
ယဝ်ပြံၚ်လှာဲသၞောဝ်သ္ဇိုၚ်ဒက်ပ္တန်ဂှ်မ္ဂး သီုကၠတ်ထဝ်လ္တူ၊ သီုကၠတ်ထဝ်သၟဝ်ဂှ် ညးထံက်ဂလာန် ပ္ဍဲပိဂအုံ ၜါဂအုံနွံမှ ပြံၚ်လှာဲမာန်ဏောၚ် မဒှ်ရ။
သ္အာၚ်နူဂှ်ပၠန် ဒးကေတ်သီုပရေၚ်ထံက်ဂလာန် နူအလဵုအသဳကဆံၚ်တွဵုရး ပန်ဂအုံ ပိဂအုံမဒှ်ရ။
ညးထံက်ဂလာန်ထြာမ်ဂမၠိုၚ်ဂှ်တှ်ေ ပ္ဍဲသၞောဝ်သ္ဇိုၚ်ဒက်ပ္တန်ဂှ် တၚ်ဍိုန်လျနွံဒၟံၚ်တုဲ လုပ်ပြိုၚ်အာသွက်ကဆံၚ်သမ္မတ မရနုက်ကဵုပိဝါမာန်ဏောၚ်ဂှ် ဟီုဒၟံၚ်ရ။
Ref: BBC