ဘာအၚ်၊ မေ ၆
ဒပ်ကံၚ်ဇြဳပၞာန် ထောံဂြာတ်ကၠုၚ်မခတိုဟ် လ္တူရုၚ်ဂဥုဲပွိုၚ်တိုက်(ဖလံတောၚ်) မဒှ်ရုၚ်ဂဥုဲ ခါတ် ၁၆ မ မၞုံပ္ဍဲကွာန်(ဖလံတောၚ်) ပွိုၚ်ဍုၚ်ဘာအၚ် တွဵုရးကရေၚ်ဂှ် ဂွံတီကေတ် နူကဵုခရိုၚ်သဓီု KNU ရ။
တုဲကၠုၚ် ပ္ဍဲဂိတုမေ ၄ အခိၚ်ဗ္တံ ၜိုတ် ၁၁ နာဍဳဂှ် ဒပ်ကံၚ်ဇြဳပၞာန် ကၠုၚ်ထောံဏာလဝ်မခတိုဟ် ၜါမ လ္တူရုၚ်ဂဥုဲပွိုၚ်တိုက်(ဖလံတောၚ်) နကဵုက္ၜၚ်ကျာဂျက်ရ။
ဟိုတ်နူဒးဒုၚ်ထောံလဝ်မခတိုဟ် နကဵုက္ၜၚ်ကျာတုဲ မၞိဟ်ဇီုကပိုက်ကလိဂွံဝပ် ဟွံမွဲကီုလေဝ် စမြိုၚ်ရုၚ်ဂဥုဲ ကြပ်အလုံမွဲမ သရိုဟ်လီုအာဂှ် ပဒိုဝ်သဝ်အေနာၚ် ညးအုပ်ကာ ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ရုၚ်ဂဥုဲပွိုၚ်တိုက်(ဖလံတောၚ်) နွံပ္ဍဲတိဍာ်ထိၚ်ဒဝ် ဗော်သွးကောန်ဂကူကရေၚ် KNU ဂှ် အပ္ဍဲကာလသီအဝဵုဏံ ဒပ်ကံၚ်ဇြဳပၞာန် ပန်ဒၟံၚ်လွဟ်ဇၞော် မွဲဏှမွဲဏှဂှ်ရ ကၟာတ်ထောံလဝ် နူသၞာံ ၂၀၂၄ တုဲကၠုၚ်တေံရ။
လအာတုပ်သာ်ဂှ်ကီု ပ္ဍဲကဵုတ္ၚဲဂှ် အခိၚ်လဒေါဝ်တ္ၚဲ ၜိုတ် ၁၁ နာဍဳဂှ်လေဝ် ဒပ်ကံၚ်ဇြဳပၞာန် ထောံလဝ်မခတိုဟ် နူကဵုပၞာန်ကျာ ပ္ဍဲကဵုကွာန်(မိကျောၚ်းအိုၚ်) ပွိုၚ်ဍုၚ်ၜဳကလေၚ် တွဵုရးမန်ဂှ်တုဲ ဒတုံဗ္တိုဟ်ထ္ကးအာလဝ် ဗ္ဒါဲဘာလကျာ် ဥရုဝေလ ကဵု ကၠအ်ထၜိုတ်ညးဒေသတံဂှ်ကီုလေဝ် မၞိဟ်ဇီုကပိုက်ကလိဂွံဝပ်ဂှ် ဟွံမွဲရ။
ပ္ဍဲတိဍာ်ခရိုၚ်သဓီု KNU ပရေၚ်ပၞာန်ၜါလ္ပာ် မကလေၚ်ကြံၚ်မ္ၚိုဟ်ဒၟံၚ်ဂှ် စနူဂိတုတုဲကၠုၚ်တေံတုဲ ဒပ်ကံၚ်ဇြဳပၞာန် ဗ္တိုက်ကၠုၚ်ကဵုလွဟ်ဇၞော် ကေုာံ ဗ္တိုက်ကၠုၚ်ကဵုပၞာန်ကျာတံဂှ်တုဲ ညးဍုၚ်ကွာန်ကောန်အရာပ် ဇီုကပိုက်ချိုတ်အာ နွံဒၟံၚ်ရ။
အတိုၚ်စၟတ်သမ္တီ BNI-Myanmar Peace Monitor ဂှ်မ္ဂး စနူသၞာံ ၂၀၂၁ ဂိတုမာတ်ဂှ်တုဲ ဒပ်ကံၚ်ဇြဳပၞာန် စစကာကၠုၚ်ပၞာန်ကျာတုဲ နူဏံ အခိၚ်ကောန်ဒပ်ဂမၠိုၚ် ဗ္ဒိုပ်ဒပ်ဂမၠိုၚ် ဒးဆောံလေၚ်ဂၠိုၚ်ကၠုၚ်ဂှ် သ္ပပဓာန်ကၠုၚ်ကဵုပရေၚ်ဗ္တိုက်ပၞာန်ကျာ ဂၠိုၚ်ကၠုၚ်ရ။
မွဲဒမြိပ်ကာလသီအဝဵုဏံ စဵုကဵု ဂိတုဨပရဴ ၂၂ သၞာံဏံဂှ် လၟေၚ်ဒဒှ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ ထောံဂြာတ်ကၠုၚ်မခတိုဟ် ဂှ် ၂၀၉၀ ဝါပြၚ် နွံလဝ်တုဲ ညးဍုၚ်ကွာန်ကောန်အရာပ် ဗ္ဒါဲ ၂၁၅၀ တၠ ဒးချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု− KPSN