သဓီု၊ မေ ၆
ဒဒန်မိုဝ်ကံၚ် မဒးဒုၚ်ခတိုဟ်လဝ်မာၚ် မဒှ်ဒဒန်နွံလ္တူဂၠံၚ်ကွဳစက် လ္ဂုၚ်−မတ်မလီု နွံပ္ဍဲကဵုကွာန်မိုဝ်ကံၚ် ပွိုၚ်ဍုၚ်သဓီု တွဵုရးဍုၚ်မန်ဂှ် ဗဝ်တိတုဲ ကဵုလဝ်အခေါၚ်အာကၠုၚ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒဒန်မိုဝ်ကံၚ်ဝွံ ဂိတုမေ ၃ တုဲကၠုၚ်တေံ အခိၚ်ဗ္တံ ၜိုတ် ၁၁ နာဍဳပြၚ်ဂှ် ဒးဒုၚ်ခတိုဟ်ကၠုၚ်မာၚ် အလန်ဒုတိယတုဲဂှ် ဒဒန်မွဲတၞုၚ် ဇမၠိၚ်မၞုံ ၃၇ ပေ၊ သၠဲဍေံမၞုံ ၄၈ ပေ အလုံမွဲတၞုၚ် လီုသရိုဟ်စှ်ေအာ စဵုကဵုအာကၠုၚ်ဟွံဂွံရ။
ကြဴနူဒဒန်လီုအာတုဲဂှ် ပ္ဍဲဂိတုမေ ၄ တေံ ကံၚ်ဇြဳပၞာန် ဗဝ်တိဒဒန်ဂှ်တုဲ အခိၚ်ဇိုၚ်သဝ်တ္ၚဲဂှ်ရ ကဵုလဝ်အခေါၚ် ကွဳစက်ဇၞော်ဍောတ် အာကၠုၚ်တတ်ကၠောံလဝ်ရ။
ညးဒေသမွဲတၠဂှ်တှ်ေ ဒဒန်မိုဝ်ကံၚ် မသရိုဟ်လီုအာလဝ်ဂှ် ကံၚ်ဇြဳပၞာန် ဟွံထ္ပက်စုတ်ဒဒန်ဗေလဳမွဲသာ် စုတ်ပိုက်ဗဝ်တိတုဲ ကဵုလဝ်အခေါၚ်အာကၠုၚ် ပပ္တံနူကဵုကွဳစက်ဇၞော်ဇၞော်တံဂှ်ရောၚ် ဟီုရ။
“အကာဲအရာဒဒန်ဂှ် ပံက်အာယျလေဝ်။ နူဂိတုမေ ၄ အခိၚ်ဇိုၚ်သဝ်တ္ၚဲ ၄ နာဍဳဂှ်ရ။ ဟွံစုတ်လဝ်ဗေလဳပုဟ်။ စုတ်လဝ်ပိုက်။ တုဲတှ်ေ ကၟာတ်လဝ်နကဵုတိ၊ နကဵုတၟအ်ရ။ သီုကွဳစက်ဇၞော်ဇၞော်တံဂှ် သီုဖအိုတ် တတ်ဂွံမံၚ်ရ” သာ်ဝွံ သ္ဂးရ။
အခိၚ်ဒဒန်မိုဝ်ကံၚ် လီုဂှ် ကွဳစက်ဍောတ်တ်အာတရဴလ္ၚဵုတံဝွံ ဒးအာကၠုၚ်လဝ် နူကဵုဂၠံၚ်ကွာန် (ကျိုက္ကော်−ရွှေရောၚ်ပြ) မဒှ်ဂၠံၚ်ခရိုၚ်သဓီု−ၜဳကလေၚ်ဂှ်တုဲ ကွဳစက်ဇၞော်ဇၞော်လ္ၚဵုတံဂှ်တှ်ေ ဒးမၚ်လဝ်ရ။
ဒဒန်မိုဝ်ကံၚ်ဝွံ တုဲကၠုၚ်ဂိတုဖေဖဝ်ဝါရဳ ၂၈ သၞာံ ၂၀၂၄ တေံ ဒးဒုၚ်ဖံက်ခတိုဟ်လဝ်မာၚ် အလန်ပထမတုဲ သီုကဵုဒဒန်ဂှ်ကီု သီုသ္ၚိမွဲမကဵု ဗ္ဒမ်ဖျာလ္ၚဵု မၞုံပွဳပွူဗ္ဒါဲဂှ် လီုအာလဝ်ရ။
ဒဒန်မိုဝ်ကံၚ် ဒးဒုၚ်ဖံက်ခတိုဟ်မာၚ်ဂှ်ဝွံ နွံဒၟံၚ် လ္တူဂၠံၚ်ဇၞော် လ္ဂုၚ်−မတ်မလီုတုဲ သီုကဵုဒှ်ဂၠံၚ်အဓိက မပလံၚ်ဗစိုပ်ဗၞိက်ပၠောပ်၊ ဗၞိက်ပ္တိုန် ဒေသသ္ကုတ်သၠုၚ်ကျာရ။
ပရိုၚ်−သြၚ်လောန်တိုၚ်(မ်)
ဗီု− Social Media