နေဗျဳဒဝ်၊ မေ ၆
ဟိုတ်နူညးဍုၚ်ကွာန်ဍုၚ်ဗမာ နူအပ္ဍဲဍုၚ်၊ မ္ၚးဍုၚ်ဂမၠိုၚ် ထံက်ပၚ်ကၠုၚ်လဝ် နကဵုဇြဟတ်ပေၚ်ၚ်ဂှ်တုဲ ကဵုကၠုၚ်ဇြဟတ်ဓရိုဟ် ကုဒပ်ပၞာန် ဇြဟတ်မဇၞော်အိုတ်ဂှ်မာန်ရောၚ် သ္ကိုပ်ဝန်ဇၞော် အလဵုအသဳညဳသၟဟ်ဂကူ NUG ဟီုရ။
သ္ကိုပ်ဝန်ဇၞော်ကၟိန်ဍုၚ် မာန်ဝေန်ခိုၚ်တာန် ဟီုကၠုၚ်လဝ်ဂလာန် ပ္ဍဲတ္ၚဲစၟတ်သမ္တီ ဒက်ပ္တန်ဒပ်ပၞာန်စဵုဒၞါညးဍုၚ်ကွာန် (PDF) ဌာနဝန်ဇၞော်ကာစဵုဒၞါ NUG ပေၚ် ၄ သၞာံ ပ္ဍဲဂိတုမေ ၄ ဂှ်ရ။
အပ္ဍဲပွိုၚ်ပန်သၞာံဏံ ကောန်သ္ဂံၚ်ဂမၠိုၚ် ရေၚ်တၠုၚ်ကၠုၚ်ၜိုတ်ညာန်ဘာန်အစောံဇြဟတ်နွံ၊ သၠးပွးအေၚ်ဒုၚ်ကၠုၚ်၊ ဒုၚ်ဂိကၠုၚ်မာန်တံဂှ်ဝွံ သွက်ကၟိန်ဍုၚ်ဂှ် ဒှ်ဝၚ်စၟတ်သမ္တီမပတန်ကၠေံၚုဟ်မးဟွံမာန်ရောၚ် သ္ဂးရ။
ဟိုတ်နူညးဍုၚ်ကွာန်ဂမၠိုၚ် ထံက်ပၚ်ရီုဗၚ်ကဵုကၠုၚ်တုဲ ဒဵုကဵုတ္ၚဲဏံ ကဵုကၠုၚ်ဇြဟတ်ဓရိုဟ် လုပ်ကၠုၚ်ပေါဲဗ္တိုက် ကုဒပ်ပၞာန် ဇြဟတ်မဇၞော်အိုတ်ဂှ်မာန်တုဲ ပေါဲအံၚ်ဇၞး PDF တံဝွံ ဒှ်ပေါဲအံၚ်ဇၞးပၠန်ဂတး ပေါဲအံၚ်ဇၞးညးဍုၚ်ကွာန်တံရဂှ် သ္ကိုပ်ဝန်ဇၞော် ဟီုရ။
အတိုၚ်တၚ်နၚ် ဂကောံသုတေသနဗၠးၜးဂှ်မ္ဂး အပ္ဍဲပွိုၚ်မသီလဝ်အဝဵုဏံ ဒပ်ပံၚ်ကောံပၠန်ဂတးကောန်ဍုၚ်အရၚ် ပါလုပ်သီုကဵုဒပ်စဵုဒၞါညးဍုၚ်ကွာန် PDF တံ သီဂွံလဝ်ဍုၚ် ၉၀ ပြၚ်ရ။
ပ္ဍဲကဵုဏံ နူကဵုလဒေါဝ်ဍုၚ်ဗၟာ မပ္တံကဵုဍုၚ် (ခမ်းပတ်၊ မော်လူး၊ ရွှေပြည်အေး၊ မြို့သစ်၊ စဥ◌့်ကူး၊ တကောင်း၊ သပိတ်ကျင်း၊ ပင်လည်ဘူး) တံဂှ် PDF ကေုာံ ဒပ်ပံၚ်ကောံကောန်ဍုၚ်အရၚ်ဂမၠိုၚ် သီထိၚ်ဂွံလဝ်ရ။
စပ်ကဵုဒဒှ်ဏံတုဲ သ္ကိုပ်ဝန်ဇၞော် ဟီုကၠုၚ်လဝ် ဂလာန်တၚ်ဂုန် ကုဂကောံပၠန်ဂတးကောန်ဍုၚ်အရၚ်မဟာမိတ် မဒတူလိုၚ်ကၠုၚ်ကရောံ PDF တံကဵု ဒပ်စဵုဒၞါဒေသမဆေၚ်စပ်ဂမၠိုၚ်ရ။
ဒပ်ပၞာန်စဵုဒၞါညးဍုၚ်ကွာန် PDF ဝွံ အခိၚ်ပေၚ်ပန်သၞာံဏံ ဂွံဆဵုကေတ် ဒဒှ်ရဒက်ပ္တန်လဝ် နဒဒှ်ဒပ်ပၞာန်မဍိုက်ပေၚ်ကဵု အစောံစရာဲပၞာန်၊ အစောံစရာဲပရေၚ်စန်ဒက်၊ အစောံစရာဲပရေၚ်အုပ်ဓုပ်မွဲမာန်ဂှ်တုဲ ကေတ်တဴဂုန်စရာဲရောၚ် ညးသ္ဂးရ။
သ္အာၚ်နူဂှ်ပၠန် PDF ဝွံ အလုံဍုၚ်မွဲဂှ် ဒက်ပ္တန်လဝ်တိဍာ်ပရေၚ်ပၞာန်တုဲယျတုဲ ညံၚ်ဂွံဒှ်ဒပ်ပၞာန်ညးဍုၚ်ကွာန်မွဲ မဒက်ပ္တန်လဝ် ဗွဲမစှ်ေကဵုသၞောတ်ဂှ် ထ္မံက်ဒၟံၚ်ရုပ်ရဴရောၚ် သ္ကိုပ်ဝန်ဇၞော်ဂှ် ကဵုသမ္တီ ဟီုကၠုၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု− CJ