ဘာပန်၊ မေ ၇
ဒပ်ကံၚ်ဇြဳပၞာန် ပ္တိတ်ကၠုၚ်ဇြဟတ် သွက်ဂွံဗပေၚ်ဇြဟတ်ဒပ် ကေုာံ ကပေါတ်လွဟ်လက်နက်ဇွောံမ ဇရေၚ်ဗ္ဒိုပ်ဖျေံသ္ဇိုၚ် မသှ်ေသၟေဟ်ဒၟံၚ် ပ္ဍဲခရိုၚ်ဘာပန် တွဵုရးကရေၚ်ဂှ်တုဲ ပေါဲဗ္တိုက်ဆေၚ်မုက်ဂမၠိုၚ် က္တဵုဒှ်ဒၟံၚ် မွဲဏှမွဲဏှရောၚ် သ္ကိုပ်ဗိုလ်ဇၞော်သဝ်ကလာဒိုဝ် ညးမၞုံအခေါၚ်ဟီုဂး ဒပ်မဟာ ၅ KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သွက်ဗ္ဒိုပ်ဒပ် မသှ်ေသၟေဟ်ဒၟံၚ် ပ္ဍဲတိဍာ်ဒပ်မဟာ ၅ KNU ခရိုၚ်ဘာပန်ဂှ် ဒပ်ကံၚ်ဇြဳပၞာန် ကၠုၚ်ကဵုက္ၜၚ်ကျာတုဲ ဖျေံကဵုဒၟံၚ်လွဟ်လက်နက်မကမ်၊ ဂဥုဲဇဗ ကေုာံ ဇွောံမဂမၠိုၚ် အဆက်က်ရ။
အခိၚ်လၟုဟ်ဂှ်လေဝ် နူဍုၚ်ကမမံၚ် ခရိုၚ်ဘာပန် တွဵုရးကရေၚ်ဂှ်မွဲကဆံၚ် ကံၚ်ဇြဳပၞာန် ပ္တိတ်ကၠုၚ်ဇြဟတ် သွက်ဂွံထ္ပက်ကရောၚ်ပၞာန် ပ္ဍဲဒေသကတိုၚ်တိကီုလေဝ် ဟိုတ်နူဒပ်ပံၚ်ကောံပၠန်ဂတး ဒပ်မဟာ ၅ KNLA ကြတ်ဗ္တိုက်တာဒၞါလဝ်တုဲ ကရောၚ်ပၞာန်ဒပ်ကံၚ်ဇြဳပၞာန် ဒးကလေၚ်ဆုတ်အာလဝ်ရ။
ကောန်ဒပ်ကံၚ်ဇြဳပၞာန် ဖျေံဒပ်မံၚ်ဒၟံၚ် ဇရေၚ်ဗ္ဒိုပ်တြေံ တမ်ဒပ် BGF စၟတ် ၁၀၁၃ မၞုံပ္ဍဲကွာန်ကတိုၚ်တိ နူကဵုသ္ကုတ်ဂၠံၚ် ကမမံၚ်−ဘာပန်ဂှ် ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ကၟာတ်လဒဵုလဝ် ပွိုၚ်ပိဂိတုပြၚ်ကၠုၚ်တုဲ သွက်ဂွံကဵုပၞာန်အရီု ဇရေၚ်ကောန်ဒပ် ဒးဒုၚ်ကၟာတ်လဝ်တံဂှ် ဒပ်ကံၚ်ဇြဳပၞာန် ဂ္စါန်ကၠုၚ်ဒၟံၚ် မွဲဏှမွဲဏှရ။
သွက်ဂွံကဵုပၞာန်အရီု ဇရေၚ်ဒေသကတိုၚ်တိ သာ်ဏံမာန်ဂှ်လေဝ် ဒပ်ကံၚ်ဇြဳပၞာန် ပကောံလဝ်ကရောၚ်ပၞာန်ဂမၠိုၚ်တုဲ နူဍုၚ်ကမမံၚ်ဂှ် မွဲဏှမွဲဏှ ချဳဒရာၚ်ဒၟံၚ်ပရေၚ်ပၞာန် ထ္ပက်ဒၟံၚ်ကရောၚ်ပၞာန် လ္ပာ်ကတိုၚ်တိဂှ်တုဲ ပေါဲဗ္တိုက်ဆေၚ်မုက် ကုဒပ်ပံၚ်ကောံပၠန်ဂတး ဒပ်မဟာ ၅ KNLA ဂှ်လေဝ် ဒှ်မံၚ်အဆက်က်ရ။
ဒပ်ကံၚ်ဇြဳပၞာန် ချဳဒရာၚ်ကၠုၚ်ပရေၚ်ပၞာန် ထ္ပက်ကၠုၚ်ကရောၚ်ပၞာန်ကီုလေဝ် ဟိုတ်နူဒပ်ပံၚ်ကောံပၠန်ဂတး ဒပ်မဟာ ၅ KNLA ဂမၠိုၚ် ကြတ်ဗ္တိုက်ကၠုၚ်တုဲ ဆက်အာဂတဟွံဂွံတုဲ ကရောၚ်ပၞာန်ဒပ်ကံၚ်ဇြဳပၞာန် ဂွံစိုပ်ကၠုၚ်ဒေသကတိုၚ်တိဂှ်လေဝ် ဒှ်ဟွံမာန်ပုဟ်ဂှ် သ္ကိုပ်ဗိုလ်ဇၞော် သဝ်ကလာဒိုဝ် ဟီုလဝ်ရ။
သ္အာၚ်နူဂှ်ပၠန် ဇရေၚ်ဗ္ဒိုပ်ဒပ် မတန်တဴဒၟံၚ် အကြာဒပ်မဟာ ၅ ကဵု ဒပ်မဟာ ၃ နူဒိုဟ်ဗာယပ်ဍုၚ်ဘာပန်ဂှ် ဒပ်ကံၚ်ဇြဳပၞာန် ပ္တိတ်ဒၟံၚ်ဇြဟတ် သ္ဂောံဗပေၚ် ကပေါတ်ဇွောံမ မကမ်လွဟ်လက်နက်သၟးဟွံက ဗပေၚ်ဒၟံၚ်သီုကဵုဇြဟတ်မၞိဟ်တံဂှ်တုဲ ကဵုဒပ်ပံၚ်ကောံပၠန်ဂတး ဒပ်မဟာ ၅ KNLA ဂှ်လေဝ် ဒှ်ဒၟံၚ်ပေါဲဗ္တိုက် မွဲဏှမွဲဏှရောၚ် သ္ဂးရ။
အတိုၚ် KNU ဗဟဵု လလောၚ်ပ္တိတ်လဝ်ပရိုၚ် ပ္ဍဲဂိတုမေ ၅ တေံဂှ်မ္ဂး အပ္ဍဲဂိတုဨပရဴ ပွိုၚ်မွဲဂိတုတုဲကၠုၚ်တေံ ပ္ဍဲခရိုၚ်ဘာပန်ဂှ် အကြာဒပ်ကံၚ်ဇြဳပၞာန်ကဵု ဒပ်မဟာ ၅ KNLA တံ ဒှ်လဝ်ပေါဲဗ္တိုက် ၁၃၀ ဝါပြၚ်တုဲ လ္ပာ်ဒပ်ကံၚ်ဇြဳပၞာန်ဂှ် ကဆံၚ်သ္ကိုပ်ဗိုလ် ၂ တၠ မပါလုပ် ဗ္ဒါဲ ၄၀ တၠ ချိုတ်အာလဝ်တုဲ ၅၀ တၠပြၚ် ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ