နေဗျဳဒဝ်၊ မေ ၇
ကၠာဟွံဂွံစလၟေၚ်တရဴအာဍုၚ်ရုယှာ က္ဍိုပ်သ္ကိုပ်ပၞာန်ကေုာံကောန်ဂကောံဂမၠိုၚ်ဂှ် ပပဵုပ္တိုန်လဝ်အာယုက်ကာလဒေါအ်ပန်ပှော် စဵုကဵုဂိတုမေအိုတ်ရောၚ် ရုၚ်သ္ကိုပ်က္ဍိုက်ပ်ကာစဵုဒၞါ လလောၚ်ပ္တိတ်လဝ်ပရိုၚ် ပ္ဍဲဂိတုမေ ၆ တေံရ။
နကဵုတၚ်ရန်တၟံ သ္ဂောံရေၚ်တၠုၚ် ကမၠောန်ကလေၚ်ဖျေံဒၞါဲဝါဲ ကဵုအသိၚ်အလိုန် ပ္ဍဲဒေသဒးဘဲတိချဳတံမာန်ဂှ်တုဲ ထပ်ပပဵုပ္တိုန်လဝ်ကာလဒေါအ်ပန်ပှော် နူဂိတုမေ ၆ စဵုကဵုဂိတုမေ ၃၁ ရ။
အခိၚ်ကာလလၟုဟ် ဒၟါနူဘဲတိချဳတုဲ ဌာနရုၚ်အလဵုအသဳဂမၠိုၚ်၊ ပိုန်ဒြပ်လမျီုညးဍုၚ်ကွာန်ကေုာံ ဂၠံၚ်ဍာန်ဆက်စၠောံဂမၠိုၚ် မ္ဒးလီုလာ်ဆောံလေၚ်အာတံ၊ ဟိုတ်နူကၠောန်ဒၟံၚ် ကမၠောန်ပရေၚ်သိုၚ်ခၞံဂမၠိုၚ်ဂှ်တုဲ ပပဵုပ္တိုန်လဝ် ကာလဒေါအ်ပန်ပှော်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ်တှ်ေ နကဵုက္ဍိုပ်သ္ကိုပ်ပၞာန် မအာစိုပ်ဍုၚ်ရုယှာဂှ် ဆဵုဂဗအာ ကုဍုၚ်ကြုက် ကေုာံ က္ဍိုပ်သ္ကိုပ်ဍုၚ်ဇြဟတ်ဇၞော်ဂမၠိုၚ်ဏောၚ်တုဲ သွက်ဂွံဒုၚ်ဂုန်ဇအ်သဝ်ကုဍာ်ရမတ်ဂှ် ပပဵုပ္တိုန်လဝ်ကာလဒေါအ်ပန်ပှော် အခိၚ်မစုက်ကဵုလၟေၚ်တရဴအာစိုပ်ဍုၚ်ရုယှာဂှ်ရောၚ် သ္ၚဳဂၠိပ်လဝ်ရ။
“ထပ်ပပဵုပ္တိုန်လဝ်ဂှ်တှ်ေ ဆက်စပ်ဒၟံၚ် ကုလၟေၚ်တရဴရုယှာ က္ဍိုပ်သ္ကိုပ်ပၞာန် မေန်အံၚ်လှာၚ်ဂှ်ကီုဏောၚ်။ ညးဒးဆဵုအာ ကုက္ဍိုပ်သ္ကိုပ် ဍုၚ်ဇြဟတ်ဇၞော်ဂမၠိုၚ် ၜိုတ် ၂၀ ဍုၚ်ပြၚ် ပါလုပ်သီုကဵုဍုၚ်ကြုက်ဂှ်ဏောၚ်ဟီုတှ်ေ ဒေါအ်လဝ်ပန်ပှော်ရ။ ဆ္ဂး လ္ပာ်ဇြဟတ်ပၠန်ဂတးတအ် ဆက်တိုန်ကၠုၚ်တုဲ ပရေၚ်ဒိဓဗတ်ဂှ် နွံဒၟံၚ်ဖိုဟ်။ ဒှ်ဒၟံၚ်အကာဲအရာ ပ္တိတ်ထ္ၜးဍာ်ရမတ် ဒဒှ်ရဒပ်ပၞာန်ညးတံ ဒးဆေၚ်ဒၟံၚ်မုက်သာ်ဏံဂှ်။ လ္ပာ်ဍေံတံ ဒဒှ်ရဒေါအ်လဝ်ပန်ပှော်မွဲလ္ပာ်လၟိုန်ဂှ် မိက်ဂွံဟီုတုဲ၊ ဗီုဍေံဂွံဒှ်ဂှ်တှ်ေ ဂွံတြဴတ္ၚဲတုဲ တ္ၚဲယး သီုဗြဴတြုံသီုၜါ အာညးသ္ကအ်ရဏောၚ်။ စုက်ကဵုအာဂှ် မိက်ဂွံဟီုအရေဝ်သာ်ဏံတုဲ ပပဵုပ္တိုန်လဝ်ကာလဒေါအ်ပန်ပှော်ရောၚ် ညာတ်ကေတ်ရ” သာ်ဝွံ သ္ဂးရ။
ဟိုတ်နူကသဳတိ ဇၞော်ကဵုဇြဟတ် မချဳအာလဝ် ပ္ဍဲဍုၚ်ဗၟာသ္ကုတ်လဒေါဝ်ဂှ်တုဲ သွက်ဂွံကၠောန်ကမၠောန်ရီုဗၚ်ဟံၚ်ပြာ် ကေုာံ သွက်ဂွံကလေၚ်ဖျေံဒၞါဲဝါဲတံဂှ် ကံၚ်ဇြဳပၞာန် ပပဵုပ္တိုန်လဝ်ပရေၚ်ဒေါအ်ပန်ပှော် နူဂိတုဨပရဴ ၂ စဵုကဵုဂိတုဨပရဴ ၃၀ ရ။
ဍုၚ်မလေဝ်ယှာ မဒှ်ဥက္ကဌဒးအလန် အာဇြဳယာန်ဂှ်လေဝ် ပ္ဍဲဂိတုဨပရဴ ၃၀ ဂှ် ဖ္တိုက်ဖ္အောဝ်လဝ်ကံၚ်ဇြဳပၞာန် သွက်ဂွံပပဵုပ္တိုန်ကာလဒေါအ်ပန်ပှော်ကီုလေဝ် ပ္ဍဲဂိတုမေ ၁ ဂှ် လ္ပာ်ကံၚ်ဇြဳပၞာန် ဟွံပပဵုပ္တိုန်လဝ်ရ။
ဟိုတ်နူသမ္မတရုယှာ ကော်ဘိက်ကၠုၚ်တုဲ ခြာဟွံလအ်ဏံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် သ္ဂောံတိုန်စိုပ်အာ အသေအဟာန်ပေါဲအံၚ်ဇၞး ပေါဲပၞာန်မဟာညးဆာန်ဂကူ ၁၉၄၁−၁၉၄၅ ပေၚ် (၈၀) သၞာံ ပ္ဍဲဍုၚ်မဝ်သကိုဝ် ကရောံသမ္ဘာညး နွံရ။
ပ္ဍဲဂိတုမေ ၅ ဂှ် လ္ပာ်ကံၚ်ဇြဳပၞာန် လလောၚ်ပ္တိတ်ကၠုၚ်ပရိုၚ် ဒဒှ်ရဆဵုဂဗသဳကၠဳအာ ကုက္ဍိုပ်သ္ကိုပ်ကၟိန်ဍုၚ် မတိုန်စိုပ်ကၠုၚ်အသေအဟာန်ဂှ်ဂမၠိုၚ် ဗွဲတၞဟ်ခြာဏောၚ်တုဲ တ္ၚဲယးဂတဂှ် ပပဵုပ္တိုန်ကၠုၚ်အာယုက်ကာလဒေါအ်ပန်ပှော် ဗွဲယာယဳ သာ်ဏံရ။
အပ္ဍဲကာလဒေါအ်ပန်ပှော်ဏံ နကဵုဂကောံရပ်လွဟ်ကောန်ဍုၚ်အရၚ်ဂမၠိုၚ်မပါလုပ် ဂကောံရပ်လွဟ်တၞဟ်သ္အာၚ်ဂမၠိုၚ် ယဝ်ဗ္တိုက်ကၠုၚ် ဗ္ဒိုပ်ဒပ်ဂမၠိုၚ်၊ ပကောံကၠုၚ်ဇြဟတ်၊ ပလေဝ်ပလေတ်ကၠုၚ်တုဲ ပကောံဒပ်၊ သၠဲတိဍာ်မ္ဂး နကဵုဒပ်ပၞာန် ခၠေဝ်ပၠန်အာဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဗိုလ်ဇၞော်ဇြေန်ယဝ် သ္ၚဳဂၠိပ်လဝ်ဂှ်တှ်ေ နကဵုဒပ်ကံၚ်ဇြဳပၞာန် ၜိုန်ဒေါအ်ပန်ပှော်ကီုလေဝ် ဒဒှ်မထောံမံၚ်မခတိုဟ် နူကဵုပၞာန်ကျာဂှ် ဒေါအ်အာဟွံသေၚ်တုဲ ဒဒှ်မထ္ပက်ဒၟံၚ်ကရောၚ်ပၞာန် ပ္ဍဲဗလးတိဏံဂှ်လေဝ် ဒေါအ်အာဟွံသေၚ်ပုဟ်ဂှ် ဟီုရ။
“အခိၚ်ကာလဒေါအ်လဝ်ပန်ပှော်ဏံဂှ်လေဝ် ဍေံတံ ဒေါအ်လဝ်လ္ပာ်ပန်ဂှ်သၟးရ။ ဗီုညးအရာပ်တံဟီုမံၚ် ပရေၚ်မထောံဂြာတ်မံၚ်ဂှ်တှ်ေ ဟွံဒေါအ်ပုဟ်။ ပ္ဍဲဗလးတိဏံဂှ်လေဝ် ထ္ပက်ကရောၚ်ပၞာန်ချဳဒရာၚ်ဒၟံၚ်ဂှ် ဟွံဒေါအ်ပုဟ်။ ညအ်ဂှ် ဆၜိုတ်တၚ်လလောၚ်တြးမွဲရဏောၚ်။ ပ္ဍဲကဵုပွိုၚ်ဍုၚ် TNLA ထိၚ်ဒက်လဝ် ၁၂ ပွိုၚ်ဍုၚ်ဂှ် ဗ္တိုက်ကဵုပၞာန်ကျာတံ နွံကၠုၚ်မံၚ်ဏီဟာဟီုဂှ် ဒးမၚ်ရံၚ်မံၚ်ဏီဏောၚ်။ ပ္ဍဲကဵုဒေသသှ်ေဒၟံၚ် ဒေသသက်ကိုၚ်၊ မဂွဵု၊ ဗဂေါ၊ (မြစ်ဝကျွန်းပေါ်) တံဂှ်ကီု ဒၞါဲဒေသပရေၚ်ဆေၚ်မုက်နွံဒၟံၚ်တံဂှ်ကီု ပရေၚ်ဗ္တိုက်ကဵုပၞာန်ကျာဂှ် ဒေါအ်အာဟွံသေၚ်ပုဟ်ဂှ် အဲညာတ်ကေတ်ရ။ ပ္ဍဲကဵု TNLA အာတ်မိက်လဝ် သွက်ဂွံဒေါအ်ကဵုပရေၚ်ဗ္တိုက်ပၞာန်ကျာဂှ် ဒေါအ်ကဵုဟာဟီုဂှ် ပိုယ်တံ ဒးမၚ်ရံၚ်အာဏောၚ်” သာ်ဝွံ သ္ဂးရ။
အတိုၚ်စၟတ်သမ္တီ BNI-Myanmar Peace Monitor ဂှ်မ္ဂး အပ္ဍဲကာလဒေါအ်ပန်ပှော် လ္ပာ်ကံၚ်ဇြဳပၞာန် မလလောၚ်တြးလဝ် နူဂိတုဨပရဴ ၂ စဵုကဵု ဂိတုဨပရဴ ၂၂ ဂှ် လၟေၚ်ဒဒှ်ထောံလဝ်မခတိုဟ် နူကဵုပၞာန်ကျာ ပ္ဍဲကဵုပွိုၚ်ဍုၚ် ၄၀ ပွိုၚ်ဍုၚ်ဂှ် နွံကၠုၚ်လဝ် ၇၁ ဝါတုဲ ညးဍုၚ်ကွာန်ဒေသ ၁၁၈ တၠ လမျီုဒးအိုတ်အာလဝ်ရ။
အပ္ဍဲကာလဒေါအ်ပန်ပှော်ဏံ ပါဲနူရးလ္ဂုၚ်တုဲ ပ္ဍဲရးဒေသကေုာံ တွဵုရး မသှ်ေသၟေဟ်ဂမၠိုၚ် ကံၚ်ဇြဳပၞာန် ဆက်ကလိလောန်ဒၟံၚ် ပရေၚ်ဗ္တိုက်ကဵုပၞာန်ကျာ အရိုဟ်ဒဒှ်တ္ၚဲတုဲ ရးမာန္တလေဝ်ကေုာံရးသက်ကိုၚ် မဒးလဝ်ဘဲတိချဳ သ္ကာတ်မြဟ်အိုတ်တံဂှ်ဝွံ ဒှ်ဒေသဒးဒုၚ်ကၠုၚ်ဂၠိုၚ်အိုတ်ရောၚ် သ္ဂးရ။
ဟိုတ်နူအကာဲအရာတံဏံဂမၠိုၚ်တုဲ နကဵုဥက္ကဌအာဇြဳယာန်ကီု ဂကောံအလဵုအသဳဍုၚ်သ္အာၚ်ဂမၠိုၚ်ကီု ဒုၚ်တၠုၚ်တၚ်လလောၚ်တြးဒေါအ်ပန်ပှော်ကံၚ်ဇြဳပၞာန်တုဲ ပြဝအဆက်လက္ကရဴတံဂှ်လေဝ် သွက်ဂွံမၚ်ရံၚ်အာဂှ် BNI-Myanmar Peace Monitor ထံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− SAC Telegram