ဝါယှေန်တာန်၊ မေ ၇
ပ္ဍဲဂိတုမေ ၅ တေံ အမေရိကာန် တပ်ဒဏ်ကၟာတ်လဒဵုကၠုၚ် ကုက္ဍိုပ်သ္ကိုပ်ဒပ်ကောန်ဂကူကရေၚ် KNA သဝ်ချေတ်တူ ကဵု ကောန်ညးၜါတၠ သ္ပဟိုတ်နူပရေၚ်လီဠာန်လ္တူလပှ်ကျာ၊ ပရေၚ်သွံရာန်မၞိဟ် ကေုာံ ပရေၚ်သွံရာန်ဓလုက် ၜက်ကၠောံပယျဵုတံဂှ်ရောၚ် ဌာနဝန်ဇၞော်ပရေၚ်ဘဏ္ဍာ ဟီုရ။
သဝ်ချေတ်တူ က္ဍိုပ်သ္ကိုပ်ဒပ်မၚ်ပယျဵု BGF ကၠာတေံဂှ်ဝွံ ဒှ်ပူဂဵုပၟိက်ဇၞော်မွဲ ပ္ဍဲကဵုကမၠောန်ကျဖျ စွံပွန်တုဲလီဠာန်ဒၟံၚ် ကောန်ဍုၚ်အမေရိကာန်တံဂှ်ရောၚ် ဌာနဝန်ဇၞော်ပရေၚ်ဘဏ္ဍာအမေရိကာန် ဟီုရ။
မွဲၜါသၞာံဏံ ဂိုန်ရာဇဝတ်ဂမၠိုၚ် တံၚ်ရပ်ကၠုၚ်မၞိဟ်ဂၠိုၚ်ကဵုလ္ၚီ နူဒေသအာယှဒိုဟ်အဂၞဲဏံဂှ်တုဲ စကာကၠုၚ်ဒၟံၚ်ပ္ဍဲကမၠောန်ကျဖျ ဗွဲအတေၚ်အဓမ္မရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် ကုလသမဂ္ဂရ။
လ္တူသဝ်ချေတ်တူ မပြံၚ်လှာဲဒက်ပ္တန်လဝ် BGF နဒဒှ်ဒပ်ကောန်ဂကူကရေၚ် KNA ဂှ် ကေတ်လဝ်အရေဝ်ကၟာတ်လဒဵုလဝ်ရောၚ် ဌာနဝန်ဇၞော်ပရေၚ်ဘဏ္ဍာအမေရိကာန် သ္ဂးရ။
ကောန်ဗၠာဲညးၜါတၠ မၞုံယၟု ထူအေဝ်မူကဵု သဝ်ချေတ်တ်တံဂှ်လေဝ် ဒဒှ်ရကၟာတ်လဒဵုကေတ်လဝ်အရေဝ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဌာနဝန်ဇၞော်ဂှ်ရ။
ပိုန်ဒြပ်ညးတံ နွံဒၟံၚ်ပ္ဍဲအမေရိကာန်တံဂှ် ဒးဒုၚ်သီဏောၚ်တုဲ ကုကောန်ဍုၚ်အမေရိကာန်တံဂှ်လေဝ် ပံၚ်တောဲကၠောန်ပရေၚ်ပိုန်ဒြပ် ဟွံဂွံရပုဟ်ဂှ် ချူလဝ် ပ္ဍဲတၚ်လလောၚ်တြးဂှ်ရ။
ဗျိတိၚ် ကေုာံ သမဂ္ဂယူရောပ်လေဝ် တပ်ဒဏ်ကေတ်လဝ်အရေဝ် လ္တူသဝ်ချေတ်တူရ။
BGF/KNA ဝွံ စွံလဝ်ဌာန်ဂအုပ်ညးတံ ပ္ဍဲဒေသပရေၚ်ပိုန်ဒြပ်တၟေၚ်ယှိုဲကုက္ကိုဝ် နွံမွဲဒမြိပ်ပယျဵုသေံ−ဗၟာဂှ်တုဲ ကေတ်ကဵုဒၟံၚ်ဂီုကၠီု သွက်စမြိုၚ် မစကာလဝ်ကမၠောန် ကုညးမတံၚ်ရပ်နၚ်တံဂှ်ရ။
ညံၚ်ရဴကမၠောန် BGF/KNA တံ မကၠောန်ဒၟံၚ်ဂှ်ကီု ဂိုန်လီဠာန်မၞိဟ် လ္တူလပှ်ကျာတံဝွံ လၟေၚ်သၞာံ ဂၠါဲကဵုဒၟံၚ်ဒဝ်ဠာ ဂၠိုၚ်ကဵုဗဳလျာန် သွက်က္ဍိုပ်သ္ကိုပ်ဂိုန်ရာဇဝတ်ဂမၠိုၚ် ကေုာံ သွက်မၞိဟ်မကၠောန်ကလောန်မွဲစွံ ကုညးတံဂှ်ရောၚ် အထံက်ဝန်ဇၞော်ပရေၚ်ဘဏ္ဍာ အမေရိကာန် မိုက်ဂဴ ဖဝ်ကာန်ဒါ ဟီုလဝ်ရ။
Ref: Reuters