သဓီု၊ မေ ၇
ကံၚ်ဇြဳပၞာန် မပပဵုပ္တိုန်လဝ်အာယုက်ကာလဒေါအ်ပန်ပှော်ဂှ်ဝွံ ဆက်ထောံမံၚ်မခတိုဟ် နူကဵုပၞာန်ကျာ ပ္ဍဲကဵုကွာန် မၞုံအပ္ဍဲခရိုၚ်သဓီုတံဂှ်ရောၚ် ဂွံတီကေတ် နူကဵုခရိုၚ်သဓီု KNU ရ။
ဟိုတ်နူဘဲတိချဳတုဲ သွက်ဂွံကလေၚ်ရေၚ်တၠုၚ်ပရေၚ်ဖျေံဒၞါဲဝါဲတံဂှ် ပပဵုပ္တိုန်လဝ်အာယုက်ကာလဒေါအ်ပန်ပှော် နူဂိတုမေ ၆ စဵုကဵုဂိတုမေ ၃၁ ရောၚ် ရုၚ်က္ဍိုက်ပ်ကာစဵုဒၞါကံၚ်ဇြဳပၞာန် ပ္တိတ်လဝ်ပရိုၚ်ရ။
ဆ္ဂး ပ္ဍဲဂိတုမေ ၆ အခိၚ်နူဂယးဂှ်ရ ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် လျိုၚ်ပံၚ် ၃၀၀ ပ္ဍဲကဵုခရိုၚ်သဓီု ပွိုၚ်ဍုၚ်ကျာ်ထဝ် ကွာန်(ၚှက်ပျောတော) ကဵု ပွိုၚ်ဍုၚ်ၜဳကလေၚ် ပ္ဍဲကဵုကွာန်(တောၚ်သူစု) ရ။
အပ္ဍဲပရေၚ်ထောံမခတိုဟ်ဏံဂှ် မၞိဟ်ဂွံဝပ်ချိုတ်အာ ဟွံမွဲကီုလေဝ် ဒဒန်ဂၠံၚ်လ္ၚဵု ကေုာံ တၞံဆုတၞံဒုန်သၞေဝ်ကေဝ် နူကဵုကၠအ်ညးဒေသတံ ဒးအာလဝ်ရောၚ် ညးအုပ်ကာ ခရိုၚ်သဓီု ဗော်သွးကောန်ဂကူကရေၚ် KNU ပဒိုဝ်သဝ်အေနာၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပရေၚ်ဒပ်ကံၚ်ဇြဳပၞာန် မဗ္တိုက်ထောံကၠုၚ်မခတိုဟ်ဂှ်ဝွံ ဒှ်ပရေၚ်စွံပွန်ဗ္တိုက် လ္တူကွာန် ညးဍုၚ်ကွာန်ကောန်အရာပ်ဂမၠိုၚ် မမံၚ်တန်တဴဒၟံၚ်တံ နကဵုတၚ်ရန်တၟံနွံနွံရောၚ် သ္ဂးရ။
ပ္ဍဲဂိတုမေ ၄ တုဲကၠုၚ်တေံဂှ်လေဝ် ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ်ၜါမ နကဵုက္ၜၚ်ကျာဂျက်ဖိုက်တာ ပ္ဍဲကဵုကွာန်မိချံၚ်အိုၚ် ပွိုၚ်ဍုၚ်ၜဳကလေၚ်ဂှ်တုဲ တၞံထၜိုတ် ဗ္ဒါဲ ၅၀ တၞံ၊ စမြိုၚ်ဘာလကျာ်လ္ၚဵု လီုအာလဝ်ရ။
အပ္ဍဲခရိုၚ်သဓီု တွဵုရးဍုၚ်မန်ဂှ် စနူဂိတုဨပရဴတုဲကၠုၚ်တေံတုဲ ဟိုတ်နူဒပ်ကံၚ်ဇြဳပၞာန် ဗ္တိုက်ကဵုလွဟ်ဇၞော် ကေုာံ ပၞာန်ကျာတံဂှ်တုဲ ညးဒေသမွဲဠက်ပြၚ် ဒးပါဲဒၟံၚ်ဘဲပၞာန်တုဲ နွံပၟိက်ဒၟံၚ်ကဵုအရီုဗၚ်ဇွောံမစၞစဂမၠိုၚ်ရောၚ် ဂွံတီကေတ် နူကဵုခရိုၚ်သဓီု KNU ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ