ကြုၚ်ဒဵု၊ မေ ၈
ကရောၚ်ပၞာန်ကံၚ်ဇြဳပၞာန် သၟဝ်တဲၝောံဒပ် ၂၂ မကၠုၚ်ကဵုအရီုဗၚ်ပၞာန် ဗ္ဒါဲဍုၚ်ကြုၚ်ဒဵု တွဵုရးကရေၚ် ပ္ဍဲဂိတုမေအခိၚ်ပြဟ်ဟ်တေံဂှ် ဟိုတ်နူဒးဒုၚ်ကၟာတ်လဒဵု ဒးဒုၚ်ဗ္တိုက်လဝ်တုဲ ကရောၚ်ပၞာန်ဝွံ ဒးဂိတုဲ ဒးကလေၚ်ဆုတ်အာလဝ်ရောၚ် တမ်ရိုဟ်ပရိုၚ်ပရေၚ်ပၞာန် မကြပ်ကဵုဒပ်ပၠန်ဂတးဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုပေါဲဗ္တိုက်ကအ်ကြိက်၊ ကြုၚ်ဒဵု တွဵုရးကရေၚ် ဒၞါဲပေါဲဗ္တိုက်သ္ကာတ်မြဟ်ဒၟံၚ် ပွိုၚ် ၂၀ တ္ၚဲပြၚ်ဂှ် သွက်ဂွံပလံၚ်ဗစိုပ်ပၞာန်အရီုဂှ် တုဲကၠုၚ်ဂိတုဨပရဴကြပ်အိုတ်တေံ ကရောၚ်ပၞာန်ကံၚ်ဇြဳပၞာန် ၂ ပါလုပ်သီုကဵုၝောံဒပ် ၂၂ ဂှ်ဝွံ ပ္တဝ်ကၠုၚ်က္ဍိုပ် လ္ပာ်ကွာန်ဂမၠိုၚ် မၞုံဗ္ဒါဲဍုၚ်ကအ်ကြိက်ဂှ်တုဲ ထ္ပက်ကရောၚ်ပၞာန်စိုပ်ကၠုၚ်ရ။
ဂကောံဇြဟတ်ပၠန်ဂတး KNLA တံ ဗိုၚ်ဗ္တိုက်လဝ် ကရောၚ်ပၞာန်ဂှ်တုဲ လ္ပာ်ဒပ်ကံၚ်ဇြဳပၞာန်ဂှ် သီုကဆံၚ်သၞာဲဒဴ မပါလုပ် ဟွံအောန်နူ ၃၀ တၠ ဒးချိုတ်အာလဝ်တုဲ သီဂွံလဝ် မကမ်လွဟ်လက်နက်ဗွဲမဂၠိုၚ်ဂၠေၚ်ရောၚ် တမ်ရိုဟ်ပရိုၚ်ပရေၚ်ပၞာန် မစုက်လုက်ကဵုဒပ်ပၠန်ဂတးဂမၠိုၚ် ကဵုလဝ်သမ္တီရ။
သွက်ဂွံကလေၚ်သီ သ္ကုတ်ဂၠံၚ်ကအ်ကြိက်−ကြုၚ်ဒဵုဂှ်ကီု ညံၚ်ဍုၚ်ကြုၚ်ဒဵု ဂွိုအ်ဒးဒုၚ်သီဂှ်ကီု စနူဂိတုဨပရဴကြပ်အိုတ်တေံဂှ်တုဲ နကဵုဇြဟတ်လၟိဟ်ဗွဲမဂၠိုၚ်ဂၠေၚ် ဒပ်ကံၚ်ဇြဳပၞာန် စိုပ်ကၠုၚ်ပ္ဍဲဒေသဂြာၚ် ပွိုၚ်ဍုၚ်ဘာအၚ် ဗ္ဒါဲဍုၚ်ကြုၚ်ဒဵုတုဲ ဖျေံလဝ်ဒပ်ရ။
ပ္ဍဲပေါဲဗ္တိုက် ကအ်ကြိက် ကြုၚ်ဒဵု စကၠုၚ်လဝ် ပ္ဍဲဂိတုဨပရဴ ၁၄ တုဲကၠုၚ်တေံဂှ် ဂကောံဇြဟတ်ပၠန်ဂတး KNLA တံ သီဂွံလဝ် ဗ္ဒိုပ်ကၚ်စဵုဒၞါ ကေုာံ ဗ္ဒိုပ်သၞေဟ်ကၚ် ဒပ်ကံၚ်ဇြဳပၞာန်တံဂှ်တုဲ ဗ္တိုက်ဒၟံၚ်ဌာန်ဂအုပ်တမ်ဒပ်ဂမၠိုၚ် ပါလုပ်သီုကဵုကရောၚ်ပၞာန်အံၚ်ဇေယျဂှ်လေဝ် ဂွံတီကေတ်ရ။
ပ္ဍဲကအ်ကြိက် ကြုၚ်ဒဵု လအ်ကၠုၚ်ပွိုၚ် ၂၀ တ္ၚဲပြၚ်ဂှ် လ္ပာ်ဒပ်ကံၚ်ဇြဳပၞာန် ဇီုကပိုက်ချိုတ်ကလိဂွံဝပ် ဂၠိုၚ်တုဲ လ္ပာ်ဒပ်ပံၚ်ကောံပၠန်ဂတးတံဂှ်လေဝ် ပရေၚ်ဇီုကပိုက်ပြဟ်လလုဲအာ နွံညိညဂှ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် ကဵုလဝ်သမ္တီရ။
ပ္ဍဲကဵုပေါဲဗ္တိုက်ဂမၠိုၚ် ဒပ်ကံၚ်ဇြဳပၞာန် မ္ဒးဂိလဝ်ဂှ် ဟိုတ်နူဗ္တိုက်ကၠုၚ်ကဵုလွဟ်ဇၞော် ကေုာံ ဗ္တိုက်ကၠုၚ်ကဵုပၞာန်ကျာ ပ္ဍဲကွာန် ဒၞါဲညးဍုၚ်ကွာန်ကောန်အရာပ်ဂမၠိုၚ် မမံၚ်တန်တဴဂှ်တုဲ ညးဍုၚ်ကွာန် ၂၀ တၠပြၚ် ချိုတ်အာလဝ်တုဲ ၃၀ တၠပြၚ် ကလိဂွံဝပ်တုဲ လၟိဟ်မၞိဟ်ဗ္ဒါဲမွဲကိုဋ်ပြၚ် ဒးပါဲဒၟံၚ်ဘဲပၞာန်ရောၚ် ဂွံတီကေတ် ဇရေၚ်ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ