မတ်မလီု၊ မေ ၈
ဟိုတ်နူဂၠံၚ်ကွဳပၟတ်လ္ဂုၚ်−မတ်မလီု ဒးဒုၚ်ခတိုဟ်ပလီုလဝ်တုဲ ဂွံကလေၚ်ဓရိပ် လၟေၚ်တရဴကွဳပၟတ်ဂမၠိုၚ် စဵုကဵုဂိတုမေ ၉ ဂှ် ဟွံချိုတ်ပၠိုတ်ဏီဂှ် လျိုၚ်နူဌာနကွဳပၟတ်ဍုၚ်ဗၟာမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂၠံၚ်ကွဳပၟတ် နွံအကြာမိုၚ်တိုၚ် စၟတ် ၁၁၂/၁၀−၁၁ စၟတ်ဒဒန် ၆၅ နွံအကြာသၞေဟ်ကွဳပၟတ် (နှၚ်းပုလဲ) ကဵု (တောၚ်စွန်း) ပွိုၚ်ဍုၚ်ၜဳကလေၚ် မဒှ်သ္ကုတ်ဂၠံၚ်ကွဳပၟတ် လ္ဂုၚ်−မတ်မလီုဂှ် ပ္ဍဲဂိတုမေ ၅ အခိၚ်ဗ္တံဂှ် ဒးဒုၚ်ခတိုဟ်လဝ်မာၚ်ရ။
ဟိုတ်နူဒးဒုၚ်ခတိုဟ်လဝ်မာၚ်တုဲ ဒဒန်ဂၠံၚ်ကွဳပၟတ် ဇမၠိၚ်မၞုံ ၈၀ ပေဂှ်ဝွံ သရိုဟ်လီုအာ ၜိုတ် ၄၀ ပေပြၚ်တုဲ ဒးပလီုလဝ်လၟေၚ်တရဴကွဳပၟတ် သီုဖအိုတ် ဗွဲယာယဳရ။
ညးတာလျိုၚ် ဌာနကွဳပၟတ်ဍုၚ်ဗၟာ မွဲတၠဂှ်တှ်ေ ဟိုတ်နူဂၠံၚ်ကွဳပၟတ် လ္ဂုၚ်−မတ်မလီု လီုအာဂှ်တုဲ စဵုကဵုဂိတုမေ ၉ ဂှ် ဒဒှ်ရဟွံဂွံဓရိပ်ဏီဂှ်ကီု၊ ပလေဝ်ပလေတ်တုဲဗက် ကလေၚ်စအာ လၟေၚ်တရဴဂမၠိုၚ်ဏောၚ် ဂးရ။
“ပြဟ်ဟ်ဏံ စဵုကဵုဂိတုမေ ၉ ဂှ် ဟွံဂွံတိတ်ဏီပုဟ်။ ပလေဝ်ဒၟံၚ်ဒဒန်။ ဃရက်ကၠောန်ဒၟံၚ်ရ။ လၟုဟ် ပလေဝ်ဒၟံၚ်ဂၠံၚ်။ တုဲဗက်ဂှ် တိတ်ဟဂှ်ရဏောၚ်” သာ်ဝွံ သ္ဂးရ။
ဂၠံၚ်ကွဳပၟတ် ဒးဒုၚ်ခတိုဟ်လဝ်မာၚ်ဂှ်ဝွံ လီုအာသီုဒဒန် မ္ၚးဂၠံၚ်ဂှ်တုဲ အခိၚ်ပလေဝ်ပလေတ် လအ်ဒၟံၚ်တုဲ ညံၚ်ဂွံကလေၚ်ပလေဝ်ဂတာပ်ဂှ် ရေၚ်တၠုၚ်ဒၟံၚ်ရောၚ် ညးဆက်ဟီုရ။
လ္ပာ်သၞေဟ်ကွဳပၟတ်မတ်မလီုဂှ်တှ်ေ ဟိုတ်နူဂၠံၚ်ကွဳပၟတ် လီုအာဂှ်တုဲ ဒးပလီုလဝ် သီုလၟေၚ်တရဴကွဳပၟတ် မတ်မလီု−လ္ဂုၚ်၊ လ္ဂုၚ်−မတ်မလီု မသ္ဂောံဓရိပ် ပ္ဍဲဂိတုမေ ၆ ကဵု ဂိတုမေ ၇ ဂှ်ဏောၚ်ဂှ် လလောၚ်ပ္တိတ်လဝ်ပရိုၚ်ရ။
ဟိုတ်နူဒးသီပလီုလဝ် လၟေၚ်တရဴကွဳပၟတ်ဂှ်တုဲ နကဵုညးမရာန်လဝ်စၟတ်တဲဂမၠိုၚ် ကလေၚ်လေဲကဵုအာၚုဟ်စၟတ်တဲ ပ္ဍဲရုၚ်စၟတ်တဲသၞေဟ်ကွဳပၟတ်မတ်မလီုဂှ်ဏောၚ် လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ