မူဇကဖာရာဗာတ်၊ မေ ၈
ပ္ဍဲဂိတုမေ ၇ ဂှ် နဒဒှ်ပရေၚ်ဗ္တိုက်ဓဇန်အိုတ်မွဲ အပ္ဍဲပွိုၚ်ၜါစှော်သၞာံပြၚ်ဏံ အကြာဍုၚ်မပိုၚ်ပြဳလဝ်လွဟ်နျူကလဳယျာၜါဍုၚ်ဂှ် အိန္ဒိယ ဗ္တိုက်ကၠုၚ်လဝ် ပါကေဿတာန် ကေုာံ ဒေသကာတ်ယှမဳယျာ လ္ပာ်ပါကေဿတာန်အုပ်ဓုပ်ဂှ်တုဲ ပါကေဿတာန် ဟီုကၠုၚ်လဝ် ဒဒှ်ရပန်ဖျေံဂွံလဝ် က္ၜၚ်ကျာဗ္တိုက်အိန္ဒိယ ၅ ဖ္ဍိုက်ရ။
ပ္ဍဲဒေသကာတ်ယှမဳယျာ အိန္ဒိယအုပ်ဓုပ်လဝ်ဂှ် ပ္ဍဲဂိတုတုဲကၠုၚ်တေံ လ္ပာ်အေဿလာမ်မေတ် မၞုံပၟိက်ကဵုပၞာန်တံ ဗ္တိုက်ကၠုၚ်လဝ် ညးအာတရဴဟိန္ဒူတုဲ မၞိဟ် ၂၆ တၠ လမျီုဒးအိုတ်အာလဝ်တုဲ ဒှ်သာ်ဂှ်ရ ဗ္တိုက်လဝ်စမြိုၚ် သၟာပကီုပရာပ် ပါကေဿတာန်တံရောၚ် အိန္ဒိယ ဂးရ။
အပ္ဍဲကၟိန်ဍုၚ်ဂှ် ဒးဒုၚ်စွံပွန်လဝ် ဒၞါဲဒတန် ၆ ဒၞါဲတုဲ ဒၞါဲတံဏံဝွံ ဆက်စပ်ဒၟံၚ် ကဵုပရေၚ်ပကီုပရာပ် မွဲမှဟွံမွဲပုဟ်ဂှ် အလဵုအသဳပါကေဿတာန် ဟီုရ။
ဟိုတ်နူအိန္ဒိယ ဗ္တိုက်ကၠုၚ်တုဲ မၞိဟ် ၈ တၠ ဒးချိုတ်အာလဝ်ရောၚ် အလဵုအသဳအေဿလာမ်မာဗာတ် ဟီုလဝ်ရ။
အိန္ဒိယ ဗ္တိုက်ကၠုၚ်လဝ် ဒၞါဲဌာန်ဂအုပ်ဂကောံအေဿလာမ်မေတ် မၞုံပၟိက်ကဵုပၞာန်တံ မပ္တံကဵု Jaish-e-Mohammed ကေုာံ Lashkar-e-Taiba တံဂှ်ရောၚ် တမ်ရိုဟ်ပရိုၚ် ဌာနဝန်ဇၞော်ကာစဵုဒၞါအိန္ဒိယ ဟီုလဝ်ရ။
နကဵုညးတံ ရုဲစှ်လဝ်ပွန် ချိုတ်တ်ပၠိုတ်တ်တုဲ ဗ္တိုက်ကၠုၚ်လဝ် နကဵုဗီုပြၚ်ကောပ်မှေတ်လဝ်ရောၚ် ဌာနဝန်ဇၞော်ကာစဵုဒၞါအိန္ဒိယ ဟီုရ။
ပိဒၞါဲ ဒးအာလဝ် ကမ်လှောဝ်အိန္ဒိယတံဂှ်တုဲ ပန်ဖျေံဂွံလဝ် က္ၜၚ်ကျာဗ္တိုက်အိန္ဒိယ မသုန်ဖ္ဍိုက်ရောၚ် ပါကေဿတာန် ဟီုလဝ်ကီုလေဝ် အိန္ဒိယ ဟွံဂွံသ္ပဒတန်လဝ်ရ။
ပ္ဍဲဗ္တံ ပရေၚ်ဗ္တိုက်ဒှ်လဝ်ဂှ် က္ၜၚ်ကျာဗ္တိုက်ပိဖ္ဍိုက် သရိုဟ်စှ်ေအာလဝ် ပ္ဍဲကဵုဒေသဟိမဝန် ဒၞါဲဟွံတုပ်တံဂှ်ရောၚ် တမ်ရိုဟ်ပရိုၚ် နွံဒေသကာတ်ယှမဳယှာ လ္ပာ်အိန္ဒိယအုပ်ဓုပ်လဝ်ဂှ် ဟီုရ။
တမ်ရိုဟ်ပရိုၚ်တံဏံ ၜိုန်ဟီုဒၟံၚ် ညးဒဳက္ၜၚ်ကျာသီုပိတၠ ဒးပ္တိုန်လဝ်ရုၚ်ဂဥုဲကီုလေဝ် ဌာနဝန်ဇၞော်ကာစဵုဒၞါအိန္ဒိယဂှ် ဟွံဂွံသ္ပဒတန်ဏီရ။
ပြဝအိန္ဒိယဝွံ ဝေၚ်ကၠုၚ်မံၚ်ပၞာန် ပြာပြာကတ်တ်တုဲ နကဵုပါကေဿတာန် အခေါၚ်ကလေၚ်ခၠေဝ်ပလန် ပရေၚ်အိန္ဒိယဂၠါဲကၠုၚ်သၞဏံ နွံရောၚ် ကဵုလဝ်ပရိုၚ် ကုကံၚ်ဇြဳဂီုကၠီုကုလသမဂ္ဂရောၚ် အလဵုအသဳအေဿလာမ်မာဗာတ် ဟီုလဝ်ရ။
Ref: Reuters