ဗဂေါ၊ မေ ၈
ပ္ဍဲပွိုၚ်ဍုၚ်ယှိုဲကျေန်၊ ပွိုၚ်ဍုၚ်ဝဝ် ကေုာံ ပွိုၚ်ဍုၚ်ကျာ်ထဝ် မဒှ်ပယျဵုတွဵုရးမန်ကဵုရးဗဂေါဂှ် လ္ပာ်ကံၚ်ဇြဳပၞာန် ထပ်ဗပေၚ်ကၠုၚ်ဇြဟတ်ဒပ်တုဲ ပလေဝ်ဒၟံၚ်ပၞာန်ဒုၚ်ရောၚ် ညးမစုက်လုက်ကဵုဒပ်ကံၚ်ဇြဳပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ ပပ္တံနူဂိတုမေ သတ္တာဟပထမဂှ်တုဲ ပ္ဍဲရးဗဂေါ ပွိုၚ်ဍုၚ်ဝဝ် ပ္ဍဲကဵုကွာန် (သူရဲသမိန်၊ လက်ပန်၊ ဆၚ်ရွာ) ၊ ပ္ဍဲတမ်ဒပ် ခမရ ၂၀၇ ကဵု အမတ ၃၁၀ ဖျေံသ္ဇိုၚ်ဍုၚ်ဒုၚ်သယိတ် ပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ် ထပ်ဗပေၚ်လဝ်ဇြဟတ်ဒပ် နကဵုလၟိဟ်ဂၠိုၚ်ကဵုကၠံရ။
သွက်ဂွံပလံၚ်ဗစိုပ် ကောန်ဒပ်မပေၚ်လဝ်ဇြဟတ်ဒပ်ဂမၠိုၚ် ဗ္ဒါဲပွဳဗွိုၚ်ကွာန်(ကွမ်းဆိပ်) ၊ ပွိုၚ်ဍုၚ်ယှိုဲကျေန်၊ ရးဗဂေါ ဒၞါဲပေါဲဗ္တိုက်ဒှ်ဒၟံၚ်လၟုဟ်ဂှ် ပ္တိတ်ဒၟံၚ်ဇြဟတ်ဒပ်တုဲ ဟိုတ်နူဒပ်ပၠန်ဂတးဂမၠိုၚ် ကၟာတ်လဒဵုဗ္တိုက်ကၠုၚ်တုဲ ဒးဂဗဒၟံၚ်ကဵုအကာဲအရာ ဆက်အာဂတဟွံဂွံရ။
ဒပ်ကံၚ်ဇြဳပၞာန်ဝွံ နူဗလးတိဏံ ဟိုတ်နူဆက်အာဂတဟွံဂွံတုဲ နူကဵုဒၞါဲမဖျေံလဝ်ဒပ်ဂှ် ပန်ခ္ဍာၚ်ဒၟံၚ်နကဵုလွဟ်ဇၞော် အရိုဟ်ဒဒှ်တ္ၚဲတုဲ စကာဒရုၚ်တုဲ ထောံမခတိုဟ်ကီု၊ ထောံမခတိုဟ် နူကဵုပၞာန်ကျာကီုတံဂှ် ကၠောန်ဒၟံၚ်ရောၚ် ဂွံတီကေတ် ဇရေၚ်ဒပ်ပၠန်ဂတးဂမၠိုၚ်ရ။
မွဲလ္ပာ်ဂှ်ပၠန် ပ္ဍဲကွာန်(သူရဲသမိန်၊ ဆၚ်ရွာ၊ လက်ပန်၊ စက်စု၊ ဂျိုးလေး) နူပွိုၚ်ဍုၚ်ဝဝ် သြၚ်ၜဳသက်တိုၚ်လ္ပာ်တေံ မဒှ်ဗ္ဒါဲပွဳဗွိုၚ်ကွာန်(ကွမ်းဆိပ်) ဒၞါဲပေါဲဗ္တိုက်ဒှ်ဒၟံၚ်ဂှ် လ္ပာ်ဒပ်ကံၚ်ဇြဳပၞာန် ဖျေံလဝ်ဒပ် နွံဒၟံၚ်ရ။
သ္အာၚ်နူဂှ်ပၠန် ဗ္ဒါဲဍုၚ်ဒုၚ်သယိတ် ပွိုၚ်ဍုၚ်ကျာ်ထဝ်ဂှ်လေဝ် ညံၚ်ရဴတမ်ဒပ် အမတ ၃၁၀၊ ခမရ ၂၀၇ တံကီု ဒပ်ဖျေံသ္ဇိုၚ်ဂမၠိုၚ်၊ ကၚ်မၚ်တောပ်ဂမၠိုၚ်လေဝ် နွံဒၟံၚ် ဗွဲမဂၠိုၚ်ဂၠေၚ်ရ။
ဗ္ဒါဲပွဳဗွိုၚ်ကွာန်(ကွမ်းဆိပ်) ဂှ် ပေါဲဗ္တိုက်ဆက်ဒှ်ဒၟံၚ် စဵုကဵုဂိတုမေ ၇ အခိၚ်နူဂယးဂှ်တုဲ ကာလပေါဲဗ္တိုက် လအ်ကၠုၚ်ပွိုၚ်ၜါသတ္တာဟပြၚ်ဂှ် ပရေၚ်ဇီုကပိုက်ချိုတ်တံ နွံဒၟံၚ်ရောၚ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ဗလးတိဂမၠိုၚ်ရ။
ဟိုတ်နူပေါဲဗ္တိုက် ပယျဵုမန်ကဵုဗဂေါဂှ်တုဲ ညးဒေသ ဗ္ဒါဲ ၉၀၀၀ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ နွံပၟိက်ဒၟံၚ်ကဵု ဇွောံမစၞစ ကေုာံ အရီုဗၚ်ဂဥုဲဇဗဂမၠိုၚ်ရောၚ် ဂွံတီကေတ် ဇရေၚ်ညးမရီုဗၚ်ကဵုဒၟံၚ် ပရေၚ်ညးပါဲဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ