ရေဝ်၊ မေ ၁၁
ပ္ဍဲတွဵုရးဍုၚ်မန် ပွိုၚ်ဍုၚ်ရေဝ် အကြာကွာန်သၞေဟ်ဂဒေါအ်ကဵု ကွာန်သၞေဟ်ကာဂှ် ဒပ်ကံၚ်ဇြဳပၞာန် ဒးဒုၚ်ကြတ်ဗ္တိုက်လဝ်တုဲ လ္ပာ်ကံၚ်ဇြဳပၞာန်ဂှ် သၞာဲဒဴမွဲတၠမပါလုပ် ပန်တၠ ချိုတ်အာလဝ်ရောၚ် ဂွံတီကေတ် ဇရေၚ်ဒပ်ပၠန်ဂတးတံရ။
ပ္ဍဲဂိတုမေ ၁၀ အခိၚ်နူဂယး ၜိုတ် ၁၀ နာဍဳဂှ် နူဍုၚ်လၟိုၚ်မွဲကဆံၚ် ကရောၚ်ပၞာန်ကံၚ်ဇြဳပၞာန် ဇြဟတ်မၞုံ ၜိုတ် ၈၀ ပြၚ် စှ်ေအာကဵုကွဳစက် လ္ပာ်ကွာန်သၞေဟ်ဂဒေါအ်ဂှ်ဝွံ နူကွာန်သၞေဟ်ဂဒေါအ် အဃောကၠောံဂၠုၚ် လ္ပာ်ကွာန်သၞေဟ်ကာဂှ် ဒးဒုၚ်ကြတ်ဗ္တိုက်လဝ်ရ။
အပ္ဍဲပရေၚ်ကြတ်ဗ္တိုက်ဏံဂှ် လ္ပာ်ကံၚ်ဇြဳပၞာန်ဂှ် ဗိုလ်ဇၞော်မွဲတၠ မပါလုပ် ကောန်ဒပ်ပန်တၠ ချိုတ်အာလဝ်တုဲ ညးကလိဂွံဝပ်တံလေဝ် နွံဂှ် ဂွံတီကေတ် အတိုၚ်ဂလာန် ကောန်သ္ဂံၚ်ပၠန်ဂတး ပါလုပ်ဒၟံၚ် ပ္ဍဲပရေၚ်ဗ္တိုက်တံရ။
ကောန်ဒပ်ကံၚ်ဇြဳပၞာန် မဒးပြဟ်လလုဲအာ အပ္ဍဲပရေၚ်ဗ္တိုက်တံဂှ် ကလေၚ်ယိုက်ဖျဴဏာ ဇရေၚ်ရုၚ်ဂဥုဲဍုၚ်လၟိုၚ်တုဲ ပွဳပွူရုၚ်ဂဥုဲဂှ်လေဝ် ကေတ်လဝ်ဂီုကၠီုရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်လၟုဟ်ဂှ်လေဝ် ဒပ်ကံၚ်ဇြဳပၞာန် ပန်ပှော်ဒၟံၚ်လွဟ်ဇၞော် ပွဳပွူကွာန်သၞေဟ်ကာကဵု ကွာန်နှေဟ်ခရေၚ်တံဂှ်တုဲ ထ္ပက်ကၠုၚ်ကရောၚ်ပၞာန်ဂှ်ရ ညးဍုၚ်ကွာန်ဒေသလ္ၚဵု ဒးပါဲဒလေတ်ဒၟံၚ်ရောၚ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ကရောၚ်ပၞာန်ကံၚ်ဇြဳပၞာန်ဝွံ ဒုၚ်ယၟုၚးတးတိဍာ်တုဲ အခိၚ်ဂေတ်ဂေၚ်ဒၟံၚ်ဂီုကၠီုဂှ် ဒးဒုၚ်ကြတ်ဗ္တိုက်လဝ် ဒှ်မာန်ရောၚ် သ္ၚဳဂၠိပ်ဟီုဂးဒၟံၚ်တံလေဝ် နွံဒၟံၚ်ရ။
သၞာံတုဲကၠုၚ် ပ္ဍဲဂိတုမေ ၂ ဂှ်လေဝ် ဒပ်ဍာ်ကံၚ်ဇြဳပၞာန် ဖျေံလဝ်ဒပ် ပ္ဍဲကွာန်ကအ်လဂုတ် ဗ္ဒါဲကွာန်သၞေဟ်ကာဂှ် ဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန်ဒ္စိတ်တၠ ချိုတ်တုဲ ဒပ်ပၠန်ဂတးတံ ရပ်ဂွံလဝ်ၜါတၠ ဂျိုၚ်ၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ