မဝ်သဂိုဝ်၊ မေ ၁၁
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုကၠုၚ်လဝ် အပ္ဍဲပေါဲသဳကၠဳ ကုသမ္မတကြုက် မဆဵုဂဗလဝ် ပ္ဍဲဍုၚ်ရုယှာ ဍုၚ်မဝ်သဂိုဝ်ဂှ် ဒဒှ်ရဒုၚ်အာလျိုၚ် ကုပရေၚ်ဂီုကၠီုဗၠးဘဲ ညးယိုက်ဝန်တံကဵု ကိုန်စဳမာန်ကြုက် မၞုံပ္ဍဲဍုၚ်ဗၟာ မဒှ်ရ။
သမ္မတကြုက် ယှဳကျေန်ဖျေန်ကေုာံက္ဍိုပ်သ္ကိုပ်ပၞာန် မတိုန်စိုပ်ကၠုၚ် အသေအဟာန်စၟတ်သမ္တီ တ္ၚဲပေါဲအံၚ်ဇၞးမဟာညးဆာန်ဂကူ ပေၚ် ၈၀ သၞာံ မကၠောန်ဗဒှ်လဝ် ပ္ဍဲဍုၚ်မဝ်သဂိုဝ် ဍုၚ်ရုယှာဂှ် ဆဵုဂဗသဳကၠဳလဝ် ပ္ဍဲဂိတုမေ ၉ တေံရ။
ယှဳကျေန်ဖျေန်ဂှ်တှ်ေ သ္ဇိုၚ်ဝန်ကြုက်၊ ဂကောံဗော်သွးကြုက်၊ ကိုန်စဳမာန်ကြုက် နွံပ္ဍဲဍုၚ်ဗၟာတံ ညံၚ်ဂွံဗၠးဘဲဂီုကၠီုဂှ် သွက်ဂွံဒုၚ်ကဵုလျိုၚ် ဗွဲမစှ်ေကဵုနတဲကီု၊ သွက်ဂွံသၠုၚ်ပ္တိုန်အသိၚ် ဗ္တိုက်သရိုဟ်အာ ဝိုၚ်ဝေၚ်လ္တူလပှ်ကျာ၊ ပရေၚ်လီဠာန် မဆေၚ်စပ်ကဵုပရေၚ်ဆက်စၠောံတံဂှ် စၟဳစလဝ်ရောၚ် သ္ဂးရ။
စပ်ကဵုပရေၚ်ဏံတုဲ က္ဍိုပ်သ္ကိုပ်ပၞာန် ဒဒှ်ရဒုၚ်ကဵုလျိုၚ် ကုပရေၚ်ဂီုကၠီုဗၠးဘဲ သွက်ညးယိုက်ဝန်တံကဵု ကိုန်စဳမာန်ကြုက် နွံပ္ဍဲဍုၚ်ဗၟာတံဂှ် ဌာန်ပရိုၚ်ဇြေန်ဟွာ အလဵုအသဳကြုက်ပိုၚ်ဂှ် ထ္မံက်ထ္ၜးလဝ်ရ။
ပ္ဍဲဍုၚ်ဗၟာ အပ္ဍဲကာလဒပ်ပၞာန်သီလဝ်အဝဵု ပွိုၚ်ပန်သၞာံပြၚ်ဏံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဒုၚ်တဲဆဵုဂဗလဝ် သမ္မတဍုၚ်ကြုက် ယှဳကျေန်ဖျေန် အလန်ပထမကိုပ်ကၠာအိုတ်ရ။
ဥူကျဳမျေတ် ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာဂှ်တှ်ေ က္ဍိုပ်သ္ကိုပ်ပၞာန် မဂွံအခေါၚ်ဆဵုဂဗသဳကၠဳ ကုသမ္မတယှဳကျေန်ဖျေန် ဟိုတ်နူအရီုဗၚ်ရုယှာဂှ်ဝွံ ပ္တိတ်ဒၟံၚ်ပရဲ နကဵုနဲကလုတ်တမာန်ရောၚ် သ္ၚဳဂၠိပ်လဝ်ရ။
“ဒးဟီုသောၚ်ၚ်မ္ဂး ယဝ်အပါဟွံရီုတှ်ေ ကောန်ဂှ် စှ်ေဒၟံၚ်နရက်ယျ။ ဒှ်သာ်ဂှ်တုဲ ညး(က္ဍိုပ်သ္ကိုပ်ပၞာန်) ထ္ၜးမုက် ဒုၚ်လဝ်ဂုန်ရ။ အတေံလေဝ် ယဝ်စိုတ်ဆာန်ဍူလုပ်အာ ကုညးမကၠုၚ်စိုပ်ထံက်က္ၜံၚ်ဇအ်သဝ်ဒၟံၚ်ဂှ်မ္ဂး သွက်ညးတှ်ေ ပရဲရ ဟွံသေၚ်ဟာ။ အကာဲအရာဍုၚ်ဗၟာဂှ်တှ်ေ အတိုၚ်တီလဝ်ဂှ်ရ နူသွာၚ်ဇဳဂှ် သှ်ေဒၟံၚ်ညိညရ။ အေ ဂှ်တှ်ေ မေန်အံၚ်လှာၚ် သီုကဵုထ္ၜးကၠေံ ကုညးဂၠးတံ ဗီုဂွံမိန်လဝ်ယှဳကျေန်ဖျေန် သီုနိၚ်ၜါလ္ပာ်ဂှ်ရ။ နကဵုနဲကလုတ်ဂှ် ညး(က္ဍိုပ်သ္ကိုပ်ပၞာန်) ပ္တိတ်ဒၟံၚ်ပရဲ ဒဒှ်ရယှဳကျေန်ဖျေန် ဆဵုဂဗသီုညး၊ ဒဒှ်ရညးတေံ ဟွံပရေံပုဟ်ဂှ် နကဵုအဲ ဒုၚ်ဂိုၚ်ကေတ် သာ်ဏံရ” သာ်ဝွံ သ္ဂးရ။
က္ဍိုပ်သ္ကိုပ်ပၞာန်ဂှ်တှ်ေ ကၞောတ်သၞာံဏံ သွက်ဂွံကၠောန်ဗဒှ်ပေါဲရုဲမာဲ ဗွဲမအံၚ်ဇၞးမာန် ဒစးဒုၚ်ပလေဝ်ပလေတ်ဒၟံၚ်တုဲ သွက်ဂွံကော်ဘိက် ကုဂကောံလ္ၚတ်နူဍုၚ်သ္အာၚ်တံမာန်ဂှ်လေဝ် စဳဇန်ဒၟံၚ်ရောၚ် ဟီုရ။
စပ်ကဵုပရေၚ်ဏံတုဲ ဒဒှ်ရသမ္မတယှဳကျေန်ဖျေန် ကဵုဇြဟတ်ထံက်ဂလာန်ဂှ်ကီု၊ နကဵုဍုၚ်ကြုက် ဒဒှ်ရဆက်ရီုဗၚ်အာ ပ္ဍဲကမၠောန်ပရေၚ်ၜိုဟ်လလမ် ကေုာံ ပရေၚ်ဖောအ်ဗြေဝ်တောတက်ဍုၚ်ဗၟာတံဂှ်ဏောၚ် ဟီုလဝ်ဂှ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒကံၚ်ဇြဳပၞာန်ရ။
သ္အာၚ်နူဂှ်ပၠန် ပရေၚ်ထ္မံက်ဒၟံၚ်ရုပ်ရဴ လၟေၚ်ကမၠောန် ပရေၚ်ဖောအ်ဗြေဝ်တောတက်ဍုၚ်ဗၟာ၊ ပရေၚ်ဗၠးၜး အဝဵုစၟိန်ပြမာန်၊ ပရေၚ်ပိုၚ်ပြဳတိဍာ် ကေုာံ ပရေၚ်ညိၚ်ဝတ်ပ္ဍဲဍုၚ်ကွာန်တံဂှ် ဒဒှ်ရဍုၚ်ကြုက် ထံက်ဂလာန်ကဵုဇြဟတ်ဂှ် သမ္မတယှဳကျေန်ဖျေန် ဟီုလဝ်ဂှ် ၜါဍုၚ် လလလောၚ်ပ္တိတ်လဝ်ပရိုၚ်ရ။
နကဵုအလဵုအသဳကြုက် စပ်ကဵုပရေၚ်ဍုၚ်ဗၟာဂှ် ကြဴနူပရေၚ်ပၞာန် ၁၀၂၇ လောန်တုဲ ညံၚ်ဂကောံရပ်လွဟ်ကောန်ဍုၚ်အရၚ်သ္ကုတ်သၟဝ်ကျာကဵု ကံၚ်ဇြဳပၞာန်တံ ဂွံဒှ်ဆဵုဂဗသဳကၠဳဂှ် လုပ်အကြာပ္ညဳပ္ညပ်ကဵုဒၟံၚ်ရ။
ပ္ဍဲအကာဲအရာဒှ်ဒၟံၚ်သာ်ဏံဂှ် ပ္ဍဲကဵုကိစ္စပရေၚ်ၜိုဟ်လလမ်အပ္ဍဲဒေသဂှ် သမ္မတကြုက် ဒဒှ်မဟီုဂးဒၟံၚ် သွက်ဂွံပံၚ်တောဲရေၚ်တၠုၚ် ကုဍုၚ်ဗၟာဂှ်ဝွံ ဇီုကပိုက်ကၠုၚ် လ္တူပဋိပက္ခပရေၚ်ပၞာန်ဍုၚ်သေံသ္ကုတ်သၟဝ်ကျာမာန်ဂှ် ဗိုလ်ဇၞော်ဇြေန်ယဝ် သ္ပလဝ်ဇြဳဒဳအာမ်ဂှ် သ္ၚဳဂၠိပ်လဝ်ရ။
“ ပ္ဍဲအကာဲအရာပရေၚ်ပၞာန်ရးသေံသ္ကုတ်သၟဝ်ကျာဂှ် ဂကောံသေံသၟဝ်ကျာ TNLA, MNDAA တံ ဒးဒုၚ်ဓရတ်ကၠုၚ်ကဵုကြုက် ဇၞော်ကဵုဇြဟတ် ဂၠိုၚ်နူဏံဏောၚ်ဂှ် ဟီုဂွံရ။ ညအ်ဂှ် ဒှ်ဓဝ်ဍာံဝေၚ်ပါဲဟွံဂွံရ။ ကြုက် လုပ်စိုပ်ပလာပ်ပထုဲဒၟံၚ် ပ္ဍဲပရေၚ်ဍုၚ်ကွာန် ပရေၚ်အပ္ဍဲဍုၚ်ညးတၞဟ်တံဂှ်လေဝ် ဂွံညာတ်ကေတ် ပြာပြာကတ်တ်ဂှ် ဟီုဂွံရ” သာ်ဝွံ သ္ဂးရ။
အလဵုအသဳကြုက်ဝွံ ညးစၞးကံၚ်ဇြဳပၞာန်ကဵု ကောန်ဂကောံမဟာမိတ်ကောဒေံ ဒပ်ကဝ်က MNDAA ၊ ဒပ်တအာၚ် TNLA တံ ဂွံဆဵုဂဗသဳကၠဳညးသ္ကအ် ဗွဲတၞဟ်ခြာဂှ် ကဵုလဝ်ဇြဟတ်ဓရိုဟ် နကဵုထပိုတ်မသုန်ထပိုတ်ရ။
ဟိုတ်ဒှ်သာ်ဂှ်ရ စနူဂိတုဨပရဴ ၂၁ တုဲကၠုၚ်တေံတုဲ ဂကောံအုပ်ဓုပ် ကေုာံ ကောန်ဒပ်ကံၚ်ဇြဳပၞာန်တံ ဂွံလဝ်အခေါၚ်ကလေၚ်အုပ်ဓုပ် ဍုၚ်လာယှိုဝ် နကဵုအရီုဗၚ်ကြုက်တံဂှ်တုဲ ဒပ်ကဝ်က MNDAA ဂှ်တှ်ေ ဒးဆုတ်ကလေၚ်အာလဝ် နူအပ္ဍဲဍုၚ်ရ။
ဒပ်တအာၚ် TNLA ကဵု ကံၚ်ဇြဳပၞာန်တံ ဆဵုဂဗသဳကၠဳလဝ်ညးသ္ကအ် နွံကီုလေဝ် သွက်ဂွံကလေၚ်ကေတ် ဍုၚ်မ္ဒးဗလးလဝ်တဲတံဂှ် လ္ပာ် TNLA တးပါဲလဝ် တၚ်အာတ်မိက် လ္ပာ်ညးစၞးကံၚ်ဇြဳပၞာန်တံဂှ်ရ ပေါဲသဳကၠဳဂှ် ဟွံအံၚ်ဇၞး ဒှ်အာလဝ်ရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်တှ်ေ စပ်ကဵုပရေၚ်ဍုၚ်ဗမာတုဲ နကဵုဍုၚ်ကြုက် ဟိုတ်နူဒတူလိုၚ်ကဵုလဝ် လ္ပာ်ဍုၚ်ဗမာ ဂတမုက်ဍုၚ်သ္အာၚ်တအ်ကဵု အပ္ဍဲဒေသဂှ်တုဲ တၚ်တဴဂုန်ရောၚ် သ္ဂးရ။
ပရေၚ်ဆဵုဂဗဏံဝွံ သ္ကဵုဒှ်တဴအထံက်အရီု သွက်သ္ဂောံသၠုၚ်ပ္တိုန် ပရေၚ်ပံၚ်တောဲအကြာၜါဍုၚ်ဂှ်သၟးဟွံက အကြာၜါဍုၚ် ဆက်ပံၚ်တောဲအာကြပ်ပ်မာန်ဏောၚ် ပတှ်ေစှ်ေစိုတ်ဂှ်ရ ပံၚ်တောဲကဵုဍုၚ်ကြုက်တုဲ သွက်ဂွံဆေၚ်အာမုက် ကုတၚ်ကော်ဆဴဂမၠိုၚ်ဂှ် ဆန္ဒမၞုံရောၚ် ညးဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CINCDS