မဝ်သဂိုဝ်၊ မေ ၁၁
အပ္ဍဲပရေၚ်ဆဵုဂဗ ကုက္ဍိုပ်သ္ကိုပ်ပၞာန်ဗၟာ မေန်အံၚ်လှာၚ် ပ္ဍဲဂိတုမေ ၉ ပ္ဍဲဍုၚ်ရုယှာ ဍုၚ်မဝ်သဂိုဝ်ဂှ် သမ္မတကြုက် ယှဳကျေန်ဖျေန် ဒဒှ်ရဖ္တိုက်ဖ္အောဝ်ကၠုၚ် ပ္ဍဲအရာရေၚ်တၠုၚ် လၟေၚ်ကမၠောန်ပရေၚ်ဍုၚ်ကွာန်ဍုၚ်ဗၟာဂှ် ချပ်စၚ်ခြၚ်တုဲ သွက်ဂွံကၠောန်အာဂှ် ညးဗြဴမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ် မဝ်နေန်ဂှ် ချူလဝ် ပ္ဍဲမဳဒဳယျာပရေၚ်မၞိဟ် X ရ။
ပ္ဍဲအရာမဍံၚ်ဗက် လက္ကရဴဂၠံၚ်တရဴဖောအ်ဗြေဝ် မကိတ်ညဳကဵုအကာဲအရာဍုၚ်ဗၟာဂှ် ညံၚ်အဝဵုစၟိန်ပြမာန်၊ ပရေၚ်ဗၠးၜး၊ ဂုန်သိက္ခာစပ်ကဵုတွဵုဒၞက် ကေုာံ ညံၚ်ကၟိန်ဍုၚ်ဂွံညိၚ်ဝတ် ဒှ်တမ် အရာတံဏံ ဂွံချိုတ်ပၠိုတ်ဂှ် ဍုၚ်ကြုက် ရီုဗၚ်ကဵုအာ ဍုၚ်ဗမာဏောၚ်တုဲ ပ္ဍဲအရာဆက်ရေၚ်တၠုၚ်အာ လၟေၚ်ကမၠောန်ပရေၚ်ဍုၚ်ကွာန် အပ္ဍဲဍုၚ်ဂှ် ချပ်စၚ်ခြၚ်တုဲ ဂွံရေၚ်တၠုၚ်အာဂှ်လေဝ် ဒဒှ်ရဖ္တိုက်ဖ္အောဝ်လဝ်ဂှ် သမ္မတယှဳကျေန်ဖျေန် ဟီုလဝ်ရ။
သၞာဲဒဴဍုၚ်ကြုက်၊ ဂကောံဗော်သွးကြုက် ကေုာံ ကိုန်စဳမာန်ကြုက် နွံဒၟံၚ်အပ္ဍဲဍုၚ်ဗၟာတံ ညံၚ်ဂွံဗၠးဘဲဂှ်လေဝ် သွက်ဂွံစဵုဒၞါကဵုအာ ဗွဲမစိုပ်တရဴဂှ် သမ္မတယှဳ ဟီုလဝ် ကုက္ဍိုပ်သ္ကိုပ်ပၞာန်ရ။
ပ္ဍဲအရာတာဒၞါ အမှုရာဇဝတ်တတ်ကၠောံပယျဵုဂှ်လေဝ် သွက်ဂွံပ္တိတ်အာဇြဟတ်ဂှ် ယှဳကျေန်ဖျေန် ဒဒှ်ရဖ္တိုက်ဖ္အောဝ်လဝ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး အလဵုအသဳကြုက်ရ။
အခိၚ်စိုပ်ဒၟံၚ် ဍုၚ်မဝ်သဂိုဝ် သွက်အသေအဟာန် ဂွံဇၞးကေတ်နာဇြဳဂျာမနဳ ပေၚ် ၈၀ သၞာံဂှ် ညးတံၜါတၠ ဆဵုဂဗလဝ်ရ။
သွက်အကာဲအရာ ကြဴနူတိချဳ ပ္ဍဲဂိတုမာတ် ၂၈ တုဲဂှ် ကြုက် ဆက်ရီုဗၚ်ကဵုအာ ဍုၚ်ဗမာဏောၚ်ဂှ် ယှဳကျေန်ဖျေန် ဟီုရ။
အပ္ဍဲကာလပၞာန်အပ္ဍဲဍုၚ်ဗၟာဏံ ကံၚ်ဇြဳပၞာန်ဝွံ ဒးဗလးလဝ်တဲ တိဍာ်ကေုာံဗ္ဒိုပ်ဒပ် ဗွဲမဂၠိုၚ်တုဲ ပရေၚ်ဒှ်ဓဝိၚ် ဒဒှ်ရပေါဲဗ္တိုက်ဂမၠိုၚ် ပြာတ်စိုပ်အာဍုၚ်ဇိုၚ်ဝုတ်ဒိုဟ်တံမာန်ဂှ် မံက်တိတ်ဒၟံၚ်ရ။
ဒပ်ပၞာန်ကေုာံ ဂကောံရပ်လွဟ်ကောန်ဍုၚ်အရၚ်လ္ၚဵုတံဂှ် တုပ်လဝ်စိုတ် သွက်ဂွံပပဵုပ္တိုန်အာယုက် ကာလဒေါအ်ပန်ပှော် စဵုကဵုဂိတုမေ ၃၁ တုဲ ဍုၚ်ကြုက်ဂှ် ဗလးလဝ် ဂကောံမၚ်ရံၚ်ပရေၚ်ဒေါအ်ပန်ပှော်မွဲဂကောံရ။
Ref: AA/AFP