လိုၚ်ဗၠဲ၊ မေ ၁၁
ဒပ်ပံၚ်ကောံ KNLA တံ စဗ္တိုက်ဒၟံၚ် ကုဗ္ဒိုပ်ဒပ်ကံၚ်ဇြဳပၞာန် မဖျေံလဝ်သ္ဇိုၚ် ပ္ဍဲကွာန်(တာလယ်) ပွိုၚ်ဍုၚ်လိုၚ်ဗၠဲ တွဵုရးကရေၚ် ပယျဵုသေံ−ဗၟာဂှ်တုဲ ညံၚ်ဗ္ဒိုပ်ဟွံဂွံစှ်ေအာဂှ် ဒပ်ကံၚ်ဇြဳပၞာန် ဘိုၚ်ပန်ကဵုဒၟံၚ်နကဵုပၞာန်ကျာရောၚ် တမ်ရိုဟ်ပရိုၚ်ပယျဵုဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်ဗော်သွးကောန်ဂကူကရေၚ် KNU မဖျေံစၟတ်လဝ်ဂှ်မ္ဂး ကွာန်(တာလယ်) ဝွံ နွံပ္ဍဲဒပ်မဟာ ၇ ခရိုၚ်ဘာအၚ်၊ ပ္ဍဲပွိုၚ်ဍုၚ်တာကရယ် (ပိုၚ်ကျုံ) တုဲ ပ္ဍဲကွာန်ဏံဂှ် ဒပ်ကံၚ်ဇြဳပၞာန် ဖျေံလဝ်သ္ဇိုၚ် ဗ္ဒိုပ်ဗျူဟာ(တာလယ်)ဇၞော်မွဲရ။
ဒပ်ပံၚ်ကောံ ဒပ်စဵုဒၞါကောန်ဂကူကရေၚ် KNDO ၊ ဒပ်မဟာ ၇ ဒပ်ပၞာန်ဗၠးၜးကောန်ဂကူကရေၚ် KNLA သၟဝ်တဲ KNU တံဂှ်ဝွံ စနူဂိတုမေ ၉ ၜိုတ်အခိၚ် ၆ နာဍဳဂှ်တုဲ ထောံမခတိုဟ်ဗ္တိုက်လဝ် ကုဗျူဟာ(တာလယ်) မဒှ်ဗ္ဒိုပ်ဒပ်ကံၚ်ဇြဳပၞာန်မွဲ ဗ္ဒါဲပယျဵုသေံဂှ် နကဵုဒရုၚ်ရ။
ကုဒပ်ပံၚ်ကောံ ဒပ်မဟာ ၇ KNLA မထောံဂြာတ်မခတိုဟ်ဗ္တိုက်ဒၟံၚ် ကုဗ္ဒိုပ်ဗျူဟာတာလယ် နကဵုဒရုၚ်ဂှ် ပ္ဍဲဂိတုမေ ၉ အခိၚ်ဗ္တံ ၜိုတ် ၇ နာဍဳဂှ် ဒပ်ကံၚ်ဇြဳပၞာန် ကၠုၚ်စိုပ်ပန်ဏာလဝ် နကဵုက္ၜၚ်ကျာဗ္တိုက်တုဲ ထောံဂြာတ်ဏာလဝ်မခတိုဟ်ရောၚ် တမ်ရိုဟ်ပရိုၚ်ပယျဵုဂမၠိုၚ် သ္ဂးရ။
သ္အာၚ်နူဂှ်ပၠန် ပ္ဍဲဂိတုမေ ၁၀ တေံဂှ်လေဝ် ဒပ်ပံၚ်ကောံ ဒပ်မဟာ ၇ KNLA တံ မ္ၚးနူထောံဂြာတ်မခတိုဟ်ဗ္တိုက်လဝ် ကုဗ္ဒိုပ်ဗျူဟာတာလယ် နကဵုဒရုၚ်ဂှ် ပန်ပှော်ကၠုၚ်လဝ် သီုသနာ်ပါတုဲ လ္ပာ်ဒပ်ကံၚ်ဇြဳပၞာန် ညံၚ်ဗ္ဒိုပ်ဟွံဂွံစှ်ေအာဂှ် ထပ်ထောံမခတိုဟ်ဗ္တိုက်ဒၟံၚ်ကဵုက္ၜၚ်ကျာဗ္တိုက်တံရောၚ် ဂွံတီကေတ်ရ။
ဟိုတ်နူအကာဲအရာပရေၚ်ပၞာန် မက္တဵုဒှ်ဒၟံၚ် အပ္ဍဲဒေသပယျဵုဂှ်တုဲ ဒပ်ပၞာန်သေံဝွံ ဖျေံလဝ်ဂီုကၠီု ပ္ဍဲပၞောန်ပယျဵု ဗ္ဒါဲဒၞါဲပေါဲဗ္တိုက်ဒှ်တံဂှ်တုဲ မၚ်ရံၚ်ဒၟံၚ်အကာဲအရာ ဟွံပိုတ်သ္ကုတ်ရောၚ်ဂှ်လေဝ် ညးတာလျိုၚ်ဒပ်ပၞာန်သေံမွဲတၠ ဟီုထ္မံက်ပ္တိတ်ကၠုၚ်လဝ်ရ။
ဗ္ဒိုပ်ဗျူဟာ(တာလယ်)ဝွံ ဒှ်ဗ္ဒိုပ်ဇၞော် မၞုံကဆံၚ်ဗျူဟာမွဲတုဲ အပ္ဍဲဒေသဂှ် ဒှ်ဗျူဟာသှ်ေဒၟံၚ်လက္ကရဴအိုတ်တုဲ ဗျူဟာဏံမပါလုပ် ဗ္ဒိုပ်ဒပ်ကံၚ်ဇြဳပၞာန်ဂမၠိုၚ် မပ္တံကဵု(မယ်လ၊ မော်ဖိုးကေ၊ နော်တရာ) တံလေဝ် သှ်ေဒၟံၚ်ဏီဂှ် တမ်ရိုဟ်ပရိုၚ်ဒေသဂမၠိုၚ် ဟီုရ။
ဒပ်ပံၚ်ကောံ ဒပ်မဟာ ၇ KNLA ဝွံ ပ္ဍဲဂိတုမေ ၉ တေံဂှ်လေဝ် သီဂွံလဝ် ကုန်ဗ္ဒိုပ်(တခေါဘီခီး) ဗ္ဒါဲကွာန်(မယ်လ) ပွိုၚ်ဍုၚ်လိုၚ်ဗၠဲ ပယျဵုသေံဂှ်တုဲ ပ္ဍဲအရာသီဗ္ဒိုပ်ဏံဂှ် လအ်အာ ၜိုတ် ၂ တ္ၚဲတုဲ ဒပ်ကံၚ်ဇြဳပၞာန် ကဵုအရီုဗၚ်ပၞာန်ကျာဟွံမာန်မွဲသာ် ဒးဗလးထောံလဝ်ဗ္ဒိုပ်ဏံရ။
ပရိုၚ်−သြၚ်လောန်တိုၚ်(မ်)
ဗီုရုပ်− Social Media