ဒဳပေဝ်ယေန်၊ မေ ၁၄
ပ္ဍဲကဵုလိက်ပရိုၚ်တြးဝါဒ ကေုာံ ပ္ဍဲကဵုထဳဝဳကံၚ်ဇြဳပၞာန်တံဂှ် ဗ္တိုက်ကၠုၚ်လဝ်ပၞာန်ကျာ လ္တူဘာဗ္တောန်လိက် ကွာန်အိုဝ်ထုၚ်ကွေန် ပွိုၚ်ဍုၚ်ဒဳပေဝ်ယေန် ရးသက်ကိုၚ် ဟွံမွဲပုဟ်ဂှ် လီဠာန်တုဲ လလောၚ်ပ္တိတ်လဝ်ရ။
ကံၚ်ဇြဳပၞာန်ဂှ်တှ်ေ ကောန်ဒပ်ညးတံ ထောံဂြာတ်မခတိုဟ်ဗ္တိုက်လဝ် ဒၞါဲပွန်ပရေၚ်ပၞာန်ဟွံသေၚ်တံ၊ လမျီု ဒြပ်ရတ် သ္ၚိဌာန် ညးဍုၚ်ကွာန်တံ ဟွံမွဲပုဟ်ဂှ် စပ်ကဵုပရေၚ်မထောံဂြာတ်လဝ်မခတိုဟ် ဘာဗ္တောန်လိက်ဒဳပေဝ်ယေန်ဂှ်တုဲ လလောၚ်ပ္တိတ်လဝ်ရ။
ဂကောံအုပ်ဓုပ်ညးဍုၚ်ကွာန် ပွိုၚ်ဍုၚ်ဒဳပေဝ်ယေန်ဂှ်တှ်ေ နူဏေံတေံ အခိၚ်နူဂယးဂှ် ဘာဗ္တောန်လိက် ကွာန်အိုဝ်ထုၚ်တွေန် ဒးဒုၚ်ထောံဂြာတ်လဝ်မခတိုဟ် နကဵုက္ၜၚ်ကျာဂှ်တုဲ ညးဒးချိုတ်အာ ၂၂ တၠ၊ ညးကလိဂွံဝပ် ၆၀ တၠပြၚ် ဂၠိုၚ်တိုန်ကၠုၚ်လဝ်ရောၚ် လလောၚ်ပ္တိတ်လဝ်ရ။
ညးမဒးချိုတ်အာ ဗွဲမဂၠိုၚ်ဝွံ ကောန်ၚာ်သၟတ်ကွးဘာဂမၠိုၚ် ပါလုပ်ဂၠိုၚ်အိုတ်တုဲ နူဏေံတေံ အခိၚ်ဇိုၚ်သဝ်တ္ၚဲဂှ် စံၚ်ဇွဂြးဇုတ်တိုပ်လဝ်ရောၚ် သ္ဂးရ။
ညးဒေသပိတၠ နူသြၚ်လောန်တိုၚ်(မ်) ဂွံအခေါၚ်တက်ကျာဂှ်လေဝ် ဒပ်ကံၚ်ဇြဳပၞာန်ဝွံ ပေါဲဗ္တိုက်ဟွံမွဲမွဲသာ် ထောံဂြာတ်ဏာလဝ်မခတိုဟ် လျိုၚ် ၅၀၀ ပံၚ် လ္တူဘာဗ္တောန်လိက် ကွာန်အိုဝ်ထုၚ်ကွေန်ဂှ် တဝ်ဝ်တုဲ ဟိုတ်နူဒှ်အခိၚ်ပံက်ဘာဂှ်တုဲ ပရေၚ်ဇီုကပိုက်ချိုတ် ဂၠိုၚ်လဝ်ရောၚ် သ္ဂးရ။
ဘာဗ္တောန်လိက် ဒးဒုၚ်ထောံလဝ်မခတိုဟ်ဂှ်ဝွံ ဒှ်ဘာသၟဝ်ဌာနဝန်ဇၞော်ပရေၚ်ပညာ အလဵုအသဳညဳသၟဟ်ဂကူ NUG မွဲတုဲ ပ္ဍဲဒေသအညာဂှ်တှ်ေ ဟိုတ်နူအကာဲအရာပရေၚ်ပၞာန်တုဲ အခိၚ်ပံက်ဘာ ဟွံတုပ်ညးသ္ကအ်ပုဟ်ဂှ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီုရုပ်− ဂကောံအုပ်ဓုပ်ညးဍုၚ်ကွာန် ပွိုၚ်ဍုၚ်ဒဳပေဝ်ယေန်