သဓီု၊ မေ ၁၄
ပ္ဍဲတွဵုရးဍုၚ်မန် အရာပ်လ္တူဍုၚ်သဓီုတံဂှ် အခိၚ်ဗ္တံမ္ဂး ဒပ်ပံၚ်ကောံကံၚ်ဇြဳပၞာန်တအ် ရပ်ဒက်ကၠုၚ်ဒၟံၚ်သၟတ်ဂမၠိုၚ် သွက်ဂွံလုပ်ယိုက်လျိုၚ်ပၞာန်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန် နွံပၟိက်ကၠုၚ်ကောန်ဒပ် သွက်တန်ဗ္တောန်ကွတ်ပၞာန် ဂၠိုၚ်ကၠုၚ်ဂှ် စနူဂိတုမေ သတ္တာဟပထမတုဲ လ္တူဍုၚ်သဓီုဂှ် တံၚ်ရပ်ကၠုၚ်ညးသၟတ် အခိၚ်ဗ္တံတံဂှ် ကၠောန်ကၠုၚ် အဆက်က်ရ။
အတိုၚ်ဂလာန် ညးဒေသသဓီုတံဂှ်မ္ဂး အပ္ဍဲဂိတုဏံ သၟတ်ဟွံအောန်နူ ၂၀ တၠ ဒးဒုၚ်ရပ်လဝ်တုဲ ဗွဲမဂၠိုၚ်ဝွံ ဟွံဂွံအဆက်ကဵုဂြောဝ်ဂတာညးတံမွဲသာ် ဒးဒုၚ်ပလံၚ်ဗစိုပ်ဒၟံၚ် ဇရေၚ်တန်ဗ္တောန်ကွတ်ပၞာန်ရ။
ကံၚ်ဇြဳပၞာန်ဝွံ ကုသၟတ် မအာကၠုၚ်တိတ်မ္ၚးအခိၚ်ဗ္တံ၊ သၟတ်နွံဒၟံၚ်ပ္ဍဲဆေၚ်စသုၚ်ကဵု ဆေၚ်အရက်ဗဳယျာတံဂှ် လုပ်စိုပ်ရပ်ဒၟံၚ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ရောၚ် ညးဒေသလ္တူဍုၚ်ဂမၠိုၚ် သ္ဂးအိုတ်ရ။
ဟိုတ်နူကံၚ်ဇြဳပၞာန် ရပ်တံၚ်ကၠုၚ်ပဝ်တာတံဂှ်တုဲ လ္တူဍုၚ်သဓီု ကြဴနူအခိၚ်ဗ္တံ ၇ နာဍဳတုဲမ္ဂး ရဲတိတ်မ္ၚးအာကၠုၚ်တရဴ စဵုကဵုဟွံမွဲ အောန်ကၠုၚ်တုဲ မိမအပ္ဍဲဒေသဂမၠိုၚ်လေဝ် ဒှ်ကၠုၚ်ဓဝိၚ် ဂၠိုၚ်ကၠုၚ်ရောၚ် ဂွံတီကေတ်ရ။
အတိုၚ်ဂလာန် တမ်ရိုဟ်ပရိုၚ်ဒပ်ဗၠာဲသၟိၚ်တံဂှ်မ္ဂး မွဲဂိတုမ္ဂး သွက်ဂွံကဵုဗၠာဲသၟိၚ်ထိၚ်အရာပ် လ္တူဍုၚ်သဓီုတံ ကောန်ပၞာန်မွဲတၠဂှ် ဒးဒုၚ်ကဵုကၠုၚ်အမိၚ်တုဲ ဗၠာဲသၟိၚ်ထိၚ်ရး မကဵုဟွံမာန်တံဂှ် ပလံၚ်ဏာမုက်ပၞာန်ဏောၚ် ဒးဒုၚ်ဘပဠလဝ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန် တန်ဗ္တောန်ကွတ်ပၞာန် နူလၟေၚ် ၁ စဵုကဵု လၟေၚ် ၁၂ ဂှ် ညးသၟတ် ဟွံအောန်နူ ၂၁၀၀ ဒးဒုၚ်ပကောံလဝ်ကောန်ပၞာန်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ