ကျာ်ထဝ်၊ မေ ၁၄
ဒပ်ကံၚ်ဇြဳပၞာန် ဆက်ထောံမံၚ်မခတိုဟ် လ္တူကွာန်ဂမၠိုၚ် မၞုံပယျဵုတွဵုရးမန်ကဵု ရးဗဂေါ အရိုဟ်တ္ၚဲအဆက်က်ရောၚ် ဂွံတီကေတ် နူဂကောံဇြဟတ်ပၠန်ဂတးဂမၠိုၚ် ပါလုပ်သီုကဵု ညးဒေသတံရ။
ဒပ်ပံၚ်ကောံ ဂကောံဇြဟတ်ပၠန်ဂတးတံ ကြဴနူဝေၚ်ပေါဲဗ္တိုက်သီဗ္ဒိုပ် ကုတမ်ဒပ်ကံၚ်ဇြဳပၞာန် ခမရ စၟတ် ၅၉၈ ဖျေံသ္ဇိုၚ်ပွိုၚ်ဍုၚ်ယှိုဲကျေန် ရးဗဂေါဂှ်တုဲ လ္ပာ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ အရိုဟ်တ္ၚဲရ။
ဗွဲတၟေၚ် ကုကွာန်မၞုံပွဳပွူ ဗ္ဒါဲတမ်ဒပ်ခမရ စၟတ် ၅၉၈ မပ္တံကဵုကွာန် ( ကွမ်းဆိပ်၊ ဝင်းကံ၊ ညောင်ခြေထောက်၊ ရှမ်းစု) တံဂှ် ကံၚ်ဇြဳပၞာန် ဗ္တိုက်ကၠုၚ်ဒၟံၚ်ကဵုပၞာန်ကျာ သာဂၠိုၚ်ရ။
ကိုဝ်အေမေန်ထောန် ညးဒုၚ်တာလျိုၚ် ဒေသပၞာန်ပါ် သ္ကုတ်သၠုၚ်ကျာ၊ ဗျူဟာပၞာန် စၟတ် ၂၇ အလဵုအသဳညဳသၟဟ်ဂကူ NUG ဂှ်တှ်ေ ဒပ်ကံၚ်ဇြဳပၞာန်ဝွံ ကြဴနူကာလပေါဲဗ္တိုက်သီဗ္ဒိုပ် ခမရ ၅၉၈ ကေုာံ ပေါဲဗ္တိုက်သီဗ္ဒိုပ်တုဲဂှ် ဗ္တိုက်လဝ်ကဵုပၞာန်ကျာ ၁၀၀ ဝါပြၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမေ ၁၃ ဂှ်လေဝ် ဒပ်ကံၚ်ဇြဳပၞာန် ထပ်ဗ္တိုက်လဝ်ကဵုပၞာန်ကျာ ပ္ဍဲကွာန်နွံပယျဵုတွဵုရးမန်ကဵု ရးဗဂေါ ကွာန်ဝေန်ကာန်ဂှ်ကဵု ပွဳပွူကွာန် (ကွမ်းဆိပ်) တံဂှ်ရောၚ် သ္ဂးရ။
အတိုၚ်တၚ်နၚ် နူကဵုခရိုၚ်သဓီု ဒပ်မဟာ (၁) ဗော်သွးကောန်ဂကူကရေၚ် KNU ဂှ်မ္ဂး အပ္ဍဲဂိတုမေဏံ ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ ညးဍုၚ်ကွာန်ကောန်အရာပ် ဇီုကပိုက်ဒး ဟွံအောန်နူ ၁၀ တၠ နွံကၠုၚ်တုဲ သ္ၚိ ၃၀ မပြၚ် ပၟတ်တူလီုအာလဝ်ရ။
ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ ကွာန်မၞုံပယျဵုတွဵုရးမန်ကဵု ရးဗဂေါ ဟွံအောန်နူၜိုတ် ၂၀ ကွာန်ဂှ် လၟိဟ်မၞိဟ်မွဲဠက်ပြၚ် ဒးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံလေဝ် ဆက်သၠုၚ်တိုန်ကၠုၚ်မံၚ်ရောၚ် ဂွံတီကေတ် ဇရေၚ်ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNU