နျူဒေလဳ၊ မေ ၁၄
အနာဂတ်ဂတတေံ ယဝ်ပရေၚ်ဗ္တိုက်ပကီုပရာပ်မွဲမွဲ ဒှ်ကၠုၚ်မ္ဂး ခၠေဝ်ပလန်အာ နကဵုဇြဟတ်ခိုဟ်ဟ်ဏောၚ်ဂှ် သ္ကိုပ်ဝန်ဇၞော် နရာန်ဒရာမိုဝ်ဒဳ ဟီုလဝ် ပ္ဍဲဂိတုမေ ၁၂ တေံရ။
မွဲအခိၚ် ယဝ်က္တဵုဒှ်ပဋိပက္ခ ကုပါကေဿတာန်မ္ဂး နကဵုနျူဒေလဳ အေၚ်ဒုၚ်အာ လ္တူပရေၚ်ဓရတ် နကဵုနျူကလဳယျာတံ ဟွံသေၚ်ပုဟ်ဂှ်လေဝ် သ္ကိုပ်ဝန်ဇၞော် မိုဝ်ဒဳ ကဵုလဝ်သတိရ။
အကြာဍုၚ်ဇိုၚ်ဝုတ်ဒိုဟ်ၜါဍုၚ် မပိုၚ်ပြဳလဝ် လွဟ်နျူကလဳယျာဂှ် ကြဴနူသၞာံ ၁၉၉၉ တုဲ နဒဒှ်ပရေၚ်ဗ္တိုက်ပရေံအိုတ်ဂှ် ဗ္တိုက်လဝ်ကဵု က္ၜၚ်ကျာဗ္တိုက်၊ ကမ်လှောဝ်၊ ဒရုၚ်၊ လွဟ်ဇၞော်ဂမၠိုၚ် ပွိုၚ်ပန်တ္ၚဲ ဗွဲမသ္ကာတ်မြဟ်ရ။
ပရေၚ်ဒေါအ်ပန်ပှော် ပွိုၚ်မွဲသတ္တာဟ နူသမ္မတအမေရိကာန် ဒဝ်နေဝ်ထြာမ် မလုပ်အကြာပ္ညဳကဵုလဝ်ဂှ်ဝွံ စဵုကဵုဂိတုမေ ၁၂ ဏံ ရံၚ်ကေတ်ဗီုပြၚ် ဒ္ဂေတ်ဗက်မၚ်မွဲလဝ်တၚ်တုပ်စိုတ်ဂှ်ရ။
ဟိုတ်နူအမေရိကာန် လုပ်အကြာပသောၚ်ကလးကဵုလဝ်တုဲ ပြဟ်ဒုၚ်စဵုဒၞါဂွံ ပေါဲပၞာန်နျူကလဳယျာဇၞော်မွဲရောၚ် သမ္မတထြာမ် ဟီုလဝ် ပ္ဍဲဂိတုမေ ၁၂ တေံရ။
ပေါဲပၞာန်နျူကလဳယျာ မၞိဟ်ဂၠိုၚ်ကဵုပြကောဋိကိုဋ် မဒးအိုတ်လမျီုမာန်မွဲဂှ် ဟိုတ်နူညးတံ တာဒၞါကဵုမာန်လဝ်တုဲ ဒဒှ်ရကေတ်ဂုန်စရာဲဂှ် ထြာမ် ဟီုလဝ် ကုအ္စာပရိုၚ်ဂမၠိုၚ် ပ္ဍဲသ္ၚိဗုရ။
မိုဝ်ဒဳဂှ်တှ်ေ ဟီုလဝ်ဂလာန် ဗလးကၠုၚ် နူကဵုထဳဝဳ ဒဒှ်ရပါကေဿတာန် ဟွံဘိုၚ်ရီုဗၚ် သွက်ဂွံဗ္တိုက်သ္အး သၟာပကီုပရာပ်တံဂှ်တုဲ ရုဲစှ်လဝ် သွက်ဂွံဗ္တိုက်ညးတံ မဒှ်ရ။
ပ္ဍဲဒေသကာတ်ယှမဳယျာ အိန္ဒိယ အုပ်ဓုပ်လဝ်ဂှ် ကြဴနူပရေၚ်ဗ္တိုက်ပွပကီုပရာပ် ကောန်အရာပ် ၂၆ တၠ လမျီုဒးအိုတ်အာ ပ္ဍဲဂိတုဨပရဴတေံတုဲဂှ် အိန္ဒိယ ဗ္တိုက်ကၠုၚ်လဝ် ဒၞါဲပွန်သၟာပကီုပရာပ်ဂမၠိုၚ် မၞုံအပ္ဍဲဍုၚ်ပါကေဿတာန်ဂှ်ရ။
လ္ပာ်ပါကေဿတာန် ဟီုလဝ် ပန်ဖျေံဂွံလဝ် က္ၜၚ်ကျာအိန္ဒိယကီုလေဝ် လ္ပာ်အိန္ဒိယဂှ်တှ်ေ ခၠေဝ်ပလန်ကၠုၚ်လဝ် ဒဒှ်ရညးဒဳက္ၜၚ်ကျာညးတံ ကလေၚ်စိုပ်ကၠုၚ်သီုဖအိုတ်ရ။
ပ္ဍဲကဵုပရေၚ်ဗ္တိုက် ဂိတုဨပရဴ ၂၂ ဂှ် အတိုၚ်အိန္ဒိယ စောဲစပ်လဝ်ဂှ် ညးတံပါလုပ်ဆက်စပ် ဟွံမွဲဂှ်ကီု၊ သွက်ဂွံကၠောန်သ္ပ ပရေၚ်ဂၠိုက်ဂၠါဲစၟဳတ် ဗွဲမဗၠးၜးတံဂှ် ပါကေဿတာန် ဟီုလဝ်ရ။
အိန္ဒိယ ဟွံဒုၚ်တဲတုဲ ဗ္တိုက်ကၠုၚ်လဝ်ဂှ်ရ ပါကေဿတာန်ဝွံလေဝ် ကလေၚ်ဗ္တိုက်လဝ်ရ။
ပ္ဍဲဂိတုမေ ၁၃ ဂှ် သ္ကိုပ်ဝန်ဇၞော် ပါကေဿတာန် မိုဝ်ဟာမက် ယှဳဗာတ် လလောၚ်တြးကၠုၚ် ဒဒှ်ရပရေၚ်ပၞာန်ညးတံ အံၚ်ဇၞးအာလဝ်ဂှ်ရ။
ပရေၚ်အံၚ်ဇၞးသာ်ဏံဂှ်လေဝ် လၟေၚ်သၞာံ စိုပ်ဂိတုမေ ၁၀ မ္ဂး ကၠောန်ဗဒှ်အာ သ္ဘၚ်ပေါဲအံၚ်ဇၞးဏောၚ် သာ်ဝွံ သ္ကိုပ်ဝန်ဇၞော်ဂှ် ဟီုလဝ်ရ။
Ref: AFP