ခေတ္တမာန်ဒူ၊ ဂျောန် ၁
ပ္ဍဲဂိတုမေ စၟတ်တ္ၚဲ ၃၀ လ္တူဍုၚ်ဇၞော် ခေတ္တမာန်ဒူဂှ် ကောန်ဍုၚ်နဳပဝ် ဂၠိုၚ်ကဵုလ္ၚီ ဇက်ဂၠေါဲတိုန်တုဲ သွက်ဂွံကလေၚ်စွံအာ သၞောတ်ဨကရာဇ်ဂှ် ကညာၚ်ကရေဲလဝ် ရမျာၚ်ကမြေဲ မထံက်ဂလာန် ကုဨကရာဇ် ဒးဒုၚ်ပလှ်ဖျေံလဝ် လောန်ကၠုၚ် ၁၇ သၞာံတေံရ။
ကြဴနူကၠတ်ထဝ် ပလီုကၠေံ သၞောတ်ဨကရာဇ် နဒှဒ်တၚ်တုပ်စိုတ်ပရေၚ်ၜိုဟ်လလမ် မဖအိုတ်ကၠေံ ပၞာန်အပ္ဍဲဍုၚ်ပွိုၚ်စှ်သၞာံပြၚ် လၟိဟ်မၞိဟ် ၁၆၀၀၀ ပြၚ် မဒးချိုတ်အာလဝ်ဂှ်တုဲဂှ် ကၟိန်ဍုၚ်ညးမရှ်ေသှ်ေဘာသာဟိန္ဒူ မၞုံဗွဲမဂၠိုၚ်ဂှ်ဝွံ ပ္ဍဲသၞာံ ၂၀၁၈ ဂှ် ဒှ်ကၠုၚ်ဍုၚ်ပရေၚ်ဍုၚ်ကွာန် ဗွဲတၞဟ်ခြာရ။
စပ်ကဵုပရေၚ်ဍုၚ်ကွာန် ဟွံညိၚ်ဝတ်၊ ဒ္ဂေတ်ပဋိပတ်လီု စလာပ်သ္ကာ ကေုာံ ပရေၚ်ပိုန်ဒြပ်တောတက် လဇုဲလဇဂှ်တုဲ ပ္ဍဲဍုၚ်နဳပဝ်ဂှ် အရာဟွံပြေစိုတ် ဂၠိုၚ်ကၠုၚ်တုဲ အခိၚ်မၞိဟ်ထံက်ဂလာန် လ္တူဨကရာဇ် ဂၠိုၚ်ကၠုၚ်ဂှ် ပေါဲထ္ၜးဆန္ဒ ဂိတုမေ စၟတ်တ္ၚဲ ၃၀ ဂှ်ဝွံ ထ္ၜးပျးကၠုၚ် ပရေၚ်ထံက်ဂလာန် လက္ကရဴအိုတ်ရ။
ညးမထ္ၜးဆန္ဒဂမၠိုၚ်ဝွံ ဨကရာဇ်ကလေၚ်ကၠုၚ်တုဲ ရီုဗၚ်ကဵုဍုၚ်ကွာန်ညိ သာ်ဝွံ ကရေဲကညာၚ်လဝ် ဗွဲမညဳသၟဟ်ရ။
နကဵုညးတအ် နွံပၟိက်ဒၟံၚ်ကဵု သၞောတ်ဨကရာဇ် မဆေၚ်စပ်ကဵုသၞောဝ်သ္ဇိုၚ်ဥပဒေတုဲ ဒးဗ္တိုက်သရိုဟ် ပရေၚ်ဒ္ဂေတ်လီု စလာပ်ဗဇဴတံဏောၚ်ဂှ် ပရာမ် ဗဟာဒူမာဂါ အာယုက်မၞုံ ၅၈ သၞာံဂှ် ဟီုရ။
ဒပ်ဗၠာဲသၟိၚ် ဗ္တိုက်သရိုဟ်ပွပကီုပရာပ်ဂှ် မၚ်ရံၚ်ဒၟံၚ်ကီုလေဝ် အပ္ဍဲပေါဲထ္ၜးဆန္ဒဂှ် ပရေၚ်ပကီုပရာပ်မွဲမွဲ ဒှ်အာလဝ်ဂှ် ဟွံမွဲရ။
လောန်ကၠုၚ် ၁၇ သၞာံတေံ ဒဒှ်ရဇကုတိတ်ဂၠံၚ် ထ္ၜးလဝ်ဆန္ဒ သွက်ဂွံပလှ်ဖျေံဨကရာဇ်ဂှ် ပါလုပ်လဝ်ကီုလေဝ် လၟုဟ်ဂှ် စိုတ်ဟွံခိုဟ်ဒှ်ဒၟံၚ်တုဲ ဨကရာဇ်ဝွံ ခိုဟ်နူက္ဍိုပ်သ္ကိုပ်ဒ္ဂေတ်လီုလၟုဟ်တံဏံ တၟာဂလိုၚ်ဏောၚ် ဒဒှ်ရဂွံဒုၚ်စသိုၚ်ဂှ် ဗဟာဒူ ဟီုလဝ်ရ။
ဗော်သ္ကိုပ်ဝန်ဇၞော် ကေပဳ ယှာမာ အိုဝ်လဳ ဗော် CPN-UML မဒှ်ဗော်ပတှ်ေဝါဒမက်ခ်ဂှ် ကၠောန်သ္ပလဝ်ပေါဲဇက်ဂၠေါဲတိုန် သွက်အသေအဟာန်တ္ၚဲကၟိန်ဍုၚ်တုဲ ဂွံမွဲတ္ၚဲဂှ် ပေါဲထ္ၜးဆန္ဒသာ်ဏံ မံက်တိတ်ကၠုၚ်လဝ်ရ။
ညးထံက်ဂလာန်ဗော်ဂွံအဝဵုဂမၠိုၚ်ဂှ်တှ်ေ ဒဒှ်ရပရေၚ်အာတ်မိက် ညံၚ်ဂွံကလေၚ်စွံသၞောတ်ဨကရာဇ်ဂှ် အံၚ်ဇၞးဟွံမာန်ပုဟ်ဂှ် ဟီုလဝ်တုဲ ကောန်ဍုၚ်ဗွဲမဂၠိုၚ် နွံပၟိက်ကဵုသၞောတ်လၟုဟ်ရောၚ် ဟီုဂးဒၟံၚ်အိုတ်ရ။
ပ္ဍဲဂိတုမာတ်တုဲကၠုၚ်တေံ ဂကောံဒပ်ဗၠာဲသၟိၚ် ရပ်စပ်မခတိုဟ်ဍာ်ရမတ် ပ္ဍဲပေါဲထ္ၜးဆန္ဒ ညးမၞုံပၟိက်ကဵုဨကရာဇ်တံဂှ်တုဲ ပါ်ထ္ကးလဝ် ဂကောံမၞိဟ်တုဲ မၞိဟ်ၜါတၠ ချိုတ်တုဲ ၁၀၀ ပြၚ် ဒးဒုၚ်ရပ်လဝ်ရ။
ဨကရာဇ်ဍုၚ်နဳပဝ် လက္ကရဴအိုတ် မၞုံယၟုဂျဳယာနန္ဒရာယှာဂှ် ဒဒှ်ရစိုတ်ဟွံမိပ် သွက်ပေါဲထ္ၜးဆန္ဒပကီုပရာပ်ဂှ် ဂွံမွဲဂိတုတုဲ ဟီုလဝ်ကီုလေဝ် ညးထ္ၜးဆန္ဒဂမၠိုၚ် ထံက်လဝ်ဂလာန်ရ။
ကြဴနူညးမဒှ်ကော မၞုံယၟု ဗူရေန် ဗဳကရာမ်ယှာ ကေုာံ ဂြောဝ်ဂတာညး ဒးဒုၚ်ပြိုက်ဂစိုတ် အပ္ဍဲပရေၚ်ဂစိုတ်ဂယိုၚ်ကဵုဂအုံဗွဝ် ပ္ဍဲနန်ဨကရာဇ်ဂှ်တုဲဂှ် ဨကရာဇ် ဂျဳယာ နန္ဒရာယှာ တိုန်လဝ်နန် ပ္ဍဲသၞာံ ၂၀၀၁ ရ။
Ref: AFP