ဗဴဂြုက်၊ မေ ၃၁
မဟာမိတ်ညးတအ် သာဗဳယျာဂှ် ပလံၚ်ပ္တိုန်လွဟ် ပ္ဍဲယူကရုၚ်တုဲ လက္ကရဴစးညးတအ်ဂှ် ထ္ပက်ဒၟံၚ်ကဵုၜုန်ရောၚ် ရုယှာ စောဲစပ်လဝ် ပ္ဍဲဂိတုမေ ၂၉ တေံရ။
သၞာဲဒဴဗဴဂြုက်ဂမၠိုၚ် မံၚ်အကြာရောၚ် လလောၚ်တြးလဝ်ကီုလေဝ် ကမၠောန်ကာစဵုဒၞါသာဗဳယျာ ဆက်ပလံၚ်ဗစိုပ်ကဵုဒၟံၚ် မကမ်လွဟ်လက်နက် ကုယူကရုၚ်ရောၚ် ဌာနထံၚ်ပရိုၚ်ဍုၚ်သ္အာၚ် ရုယှာ SVR ထ္မံက်ထ္ၜးလဝ် ပ္ဍဲတၚ်လလောၚ်တြးမွဲရ။
သာဗဳယျာ ပလံၚ်ဗစိုပ်ဒၟံၚ်လွဟ်လက်နက် ကုယူကရုၚ် နူကဵုဍုၚ်မလုပ်ဂကောံနေတိုဝ် မဒှ်ဍုၚ်မံၚ်အကြာ ဗွဲတၟေၚ် ကၟိန်ဍုၚ်ပံၚ်ကောံချက်၊ ပဝ်လာန် ကေုာံ ဘူဂေရဳယျာတံဂှ် မွဲကဆံၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သွက်တၚ်ရန်တၟံဏံဂှ် သာဗဳယျာဝွံ တုဲကၠုၚ်ခြာဟွံလအ်တေံ ကေၚ်ရပ်စပ်စကာကၠုၚ်လဝ် ဍုၚ်အာဖရိကဂမၠိုၚ်ရောၚ်ဂှ်လေဝ် ဌာနထံၚ်ပရိုၚ်ကာဍုၚ်သ္အာၚ် ရုယှာ စောဲစပ်လဝ်ရ။
စပ်ကဵုတၚ်စောဲစပ် ပလံၚ်ဗစိုပ်ကဵုဒၟံၚ်လွဟ်လက်နက် ကုယူကရုၚ်ဂှ်တုဲ တုဲကၠုၚ်ခြာဟွံလအ်ဏီဂှ် သဳကၠဳလဝ်ကဵု သမ္မတရုယှာ ဗလာဒဳမာပူတေန်တုဲ လွဟ်သာဗဳယျာ နနဲကဲသာ်လဵု ဂွံစိုပ်မံၚ်မုက်ပၞာန်ယူကရုၚ်ရောဟီုဂှ် သွက်ဂွံဒက်ပ္တန်ဂကောံဂၠိုက်ဂၠါဲပံၚ်တောဲၜါဍုၚ်ဂှ် တုပ်လဝ်စိုတ်ရောၚ် သမ္မတ သာဗဳယျာ မၞုံယၟုအလက်ဇြာန်တာ ဗူဗေတ် ဟီုလဝ် ကုဌာန်ပရိုၚ် RTS ကၟိန်ဍုၚ်ပိုၚ်ရ။
သာဗဳယျာ ပလံၚ်ပ္တိုန်ဒၟံၚ်လွဟ်လက်နက်မကမ် ခေတ်သဵုဗဳယေတ်တေံ ဇရေၚ်ယူကရုၚ်ဂှ် သီုညးဖအိုတ် ဂွံတီကေတ်လဝ် နူသၞာံ ၂၀၂၃ တေံကီုလေဝ် SVR မူဟိုတ် ဂွံပ္တိုန်ကၠုၚ်ဒုဟ် အခိၚ်လၟုဟ်ရောဟီုဂှ် ဟွံဂွံတီကေတ် သောၚ်ၚ်ကၠးကၠးဏီရ။
ပလံၚ်ဗစိုပ်လဝ်ယူကရုၚ် ကမ်လှောဝ်ဂၠိုၚ်ကဵုလ္ၚီဟာ ဒဒှ်ရမိက်ဂွံတီဂှ် ပ္ဍဲဂိတုမာတ်တေံ မဝ်သကိုဝ် အာတ်မိက်လဝ်တုဲ ပလံၚ်ပ္တိုန်လဝ်လွဟ် ဇရေၚ်ယူကရုၚ်ဟွံမွဲပုဟ်ဂှ် သာဗဳယျာ ကယျာန်ပါဲလဝ်ရ။
လွဟ်လက်နက်တံဏံဝွံ သွက်ဂွံပြိုက်ဂစိုတ် ကောန်ပၞာန်ရုယှာတုဲ ရန်တၟံညံၚ်အဝဲအၚ်္ဂဇိုၚ်တဲ ဂွံလီုလာ်ဂှ်ရ သာဗဳယျာ ထ္ပက်မံၚ်လက္ကရဴစး ကဵုၜုန်ဏောၚ်ဂှ် ထံၚ်ပရိုၚ်ရုယှာ ဟီုရ။
သမ္မတဗူဗေတ်ဂှ်တှ်ေ နကဵုသာဗဳယျာ မိက်ဂွံလုပ်စိုပ် သမဂ္ဂယူရောပ်ရောၚ် ဟီုလဝ်ကီုလေဝ် ထိၚ်ဒဝ်လဝ် ပရေၚ်ဆက်ဆောံ ကုရုယှာတုဲ တုဲကၠုၚ်ခြာဟွံလအ်ဂှ်ရ တိုန်စိုပ်လဝ် အသေအဟာန်ရုယှာ ဂွံပေါဲအံၚ်ဇၞး လ္တူနာဇြဳ ဂျာမနဳ အပ္ဍဲပၞာန်ဂၠးကဝ်ဒုတိယ မကၠောန်ဗဒှ်လဝ် ပ္ဍဲမဝ်သကိုဝ်ဂှ်ရ။
Ref: AP