ပွမပတိုန်စရၚ်စၟတ်သမ္တီ ညးတၠဒဒိုက် နွံမလေဝ်ယှာတံဂှ် UNHCR ဒေါအ်လဝ်

ကွာလာလမ်ပူ၊ နိုဝမ်ပါ ၂၀

သွက်သ္ဂောံဂွံအာ ပရေၚ်စ္ၜုဲစ္ၜော် ညးဂစာန်မံၚ်တံဂှ် နကဵုနဲကဲဇကု ရပ်စပ်သောၚ်ကလးရောၚ် အလဵုအသဳမလေဝ်ယှာ ဖျေံသ္ဂုတ်တုဲ ဗွဲကြဴဏံ အစဳဇန်ကမၠောန် ပွမပတိုန်စရၚ်စၟတ်သမ္တီ ညးတၠဒဒိုက် နူကဵု ရုၚ် UNHCR မလေဝ်ယှာတံ ဒေါအ်ထောံရဂှ် လလောၚ်တြးရ။

မူဝါဒပရေၚ်စဳရေၚ်ဖန်ဖက် လ္တူညးကၠုၚ်အာတ်မိက် လုပ်ဗ္ဒဗ္ဒာဲစ္ၜုဲစ္ၜော်တံ ဇြဟတ်ညံၚ်ဂွံခိုဟ်တိုန်အာ အလဵုအသဳမလေဝ်ယှာ ဂစာန်ကၠောန်မံၚ်ဂှ် ထံက်ဂလာန်ပေၚ်ၚ်ရောၚ် UNHCR ဟီုရ။

သွက်ဂွံဆက်ကဵုအာအရီုဗၚ် ညးတၠဒဒိုက်တံ စပ်ကဵု ဗီုတိထ္ၜးဂၠံၚ်မွဲနဲပၠန်ဂှ် ဆက်တုဲပ္ညဳပ္ညပ်မံၚ်ဖိုဟ်ဂှ် UNHCR ဟီုရ။

အတိုၚ်ဗီုတိထ္ၜးဂၠံၚ် ပတိုန်လဝ်ဂှ်မ္ဂး အကြာဂကောံဆေၚ်စပ်ဖအိုတ်တံ ပရေၚ်ဆက်စၠောံ ဂပ်ဂဝ်ထေက်ကြိုက်ကဵု ပရေၚ်မၚ်မွဲရံၚ်စံၚ်တံ ကေုာံ သွက်ဂွံကၠောန်အာ ပရေၚ်ပံၚ်တောဲတံဂှ် UNHCR လလောၚ်တြး ပ္ဍဲကဵုနိုဝမ်ပါ ၁၈ ဂှ်ရ။

ဍုၚ်မလေဝ်ယှာ ထပက်လဝ်လိက်ကသုက်တၚ်တုပ်စိုတ် ကုလသမဂ္ဂ ဆေၚ်စပ်ကဵုပရေၚ်တၠဒဒိုက်တံ ဟွံသေၚ်ကီုလေဝ် လ္တူ ညးဂစာန်မံၚ် ပရေၚ်ဗ္ဒဗ္ဒာဲစ္ၜုဲစ္ၜော်တံဂှ် ရဲဆုဲပြံၚ်ကၠုၚ် ဟွံလုပ်သၞောဝ်ရောၚ် သမ္တီစွံလဝ်ရ။

အခိၚ်ကၠာတေံ နူကဵုဂကောံ UNHCR ပတိုန်စၟတ်သမ္တီ၊ ကဵုအရီုဗၚ် ဂကူရိုဟေၚ်ဂျာ မူသလေန် ညးတၠဒဒိုက် နူကဵုဍုၚ်ဗမာ စိုပ်မလေဝ်ယှာတံရ။

ညးဆုဲပြံၚ်အာတ်မိက်လဝ် လုပ်ဗ္ဒဗ္ဒာဲစ္ၜုဲစ္ၜော်တံ ယဝ်ရ ကလေၚ်ပလံၚ်ဖျဴဍုၚ်ဗမာမ္ဂး ဒှ်အန္တရာဲမာန်ရေၚ် ဂကောံအခေါၚ်အရာမၞိဟ်တံ ဟီုဂးလဝ်ကီုလေဝ် ပလံၚ်ဖျဴလဝ် ညးတၠဒဒိုက်ဍုၚ်ဗမာ စိုပ်မလေဝ်ယှာတံရ။

ကလေၚ်ပလံၚ်ဖျဴလဝ်ကဵု ၜၚ်နူကဵုဍုၚ်ဗမာတံဂှ် သ္ကိုပ်ဝန်ဇၞောဝ်မလေဝ်ယှာ အာန်ဝါ ဟီုရ။

သီုကဵုကၠောန်မံၚ် အစဳဇန် ပလံၚ်ဖျဴမံၚ် ညးတၠဒဒိုက်တံကီု နူကဵုလဝက ဒပ်ဗၠာဲသၟိၚ်မလေဝ်ယှာတံ ဗက်ဂၠာဲရပ်မၞိဟ်တံဂှ် ဂၠိုၚ်တိုန်ကၠုၚ်ရ။

အခိၚ်ကောန်ဍုၚ်မလေဝ်ယှာတံ ဒစဵုဒစးမံၚ် ရဲဆုဲပြံၚ်စိုပ်ကၠုၚ်တံ ဇြဟတ်ဇၞော်တိုန်ကၠုၚ်ဏံ သွက်ဂွံကလေၚ်စဴဌာန်ညးတံ အလဵုစိုတ်ညးတၠဒဒိုက်တံ ဖျေံလဝ်သ္ဂုတ်သွာတ်ဂှ် အလဵုအသဳမလေဝ်ယှာ ဟီုရ။

ညးတၠဒဒိုက် နွံမလေဝ်ယှာ အာတ်လဝ်အခေါၚ် လုပ်ဗ္ဒဗ္ဒာဲစ္ၜုဲစ္ၜော် နွံ ၁၉၀၀၀၀ တံ ပိဂအုံၜါဂအုံဂှ် ဒှ်ဂကူရိုဟေၚ်ဂျာရောၚ် ကုလသမဂ္ဂ ဟီုလဝ်ရ။

Ref:Reuters

Leave a Reply

Your email address will not be published. Required fields are marked *