ဖဏံဖေန်၊ ဂျောန် ၄
အပ္ဍဲကဵုပရေၚ်ဗ္တိုက်ပန်ပှော်ပယျဵု မက္တဵုဒှ်လဝ် တုဲကၠုၚ်ဟွံလအ်ဂှ် ကောန်ပၞာန်ကာမ္ဗောဒဳယျာမွဲတၠ ချိုတ်အာလဝ်တုဲ ကြဴနူဂှ်တုဲ ဒဒှ်ရတေၚ်လဝ် ပရေၚ်မဒှ်လဝ်ကယျာန်ဓဝါတ်ပယျဵု ကုဍုၚ်သေံ ဇရေၚ်ရုၚ်သၞောဝ်ဓဝ်ဍုၚ်သ္အာၚ် ICJ ဂှ် သ္ကိုပ်ဝန်ဇၞော်ကာမ္ဗောဒဳယျာ ဟောန် မာနက် ဟီုလဝ် ပ္ဍဲဂိတုဂျောန် ၂ တေံရ။
စပ်ကဵုပရေၚ်ဟွံချိုတ်ပၠိုတ် ပ္ဍဲပယျဵုဂှ်တုဲ ညံၚ်ပရေၚ်ဗ္တိုက်မွဲဝါပၠန် ဟွံဂွံထပ်ဒှ်ဂှ် ဍုၚ်သေံ ပံၚ်တောဲကဵုကာမ္ဗောဒဳယျာတုဲ သွက်ဂွံသောၚ်ကလးပရေင်ဏံ ပ္ဍဲ ICJ ဂှ် ဒဒှ်ရညးတံစၟဳစလဝ်ဂှ် သ္ကိုပ်ဝန်ဇၞော် ဟောန်မာနက် ဟီုလဝ် အခိၚ်ဆဵုဂဗကဵု အမာတ်ကၠတ်ထဝ်ဂမၠိုၚ်ရ။
အကြာဍုၚ်ဇိုၚ်ဝုတ်ဒိုဟ်ၜါဏံ ကြဴနူပဋိပက္ခပရေၚ်ပၞာန် သၞာံ ၂၀၀၈ တေံတုဲဂှ် သၞာံဗွဲမလအ်လ ဒှ်ကၠုၚ်လဝ် ပေါဲဗ္တိုက်မွဲဏှမွဲဏှတုဲ မၞိဟ် ၂၈ တၠ ဒးချိုတ်အာလဝ်ရ။
ပ္ဍဲကဵုဒေသရတ်မြပိတၠၚ် ဒၞါဲဍုၚ်ကာမ္ဗောဒဳယျာ၊ သေံ၊ လာအိုဝ်တံ ဇီုဒးဂှ် ပ္ဍဲဂိတုမေ ၂၈ တေံ ကောန်ပၞာန်သေံကဵု ကောန်ပၞာန်ကာမ္ဗောဒဳယျာ ဒှ်လဝ်ပန်ပှော်ညးသ္ကအ်တုဲ ကောန်ပၞာန်ကာမ္ဗောဒဳယျာမွဲတၠ ချိုတ်အာလဝ်ရ။
ပရေၚ်ဒဒှ် ညးတံဟွံဂၠါဲသၞမွဲသာ် မဒးဒုၚ်ဗ္တိုက်လဝ်ဂှ် သွက်ဂွံဂၠိုက်ဂၠါဲစၟဳတ်ကဵု ချိုတ်တ်ပၠိုတ်တ်ဂှ် ဌာနဝန်ဇၞော်ကာဍုၚ်သ္အာၚ် ကာမ္ဗောဒဳယျာ အာတ်မိက်ချူပလံၚ်လဝ်လိက် ဇရေၚ်ရုၚ်ကလုတ်သေံ မၞုံဍုၚ်ဖဏံဖေန်ရ။
ပြဝကောန်ပၞာန်သေံတံဝွံ ဒဒှ်ရဝးပ္ကဝ် အဝဵုစၟိန်ပြမာန် ကာမ္ဗောဒဳယျာဂှ်ကဵု သွက်ဂွံသောၚ်ကလး ဗွဲလၟေၚ်ပရေၚ်ကလုတ်တမာန် ဗွဲမၜိုဟ်လလမ် ဒဒှ်ရကဵုလဝ်ကတိဂှ် ကာမ္ဗောဒဳယျာ ဟီုရ။
ကိစ္စဏံဂှ် ယဝ်ဍုၚ်သေံ ဟွံတုပ်စိုတ် သွက်ဂွံသောၚ်ကလး ပ္ဍဲ ICJ ပုဟ်ဟီုမ္ဂး နကဵုကာမ္ဗောဒဳယျာ ပံက်အာဂဗုတ် ပ္ဍဲရုၚ်သၞောဝ်ဂှ်ဏောၚ် သ္ကိုပ်ဝန်ဇၞော် ဟောန်မာနက် ဟီုကၠုၚ်ရ။
ပရေၚ်ကယျာန်ဓဝါတ်ပယျဵုဂှ်ဝွံ ဒှ်ကၠုၚ် ဟိုတ်နူဂကောံမစိုပ်တၞုၚ်တၞး ဂကောံဍောတ်တ် နူကဵုသီုၜါဍုၚ်ဂှ်ဏောၚ်တုဲ ပရေၚ်ဗ္တိုက်ဂမၠိုၚ် ထပ်တုဲ ဒှ်ကၠုၚ်မာန်ရောၚ် ဟောန်မာနက် ဟီုရ။
စပ်ကဵုဂလာန်သာ်ဏံတုဲ ဌာနဝန်ဇၞော်ကာဍုၚ်သ္အာၚ်သေံ မုဟွံဂွံဟီုဏီရ။
ဒပ်ပၞာန်ကာမ္ဗောဒဳယျာဂှ်တှ်ေ ညးတံ စဒးဒုၚ်ဗ္တိုက်လဝ်ကၠာရောၚ် ဟီုလဝ်တုဲ ဒပ်ပၞာန်သေံဂှ်တှ်ေ ခၠေဝ်ပလန် ကုပရေၚ်ပန်ပှော်ကဵုသၞာတ်ဂှ်တုဲ ပန်လဝ်ရောၚ် ဟီုရ။
ပရေၚ်ပန်ပှော်ဒှ်တုဲ တ္ၚဲယးဂတဂှ် သ္ကိုပ်က္ဍိုက်ပ်ပၞာန် ကာမ္ဗောဒဳယျာကဵု သ္ကိုပ်က္ဍိုက်ပ်ပၞာန်သေံတံ ဆဵုဂဗတုဲ တုပ်လဝ်စိုတ် သွက်ဂွံဖဍိုန်ဖျေံ ပရေၚ်ကြံၚ်မ္ၚိုဟ်ဝွံရ။
Ref: AFP