သဵု(လ်) ၊ ဂျောန် ၅
အပ္ဍဲပေါဲရုဲမာဲသမ္မတ ကိုဝ်ရဳယျာသၠုၚ်ကျာ မကၠောန်ဗဒှ်လဝ် ပ္ဍဲဂိတုဂျောန် ၃ တေံဂှ် လဳဂျေမျံၚ် မဒှ်အလံၚ်ညးစၞး ဗော်လေတ်ဗရဴ ဂွံဒုၚ်ရုဲစှ်ပ္တိုန်လဝ် နဒဒှ်သမ္မတရ။
အခိၚ်ရိုဟ်မာဲ ၁၀၀ တၟံကၠံတုဲဂှ် လဳဂျေမျံၚ်ဝွံ ပ္ဍဲကဵုညးမကဵုမာဲ ဗ္ဒါဲ ၃၅ ပြကောဋိကိုဋ်ဂှ် ကလိဂွံလဝ်ပရေင်ထံက်ဂလာန် ၄၉ ဒဿမ ၄၂ တၟံကၠံရ။
ကေန်မန်သူ ကောန်သာဗေတေဗ် မဒှ်လ္ပာ်ဒစဵုဒစးဂှ်တှ်ေ ကလိဂွံလဝ် ၄၁ ဒဿမ ၁၅ တၟံကၠံရ။
ပ္ဍဲကိုဝ်ရဳယျာသၠုၚ်ကျာ ပ္ဍဲကဵုပေါဲရုဲမာဲသမ္မတ ကြဴနူသၞာံ ၁၉၉၇ တုဲဂှ် ညးမပါလုပ်ကဵုမာဲ ဒှ်လဝ်လၟိဟ်ဂၠိုၚ်အိုတ်ရောၚ် ကမ္မယှေန်ပေါဲရုဲမာဲကောန်ဂကူ ဟီုရ။
လဳဂျေမျံၚ် မဂွံဇၞးလဝ် ပ္ဍဲပေါဲရုဲမာဲဂှ် ပ္ဍဲဂိတုဂျောန် ၄ တေံ ကမ္မယှေန်ပေါဲရုဲမာဲကောန်ဂကူ သ္ပဒတန်လဝ် နဒဒှ်သမ္မတ ဗွဲမလုပ်သၞောဝ်တုဲ သီုကဵုသ္ပဒတန်ကဵုလဝ် နဒဒှ်ဂအုပ်က္ဍိုက်ပ်ပၞာန်ရ။
လဳ ညးမဒှ်ကၠုၚ်သမ္မတတၟိဏံ ညံၚ်ပရေၚ်ပိုန်ဒြပ်ကၟိန်ဍုၚ် ဂွံကလေၚ်ဂျိုၚ်တဴဂှ် ကုကိုဝ်ရဳယျာသၟဝ်ကျာ မဒှ်ဍုၚ်ဇိုၚ်ဝုတ်ဒိုဟ် မပိုၚ်ပြဳလဝ် လွဟ်နျူကလဳယျာဂှ် နူပွမသဳကၠဳ ကေုာံ ပွမကဵုဇြဟတ်ဓရိုဟ်ဂှ်မွဲကဆံၚ် ညံၚ်ဂွံဂွံပရေၚ်ၜိုဟ်လလမ်ဂှ် ပ္တိတ်အာဇြဟတ်ဏောၚ် ကဵုလဝ်ကတိရ။
သမ္မတကိုဝ်ရဳယျာသၠုၚ်ကျာ ယောန်သက်ယောဝွံ စပ်ကဵုတၚ်လလောၚ်တြး ပရေၚ်အုပ်ဓုပ်ပၞာန်ဂှ်တုဲ ဒးဒုၚ်စောဲစပ် ပ္တိုန်လဝ်ဒုဟ်တုဲ ရုၚ်သၞောဝ်ဓဝ်ကၟိန်ဍုၚ်ဂှ်တှ်ေ ကၠာတာလျိုၚ်ညး ဟွံပေၚ် ၅ သၞာံဂှ် ပ္တိတ်ထောံလဝ်ညးရ။
ကောန်သာဗေတေဗ် ကေန် ညးမဒှ်လ္ပာ်ဒစဵုဒစးဂှ်ဝွံ ပ္ဍဲလက်ထက်သမ္မတတြေံ ယောန်ဂှ် ကေၚ်ကေတ်လဝ်တာလျိုၚ် နဒဒှ်ဝန်ဇၞော်သၟာကမၠောန်တုဲ ဟိုတ်နူဟွံတာဒၞါလဝ် ပရေၚ်လလောၚ်တြး ပရေၚ်အုပ်ဓုပ်ပၞာန်ဂှ်တုဲ ပ္တိုန်လဝ်ဒုဟ် ကုဗော်ညး ဗော်ဇြဟတ်ညးဍုၚ်ကွာန်ရ။
လဳ မဂွံဒုၚ်ရုဲစှ် နဒဒှ်သမ္မတဂှ်ဝွံ ပရေၚ်ဗၠးၜး ဗဗွဲဓဝ် နွံရောၚ် သ္ၚိဗု ဟီုလဝ်တုဲ စပ်ကဵုကြုက်လုပ်စိုပ်အကြာ ပလာပ်ပထုဲဒၟံၚ် ပ္ဍဲကဵုဍုၚ်ဒဳမဝ်ကရေဇြဳ အလုံဂၠးမွဲဂှ်တုဲ ဒဒှ်ရအမေရိကာန် ဂွိၚ်ဒၟံၚ်ဖိုဟ် ဒစဵုဒစးဒၟံၚ်ဖိုဟ်ဂှ် ဟီုလဝ်ရ။
Ref: Reuters