ဘာအၚ်၊ ဂျောန် ၆
ပ္ဍဲတွဵုရးကရေၚ် ဍုၚ်ဘာအၚ်ဂှ် ဂကောံကံၚ်ဇြဳပၞာန်တွဵုရး ရပ်ဒက်ဒၟံၚ်ယာန်လာၚ်ဇြေန်ဟွံမွဲတံ နွံကီုလေဝ် ယာန်ကွဳစက် ဂကောံရပ်လွဟ် မပ္တံကဵု BGF တံဂှ်တှ်ေ ဟွံဂံၚ်ရပ်အိုတ်ပုဟ်ဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဂျောန် ၁ တုဲ ယာန်လာၚ်ဇြေန်ဟွံမွဲ နွံလ္တူဍုၚ်ဘာအၚ်တံဂှ် ကံၚ်ဇြဳပၞာန်တွဵုရးကရေၚ် ဒက်ဂကောံတုဲ ပ္ဍဲဒၞါဲလုပ်တိတ်ဍုၚ်၊ ဂၠံၚ်ပန်သွာၚ် ကေုာံ ဒၞါဲမၞိဟ်အာကၠုၚ်ဂၠိုၚ်တံဂှ် ရပ်ကၠုၚ်ယာန်လာၚ်ဇြေန်ဟွံမွဲတံဂှ်တုဲ သီကေတ်ဒၟံၚ်ရ။
လ္တူဍုၚ်ဘာအၚ်ဂှ် ဂကောံရပ်ဒက်ကွဳစက်လာၚ်ဇြေန်ဟွံမွဲ ဂကောံစုၚ်ပါလုပ် မပ္တံကဵုဒပ်ပၞာန်၊ ဗၠာဲသၟိၚ်၊ ဗၠာဲသၟိၚ်ထိၚ်ယာန်၊ ဌာနသိုဟ်ပၠိုတ်ပၟတ်၊ BGF တံဂှ်ဝွံ ပ္ဍဲကဵုဂၠံၚ်ပန်သွာၚ် အာဘာအၚ်−လိုၚ်ဗၠဲ ဂၠံၚ်မၞိဟ်အာဂၠိုၚ်ဂှ်ကီု၊ ဂၠံၚ်အိန္ဒု၊ ဖျာ(မဲဘောၚ်) ၊ ဒဒန်သၚ်လောန် ( ဒၞါဲစိၚ်ပန်) တံ မပါလုပ် အခိၚ်ကွးဘာတိုန်ဘာ ဗွဲတၟေၚ် အခိၚ်စှ်ေဘာဂှ် စွံအဓိကတုဲ ပ္ဍဲကဵုဂၠံၚ်ဇၞော်မွဲသၟးဟွံက ကရေပ်ဂၠံၚ်တံဂှ်လေဝ် ဂေတ်ဂေၚ်တုဲ ကၟာတ်လဒဵု ရပ်ဒက်ဒၟံၚ်ရ။
အခိၚ်ကွးဘာဂမၠိုၚ် တိုန်ဘာစှ်ေဘာဂှ် ဂကောံကံၚ်ဇြဳပၞာန်တွဵုရး ကၠုၚ်စိုပ်ရပ်ဒက်ဒၟံၚ် ယာန်လာၚ်ဇြေန်ဟွံမွဲတံဂှ်တုဲ မိမကွးဘာဂမၠိုၚ်ဝွံ ဟွံဂံၚ်ပလံၚ် ဟွံဂံၚ်ဒုၚ် ကောန်ၚာ်ဇကုတံဂှ်ရတုဲ ဒးဂဗဒၟံၚ်ကဵုအခက်အခုဲတၟာဂလိုၚ်ရောၚ် သ္ဂးရ။
ဟိုတ်နူကံၚ်ဇြဳပၞာန်တွဵုရး ရပ်ဒက်ဒၟံၚ်ယာန်လာၚ်ဇြေန်ဟွံမွဲတံဂှ်တုဲ ကွဳစက် ဂကောံဟံၚ်ပြာ်ပရေၚ်မၞိဟ် ပ္ဍဲပွိုၚ်ဍုၚ်ဘာအၚ် လိုၚ်ဗၠဲ ကြပ်သီုဖအိုတ်ဂှ် ဟွံဂံၚ်ပလံၚ်မၞိဟ်ယဲ ပ္ဍဲဍုၚ်ဘာအၚ်ရတုဲ ဒးဒေါအ်ဇူလဝ်ဂှ်ရ ညးတၠယဲက္ဍၚ်တံကီု ဂြောဝ်ဂတာညးတံကီု ဒှ်ဒၟံၚ်ဒဒိုက်တၟာဂလိုၚ်တုဲ ပ္ဍဲကဵုဗ္ဒမ်ဂဥုဲပူဂဵုလ္ၚဵုတံဂှ်လေဝ် မၞိဟ်ယဲဂမၠိုၚ် ကၠုၚ်စိုပ်ဟွံမွဲ အောန်စှ်ေကၠုၚ်ဂှ် ညးဒေသဂမၠိုၚ် သ္ဂးအိုတ်ရ။
ဟိုတ်နူရပ်ဒက်ဒၟံၚ်ယာန်လာၚ်ဇြေန်ဟွံမွဲဂှ်ရ ပ္ဍဲဍုၚ်ဘာအၚ်ဂှ် မၞိဟ်အာကၠုၚ်အောန် သ္ၚိတ်ဇြကၠုၚ်ဒၟံၚ်တုဲ ပရေၚ်သွံရာန်လေဝ် ဟွံခိုဟ်ၜိုတ်ကၠာတေံရပုဟ်ဂှ် ဟီုဂးဒၟံၚ် နွံဒၟံၚ်ရ။
ဟိုတ်နူပရေၚ်ရပ်ဒက်ဂှ်တုဲ ညးဒေသဂမၠိုၚ်ဝွံ ဒးသ္ပပဓာန် ကော်ဒၟံၚ်ကွဳလိုန်ဓာတ်သၠာပိ လာၚ်ဇြေန်နွံတံဂှ်ရ ညးဒဳကွဳသၠာပိဂမၠိုၚ် ဂွံဒဳဂၠိုၚ်ကၠုၚ် နူကၠာတေံဏောၚ်ဂှ်လေဝ် သ္ဂးရ။
သ္အာၚ်နူဂှ်ပၠန် ဟိုတ်နူရပ်ဒက်ကၠုၚ်ဒၟံၚ်ကွဳစက်လာၚ်ဇြေန်ဟွံမွဲတံဂှ်တုဲ ညးဍုၚ်ကွာန်ဒေသ နူကဵုလ္ပာ်ကွာန်ရး ဗွဲမဂၠိုၚ်ဝွံ ဟွံဂံၚ်ကၠုၚ်ရာန်ဖျာဇၞော် လ္တူဍုၚ်ဘာအၚ်တံဂှ်ရတုဲ ပ္ဍဲကဵုဆေၚ်ဖျာဂမၠိုၚ် ဇြဟတ်ရာန်စှ်ေကၠုၚ် နူကၠာတေံမာန်တုဲ မၞိဟ်ကၠုၚ်ရာန်လေဝ် စဵုကဵုဟွံမွဲ အောန်ကၠုၚ်ဒၟံၚ်ဂှ်လေဝ် ညးဒေသဂမၠိုၚ် ဟီုရ။
ဂကောံကံၚ်ဇြဳပၞာန်တွဵုရးဝွံ ကၟာတ်လဒဵုရပ်ဒက်ဒၟံၚ် ယာန်လာၚ်ဇြေန်ဟွံမွဲ ညးဍုၚ်ကွာန်ဒေသတံ မပိုၚ်ပြဳလဝ်ဂှ်သၟးဟွံက သီုကဵုဗက်ရပ်ဒၟံၚ် စဵုကဵုအကြာဂၠံၚ်ကရေပ် ဂၠံၚ်ဍောတ်တ်တံဂှ်ကီုလေဝ် ကွဳစက်ဒပ်မၚ်ပယျဵု BGF ၊ DKBA ကေုာံ ကံၚ်ဇြဳၜိုဟ်လလမ်ကရေၚ် PC မအာကၠုၚ်ဒၟံၚ် လ္တူဂၠံၚ်ဇၞော်တံဂှ်တှ်ေ ဟွံဂံၚ်ရပ်ပုဟ်ဂှ် သ္ဂးရ။
ပ္ဍဲဂိတုဂျောန် ၄ ဂှ် လ္တူဍုၚ်ဘာအၚ် အကြာကံၚ်ဇြဳပၞာန်တွဵုရး မရပ်ဒက်ဒၟံၚ်ယာန်လာၚ်ဇြေန်ဟွံမွဲဂှ်ကဵု ဒပ်မၚ်ပယျဵု BGF တအ် စပ်ကဵုပရေၚ်ရပ်ဒက်ဒၟံၚ်ယာန်လာၚ်ဇြေန်ဟွံမွဲဂှ်တုဲ ၜါလ္ပာ်က္တဵုဒှ်လဝ်ပြဒ္ဒညာတုဲ ကောန်ဒပ် BGF ဂမၠိုၚ် ဟီုဗျိဒေါန်ဏာ ဂကောံမရပ်ဒၟံၚ်ကွဳစက်တံဂှ် ဂွံတီကေတ်ရ။
ပ္ဍဲတွဵုရးကရေၚ်ဂှ် ပ္ဍဲအရာပရေၚ်ပိုန်ဒြပ် ပရေၚ်မၞိဟ် ပရေၚ်ပညာ ပရေၚ်ပလံၚ်ဗစိုပ်အာကၠုၚ်တံဂှ် ညးဍုၚ်ကွာန်ဒေသဂမၠိုၚ် ဒးသ္ပပဓာန်သုၚ်စောဲဒၟံၚ်ယာန်လာၚ်ဇြေန်ဟွံမွဲတံဂှ်တုဲ ကောံရပ်လွဟ်သၟးဟွံက သ္ဇိုၚ်ဝန်သၟဝ်တဲကံၚ်ဇြဳပၞာန်တံလေဝ် ဒးရပ်စပ်စကာဒၟံၚ် ယာန်ဟၟဲကဵုလာၚ်ဇြေန်တအ် ဗွဲအဓိကရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ