ပ္ဍဲပေါဲဗ္တိုက်ဍာ်ဗုဂှ် ကောန်ဒပ်ကံၚ်ဇြဳပၞာန် ၆ တၠ ချိုတ်အာ

ဍာ်ဗု၊ ဂျောန် ၆

ပ္ဍဲရးတၞၚ်သဳ ပွိုၚ်ဍုၚ်ဍာ်ဗု ကွာန်ဂြၚ်စိၚ်ဂှ် ဟိုတ်နူပေါဲဗ္တိုက်ဆေၚ်မုက် က္တဵုဒှ်လဝ် ပ္ဍဲဂိတု​ဂျောန် ၂ တေံဂှ်တုဲ ကောန်ဒပ်ကံၚ်ဇြဳပၞာန် ဟွံအောန်နူ ၆ တၠ ချိုတ်အာလဝ်ရောၚ် ဂကောံပၠန်ဂတးဂမၠိုၚ် လလောၚ်ပ္တိတ်လဝ်ပရိုၚ်ရ။

ဒပ်ပံၚ်ကောံမဟာမိတ်ဂမၠိုၚ် အခိၚ်အာမံၚ် သွက်ဂွံဗ္တိုက် ဒပ်ကံၚ်ဇြဳပၞာန် မဖျေံလဝ်ဒပ် အပ္ဍဲကွာန်ဂြၚ်စိၚ်ဂှ် ဂဗဒး ကောန်ဒပ်ကံၚ်ဇြဳပၞာန် ဇြဟတ်ၜိုတ် ၃၀ တိတ်ကၠုၚ်သ္ဂောံၚးတးတိဍာ်ဂှ်တုဲ ဒှ်လဝ်ပေါဲဗ္တိုက်ဆေၚ်မုက်ရ။

အတိုၚ်တၚ်လလောၚ်တြးဂှ်မ္ဂး ဒပ်ပံၚ်ကောံမဟာမိတ်ပၠန်ဂတးတအ် ဂွံကၠာတဲတုဲ ကောန်ဒပ်ကံၚ်ဇြဳပၞာန် ဟွံအောန်န်ူ တြဴတၠ ချိုတ်အာလဝ်တုဲ ၜိုတ် ၁၃ တၠ ကလိဂွံလဝ်ဝပ်ရောၚ် ထ္မံက်ထ္ၜးလဝ်ရ။

ဂကောံပၠန်ဂတးတံ ဟီုလဝ် ပေါဲဗ္တိုက်ဆေၚ်မုက်ဂှ် လအ်အာ ၜိုတ်ဘာ်နာဍဳတုဲ လ္ပာ်ကံၚ်ဇြဳပၞာန် ဇီုကပိုက်ချိုတ်အာဂှ်တှ်ေ နကုသြၚ်လောန်တိုၚ်(မ်) သ္ပဒတန်ဟွံမာန်ဏီရ။

ကုဗ္ဒိုပ်ဒပ်ကံၚ်ဇြဳပၞာန် မစဵုဒၞါကဵုလဝ် ဌာန်ဂအုပ်ဗ္ဒိုပ်ဒပ်ဍာ် မောရဝတဳ ဖျေံသ္ဇိုၚ်ကွာန်(မၚ်းသား) ဂှ် ဒပ်ပံၚ်ကောံမဟာမိတ်တအ် အာစိုပ်ဗ္တိုက်ဒၟံၚ် မွဲဏှမွဲဏှလေပ်ရ။

နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် ထပ်ဖျေံကၠုၚ်ဗ္ဒိုပ်ဒပ် မ္ၚးကွာန်မသ္ၚောဲနူကဵုဗ္ဒိုပ်ဒပ်ဍာ်ဂှ်တုဲ ပ္ဍဲကွာန်ဂြၚ်စိၚ်ဂှ်လေဝ် သွက်ဂွံထပ်ဖျေံအာ ဗ္ဒိုပ်ဒပ်ဂမၠိုၚ်ဂှ် ဂွံမိၚ်ကေတ်ဂှ်ရ ဗ္တိုက်ကၠုၚ်လဝ်သာ်ဏံရောၚ် သောၚ်ထ္ၜးလဝ််ရ။

“ သွက်ဂီုကၠီု ဌာန်ဂအုပ်ဗ္ဒိုပ်ဒပ်ဍာ် မောရဝတဳဂှ် လ္ပာ်သၞတအ် ထပ်ဗပေၚ်ကၠုၚ်ဒၟံၚ်ဇြဟတ်ဂှ်နွံ။ တုဲပၠန် လ္ပာ်ကြုၚ်(ဟိန်းဇယ်) ဟာ ၜဳဟာဂှ်လေဝ် ဍေံတံ ဖျေံလဝ် က္ၜၚ်ပၞာန်ဇၞော်မွဲ နွံဒၟံၚ်လၟိုန်။ ညအ်ဂှ် သွက်ဂွံစဵုဒၞါ ဌာန်ဂအုပ်ဍေံတံရ။ ဒးဟီုမ္ဂး ဌာန်ဂအုပ်ဗ္ဒိုပ်ဒပ်ဍာ် မောရဝတဳဂှ် ၜိုန်သ္ၚောဲကဵုသၞေဟ်ဍာ်ဒမျိုဟ်ထဝါဲဂှ်ကီုလေဝ် မွဲနဲမွဲဗီု သွက်ဂွံစဵုဒၞါကဵု အပိုၚ်အခြာဒေသပရေၚ်ပိုန်ဒြပ်ထဝါဲဂှ် ဍေံတံဆက်တုဲ သိုၚ်ခၞံလဝ် ဗ္ဒိုပ်ဒပ် ဗွဲမခိုၚ်ကၠိုက်ဂှ်နွံ။ လဆောဝ်လဆောဝ် ဍေံတံ ပံၚ်ကဵုဒပ်နူဒေသတၞဟ်ဟ်တံတုဲ ကၠောန်ဒၟံၚ်ပရေၚ်ၚးတးတိဍာ် မွဲဏှမွဲဏှရ” သာ်ဝွံ သ္ဂးရ။

ဟိုတ်ဂှ်ရ အခိၚ်ဟွံရုဲ ဂဗကၠုၚ်ကဵုပေါဲဗ္တိုက်မာန်ဂှ်ရ နကဵုညးဍုၚ်ကွာန်ဒၟံၚ်ကွာန် သကဲဂၠံၚ်ဇၞော်ထဝါဲကဵု ပွဳဗွိုၚ်မကြပ်ကဵုဗ္ဒိုပ်ဒပ်ဍာ်တံ စွံသတိဗွဲတၟေၚ်တုဲ သွက်ဂွံအာကၠုၚ်ချဳဒရာၚ်အိုတ်ဂှ် ဂကောံပၠန်ဂတးဂမၠိုၚ် အာတ်မိက်လဝ်ရ။

အပ္ဍဲကဵုပရေၚ်ပၞာန်ဂှ် နူကဵုဂကောံပံၚ်ကောံမဟာမိတ်တအ် ပန်ပှော်လဝ် ဗ္ဒိုပ်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်ဂြၚ်စိၚ် နကဵုလွဟ်ဇၞော် ၆၀ မမ ၅ မတုဲ ပရေၚ်ဇီုကပိုက်ဂှ်တှ်ေ ဟွံဂွံတီကေတ် ဗွဲလစှ်ေဏီပုဟ်ဂှ် သ္ဂးရ။

သ္အာၚ်နူဂှ်ပၠန် လ္ပာ်ကံၚ်ဇြဳပၞာန် ကလေၚ်ပန်ပှော်ဒၟံၚ် နကဵုလွဟ်ဇၞော်နွံတုဲ ဒဵုကဵုအခိၚ်လၟုဟ်လေဝ် ဆက်ပန်ပှော်ဒၟံၚ်ဂှ်ရ ဟိုတ်နူပေါဲဗ္တိုက်ဆေၚ်မုက်တုဲ ညးဍုၚ်ကွာန်ဂမၠိုၚ် ဒးပါဲဒလေတ်ဒၟံၚ်တံ နွံဒၟံၚ်ရောၚ် နာဲနဂါ သ္ဂးရ။

အတိုၚ်တၚ်လလောၚ်တြး ဂကောံပံၚ်ကောံပၠန်ဂတးတံဂှ်မ္ဂး အပ္ဍဲပေါဲဗ္တိုက်ဆေၚ်မုက်ဂှ် ဂကောံပံၚ်ကောံမဟာမိတ်ဂမၠိုၚ် ဇီုကပိုက်ကလိဂွံဝပ် ဟွံမွဲတုဲ ဗွဲမအံၚ်ဇၞး ဆုတ်ကလေၚ်မာန်လဝ်ရောၚ် ဂွံတီကေတ်ရ။

ပရေၚ်ပၞာန်ဏံဂှ် ဒပ်ပၠန်ဂတးဍုၚ်မန် MSRF ၊ ကရောၚ်ပၞာန်ဒဝ်ဏ (၃)− KBDF, LPF၊ ကရောၚ်ပၞာန်ဒဝ်ဏ (၂)− YGF, NMSP AD/ဒပ်မန်ရာမည RMA ကေုာံ ဒပ်ပ္ကတ်ပ္ကေၚ် Nonentity Coach တံ ပံၚ်တောဲချဳဒရာၚ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုရုပ်−MSRF