မတ်မလီု၊ ဂျောန် ၆
ပ္ဍဲကဵုဘာလကျာ်၊ ဘာသဳလ နွံအပ္ဍဲတွဵုရးဍုၚ်မန်တံ ညံၚ်ဟွံဂွံဍိုက်ကွဳဟၟဲကဵုလာၚ်ဇြေန် ကေုာံ ညံၚ်ဟွံဂွံဒုၚ်လဝ်တဲတံဂှ် ကံၚ်ဇြဳပၞာန်တွဵုရး စၞောန်ကၠုၚ် ဂကောံသံဃနယကပွိုၚ်ဍုၚ်ရ။
အတိုၚ်လိက် မစၞောန်ကၠုၚ်လဝ် နကဵုစၟတ်တ္ၚဲ ဂိတုဂျောန် ၄ ဂှ်မ္ဂး ကံၚ်ဇြဳပၞာန်တွဵုရးဝွံ အပ္ဍဲတွဵုရးဂှ် ပွမဍိုက်ယာန်လာၚ်ဇြေန်ဟွံမွဲ၊ ပွမဒုၚ်လဝ်တဲကွဳတံဏံဂှ် ဖျေံအစဳဇန်တုဲ ကေတ်ဒၟံၚ်အရေဝ်ရောၚ် ကဵုလဝ်သမ္တီရ။
ဟိုတ်ဒှ်သာ်ဂှ်ရ ပ္ဍဲကဵုဘာလကျာ် ကေုာံ ဘာသဳလ နွံပ္ဍဲဂကောံကွာန် အရာပ် မဆေၚ်စပ်ဂမၠိုၚ် ညံၚ်ဟွံဂွံဍိုက်ယာန်လာၚ်ဇြေန်ဟွံမွဲ၊ ညံၚ်ဟွံဂွံဂိုၚ်စွံလဝ်တံဂှ်ကီု သွက်ဂွံဒ္ဂေတ်ဗက်အိုတ်ဂှ် ကံၚ်ဇြဳပၞာန် ပ္တိတ်ကၠုၚ်အမိၚ်ရ။
ကျာ်ဇၞော်မွဲဇကုဂှ်တှ်ေ ယဝ်ရပ်ဒက်ယာန်လာၚ်ဇြေန်ဟွံမွဲ ပ္ဍဲဘာလကျာ်တံဂှ်မ္ဂး သွက်ကိစ္စပရေၚ်သာသနာတံှဂ် ဒှ်ကၠုၚ်အခက်အခုဲတၟာဂလိုၚ်မာန်ရောၚ် မြော်လဝ် ကုသြၚ်လောန်တိုၚ်(မ်) ရ။
“ နွံပ္ဍဲတဲဍေံတံတှ်ေ ဗီုဍေံမိက်ဂွံကၠောန်ဂှ် ကၠောန်ဏောၚ်။ ဒှ်အခက်အခုဲဂှ်တှ်ေ လဂုန်တအ် အာကၠုၚ်ဝါတ်ဂါတ်အာညိဏောၚ်။ အဓိကဂှ်တှ်ေ ကိစ္စပ္တန်သာသနာညိည နွံဏောၚ်။ အခါသ္ပကုသိုလ်ကဵုဒါန်မ္ဂး အာကၠုၚ်ဟွံပြေပြံၚ်ကွေံရပုဟ်။ ယဝ်ရသီဏာမ္ဂး လဂုန်တအ်လေဝ် မုပဟွံဂွံပုဟ်လေဝ်။ ဒးမံၚ်မံၚ်သၟဝ်တဲအုပ်ဓုပ်ကၟိန်ဍုၚ်ဂှ်တုဲ ဍေံတံကၠောန်မ္ဂး လဂုန်တအ် အခေါၚ်ဂွံဟီုမုဟွံမွဲပုဟ်” ရဴဝွံ မြော်လဝ်ရ။
သ္အာၚ်နူဂှ်ပၠန် ကွဳစက်ပ္ဍဲဘာလကျာ် ဗွဲမဂၠိုၚ်ဝွံ ညံၚ်ခမဳသၚ်ဂမၠိုၚ် အာကၠုၚ်ဂွံပြေပြံၚ်တုဲ တၠဒါန်ဂမၠိုၚ် ၜိုတ်သ္ပမာန် ပံၚ်ကောံကဵုလဝ်ဒါန်တုဲ ယဝ်ကၠုၚ်စိုပ်ရပ်ဏာသာ်ဏံမ္ဂး အာဒှ်အခက်အခုဲ ပ္ဍဲပရေၚ်အာကၠုၚ်ဏောၚ်ဂှ် ကျာ်ဇၞော်အ္စာ ဆက်မြော်လဝ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဂှ်တှ်ေ အပ္ဍဲဒေသဂှ် ရပ်ဒၟံၚ်ကွဳလာၚ်ဇြေန်ဟွံမွဲ သီုဗ္တံသီုတ္ၚဲ ပ္ဍဲကဵုဒၞါဲလုပ်တိတ်ဍုၚ်၊ ဒၞါဲကွဳစက်အာကၠုၚ်ဂၠိုၚ်၊ ဒၞါဲဟွံထေၚ်ခယျလဝ်တံဂှ်သၟးဟွံက ဂွံပရိုၚ်ဂးတုဲ ရပ်ဒက်ဒၟံၚ် စဵုကဵုအပ္ဍဲသ္ၚိ ဇၞော်ကဵုဇြဟတ်ရ။
ကွဳစက်၊ ကွဳလိုန်ဓာတ် ကေုာံ ကွဳသၠာပိ ဟၟဲကဵုလာၚ်ဇြေန် မရပ်ဂွံလဝ်တံဂှ်တှ်ေ သီကေတ်တုဲ သီုကဵုရပ်ဒၟံၚ်ညးမဒဳယာန်လာၚ်ဇြေန်ဟွံမွဲတံဂှ် မွဲတဲဓဝ်တုဲ ဖျေံဒၟံၚ်ဒဏ်ထံၚ် နကဵုသၞောဝ်ဗၞိက်ပၠောပ်ဗၞိက်ပ္တိတ် အောန်အိုတ် ပွိုၚ်မွဲဂိတုရ။
အတိုၚ်လိက်ပရိုၚ် ဂကောံသံဃနာယကပွိုၚ်ဍုၚ်တံဂှ်မ္ဂး ပ္ဍဲဘာလကျာ်၊ ဘာသဳလတံဂှ် ပွမဍိုက်ယာန်လာၚ်ဇြေန်ဟွံမွဲ၊ ပွမဒုၚ်တဲဂိုၚ်စွံလဝ်တံဂှ် ညံၚ်ဟွံဂွံမွဲဂးတုဲ သာ်ဏံပါကီုလေဝ် ယဝ်ဂွံဆဵုကေတ်နတဲမ္ဂး ကေတ်အာအရေဝ်နဗီုပြၚ်သာ်လဵုရောဟီုဂှ်တှ်ေ ထ္မံက်ထ္ၜးလဝ်ဂှ် ဟွံမွဲရ။
ပ္ဍဲတွဵုရးဍုၚ်မန်ဂှ် ကံၚ်ဇြဳပၞာန် ရပ်ဒက်ဒၟံၚ် ယာန်လာၚ်ဇြေန်ဟွံမွဲ နကဵုအစဳဇန် ဇၞော်ကဵုဇြဟတ်တုဲ ဒဵုကဵုအခိၚ်လၟုဟ် ရပ်သီဂွံလဝ် ကွဳစက်၊ ကွဳလိုန်ဓာတ် ကေုာံ ကွဳသၠာပိဟၟဲကဵုလာၚ်ဇြေန် ဂၠိုၚ်ကဵုကၠံတုဲ ကုညးမဍိုက်ယာန်လာၚ်ဇြေန်ဟွံမွဲတံဂှ်တှ်ေ ဆက်ကေတ်ဒၟံၚ်အရေဝ် နကဵုသၞောဝ်ဗၞိက်ပၠောပ်ဗၞိက်ပ္တိတ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ