သဓီု၊ ဂျောန် ၆
ပ္ဍဲတွဵုရးဍုၚ်မန် ပွိုၚ်ဍုၚ်သဓီုဂှ် အပ္ဍဲပွိုၚ်မသုန်တ္ၚဲဏံ ဟိုတ်နူဍိုက်ဒးကွဳလာၚ်ဇြေန်ဟွံမွဲတံဂှ်တုဲ မၞိဟ်ဟွံအောန်နူ ၆၀ တၠ ဒးဒုၚ်ဖျေံလဝ်ထံၚ်တုဲ သီုကဵုဒးဒုၚ်သီလဝ်ကွဳတံဂှ်ရောၚ် ညးမစုက်လုက်ကဵုဒပ်ဗၠာဲသၟိၚ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူအမိၚ်က္ဍိုပ်သ္ကိုပ်ပၞာန်တုဲ နူဂိတုဂျောန် စၟတ်တ္ၚဲ ၁ စဵုကဵုစၟတ်တ္ၚဲ ၅ အပ္ဍဲပွိုၚ်မသုန်တ္ၚဲဂှ် အပ္ဍဲပွိုၚ်ဍုၚ်သဓီု ဂကောံပံၚ်တောဲကံၚ်ဇြဳပၞာန် ဗက်ရပ်ဒက်လဝ် ယာန်ဟွံမွဲကဵုလာၚ်ဇြေန်ဂမၠိုၚ် နကဵုဇြဟတ်လၟိဟ်ဗွဲမဂၠိုၚ်ဂၠေၚ်ရ။
ကုညးမဍိုက်ကွဳလာၚ်ဇြေန်ဟွံမွဲ ရပ်ဂွံလဝ်တံဂှ် တပ်စုတ်နကဵုၝောံပိုဒ် ၈ သၞောဝ်ဗၞိက်ပၠောပ်ဗၞိက်ပ္တိတ်ဂှ်တုဲ စောဲဂဗုတ် ပ္ဍဲရုၚ်သၞောဝ်ဓဝ်ပွိုၚ်ဍုၚ် အပ္ဍဲတ္ၚဲဂှ်တုဲ ဖျေံစၟတ်ဒဏ်ထံၚ်မွဲဂိတုတုဲ သီဒၟံၚ်သီုကဵုကွဳရ။
ပ္ဍဲကဵုညးဒးဒုၚ်ရပ်လဝ် ယာန်လာၚ်ဇြေန်ဟွံမွဲတံဂှ် ညးမဒဳကွဳသၠာပိ ပါလုပ်ဂၠိုၚ်အိုတ်တုဲ ညးမဒဳကွဳစက်လာၚ်ဇြေန်ဟွံမွဲတအ် ပါလုပ်ညိညရဂှ် သ္ဂးရ။
အပ္ဍဲပွိုၚ်ဍုၚ်သဓီုဂှ် ဂကောံမရပ်ယာန်လာၚ်ဇြေန်ဟွံမွဲတံဂှ်ဝွံ ပ္ဍဲကဵုဂၠံၚ်သဓီု−ဘာအၚ်၊ ဂၠံၚ်သဓီု−ၜဳကလေၚ် ကေုာံ ပ္ဍဲကဵုဂၠံၚ်လုပ်တိတ် သဓီု−မတ်မလီုဂှ် မၚ်ရပ်ဒၟံၚ်ဂၠိုၚ်အိုတ်ရောၚ် ဂွံတီကေတ် ဇရေၚ်ညးဒေသတံရ။
ရပ်ဒက်ယာန်လာၚ်ဇြေန်ဟွံမွဲတံဂှ်တုဲ ဖျေံဒၟံၚ်ထံၚ် ကုညးမရပ်ဒက်ဂွံဂှ်ရ လ္တူဍုၚ်သဓီုဂှ် ညးမဒဳကွဳလိုန်ဓာတ်သၠာပိ ဗွဲမဂၠိုၚ် ဒဳကၠုၚ်လ္တူဂၠံၚ်အောန်အာတုဲ သွက်ပရေၚ်စသုၚ်မံၚ်စံၚ်ဂြောဝ်ဂတာဂှ် ဒှ်ကၠုၚ်အခက်အခုဲရောၚ် ဂွံတီကေတ်ရ။
ပွိုၚ်ဍုၚ်သဓီုဝွံ ဒှ်ဒၟံၚ်ဂၠံၚ် ကွဳစက်၊ ကွဳလိုန်ဓာတ် ပၠောပ်နၚ်နူလ္ပာ်ဗြဝတဳဂမၠိုၚ် တတ်ကၠောံမံၚ် အဓိကမွဲတုဲ သၞေဟ်ကၚ်စၟဳတ်တံဂှ်တှ်ေ ရပ်ဒက်ကၠုၚ်ဟွံမွဲတုဲ အာတ်လှုဲတုဲ ဗလးကဵုဒၟံၚ်ဂှ်ရ လၟိဟ်ကွဳစက်လာၚ်ဇြေန်ဟွံမွဲ ဂၠိုၚ်ကဵုကၠံ အာကၠုၚ်ဒၟံၚ် အရိုဟ်တ္ၚဲရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ