ကအ်ကြိက်၊ ဂျောန် ၁၄
ပ္ဍဲတွဵုရးကရေၚ် ပွိုၚ်ဍုၚ်ကအ်ကြိက် ပ္ဍဲကွာန်(ကော့ဘော်) ဂှ် ပေါဲဗ္တိုက်ဟွံမွဲမွဲသာ် ဟိုတ်နူကံၚ်ဇြဳပၞာန် ပန်ကဵုလွဟ်ဇၞော်တုဲ ကောန်ၚာ်သၟတ် ၂ တၠ မပါလုပ် ကောန်အရာပ် ၇ တၠ ချိုတ်အာလဝ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲအကြာတ္ၚဲတံဏံ ပေါဲဗ္တိုက်ဟွံမွဲမွဲသာ် ဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာ ပန်ကၠုၚ်လွဟ်ဇၞော် ပ္ဍဲကဵုကွာန် (နောင်ထပ္ပံ၊ နန်းကော်တေး) မဒှ်ကွာန်နူကဵုသ္ကုတ်သၟဝ်ကျာ ဍုၚ်ကအ်ကြိက်ဂှ်ကဵု ပ္ဍဲကဵုကွာန် မၞုံကရပ်ပွဳဗွိုၚ်ဍုၚ်ကြုၚ်ဒဵုတံဂှ်ရ။
ပ္ဍဲဂိတုဂျောန် ၁၂ ဂှ် ပေါဲဗ္တိုက်ဒှ်လဝ်ဟွံမွဲမွဲသာ် နူကဵုတမ်ဒပ်ကံၚ်ဇြဳပၞာန် ခမရ ၅၄၅ ဖျေံသ္ဇိုၚ်ဍုၚ်ကြုၚ်ဒဵုဂှ် ပန်နၚ်ကဵုလွဟ်ဇၞော်တုဲ မကမ်လွဟ်ဇၞော် ဒတုံဗ္တိုဟ်ထ္ကးအာလဝ် ပ္ဍဲကွာန် (ကော့ဘော်) တုဲ ကောန်ၚာ်သၟတ် ၂ တၠ မပါလုပ် ကောန်အရာပ် ၇ တၠ ချိုတ်အာလဝ် ပ္ဍဲဒၞါဲဒှ်ပရူဂှ်ရောၚ် ညးဒေသဂမၠိုၚ် သ္ဂးရ။
သ္အာၚ်နူဂှ်ပၠန် ဟိုတ်နူဒပ်ကံၚ်ဇြဳပၞာန် ထောံဂြာတ်လဝ်မခတိုဟ် အပ္ဍဲကွာန် (နောၚ်ထပ္ပံ) တုဲ ညးဒေသမွဲတၠ ဇီုကပိုက်ကလိဂွံလဝ်ဝပ်ရောၚ် တမ်ရိုဟ်ပရိုၚ်ဒေသဂမၠိုၚ် ဟီုရ။
ဒပ်ကံၚ်ဇြဳပၞာန်ဝွံ တုဲကၠုၚ်ဂိတုဂျောန် ၉ တေံဂှ်လေဝ် ကၠုၚ်စိုပ်ထောံလဝ်မခတိုဟ် နကဵုက္ၜၚ်ကျာ ပ္ဍဲကဵုကွာန်ပါၚ်ယာပ်၊ ပွိုၚ်ဍုၚ်ကအ်ကြိက် ပယျဵုတွဵုရးကရေၚ်ကဵု တွဵုရးမန်ဂှ်တုဲ ကောန်ၚာ်သၟတ် ၃ တၠ မပါလုပ် ညးဍုၚ်ကွာန်ကောန်အရာပ် ၅ တၠ ချိုတ်အာလဝ်တုဲ ၂၂ တၠ ကလိဂွံလဝ်ဝပ်ရ။
စနူဂိတုဨပရဴ ၁၃ တုဲကၠုၚ်တေံတုဲ ပရေၚ်ပၞာန်ၜါလ္ပာ် အကြာဒပ်ပံၚ်ကောံပၠန်ဂတးတံကဵု ဒပ်ကံၚ်ဇြဳပၞာန် မစက္တဵုဒှ်လဝ် မွဲဒမြိပ်ဂၠံၚ်ကအ်ကြိက်−ကြုၚ်ဒဵုဂှ်ဝွံ လအ်ကၠုၚ်ပွိုၚ်ၜါဂိတု စဵုကဵုဂိတုဂျောန် ၁၃ ဂှ် ဆက်သ္ကာတ်မြဟ်ဒၟံၚ်ဖိုဟ်ရ။
ဟိုတ်နူပေါဲဗ္တိုက်ကအ်ကြိက်−ကြုၚ်ဒဵုတုဲ ညးဍုၚ်ကွာန်ဒေသ နူပွဳဗွိုၚ်ကရပ်ဍုၚ်ကြုၚ်ဒဵု၊ ဍုၚ်ကအ်ကြိက် မဒးပါဲဒလေတ်ဒၟံၚ်တံဝွံ ဒဵုကဵုအခိၚ်လၟုဟ် ကလေၚ်စဴဌာန်ဒၟံၚ်ဟွံဂွံဏီပုဟ်ဂှ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ