မတ်မလီု၊ ဂျောန် ၁၄
အပ္ဍဲကာလသီအဝဵုဏံ အပိုၚ်အခြာဒၞါဲကွတ်စက်မတ်မလီု မကဵုဒၟံၚ်ပၟတ်ဓာတ်လလဳ မွဲတ္ၚဲ ပွိုၚ် ၄ နာဍဳဓဝ်ဂှ် ကဵုဂလိုၚ်ပ္တိုန်အာပၟတ်ဓာတ်လလဳဏောၚ်ဂှ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ်ဂှ် ကဵုကတိပါၚ် ဟီုကၠုၚ်လဝ်ရ။
တုဲကၠုၚ်ဂိတုဂျောန် ၁၁ တေံ အခိၚ်ဆဵုဂဗကဵု တၠကမၠောန်နူကဵုအပိုၚ်အခြာဒၞါဲကွတ်စက်မတ်မလီု နွံလ္တူဍုၚ်မတ်မလီု တွဵုရးဍုၚ်မန်ဂှ် ဥူအံၚ်ကျဳတုၚ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ်ဂှ် ကဵုလဝ်ကတိပါၚ်ရ။
တၚ်နွံပၟိက်အဓိက ပ္ဍဲကဵုအပိုၚ်အခြာဒၞါဲကွတ်စက်မတ်မလီု မဒှ်ပရေၚ်သ္ဂောံဂွံဍာ်ဂှ် ရေၚ်တၠုၚ်လဝ်ကဵုတုဲဒှ်ဂှ်ရ သွက်ဂွံဂွံပၟတ်ဓာတ်လလဳဂှ် ပ္တိတ်ဇြဟတ်ရေၚ်တၠုၚ်ကဵုဒၟံၚ်ရောၚ် ဟီုလဝ်ရ။
တၠကမၠောန်ပရေၚ်ပိုန်ဒြပ် အပ္ဍဲဒေသမွဲတၠဂှ်တှ်ေ အပိုၚ်အခြာဒေသကွတ်စက်ဂမၠိုၚ်ဝွံ ဂွံပၟတ်အောန်နူကဵု ပ္ဍဲအရာပ်တံဂှ်ဏီတုဲ ယဝ်ကၠောန်ကဵု ညံၚ်ဂွံဂွံပၟတ်ဂၠိုၚ်မ္ဂး ခိုဟ်ကီုလေဝ် နူလဵု နဗီုပြၚ်လဵု ညံၚ်ဂွံဂွံဂှ် ကၠောန်ကဵုရောဟီုဂှ် ဒးမၚ်ကျောဝ်ဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒၞါဲကွတ်စက်တံဏံဂှ် ဂွံပၟတ်ဓာတ်လလဳအောန်မံၚ်။ အောန်နူအရာပ်တံဂှ်ဏောၚ်။ ယဝ်ကၠောန်ကဵုမ္ဂး ခိုဟ်ကွေံကွေံရ။ ဒၞါဲကွတ်စက်တံဏံ ဂွံပၟတ်မ္ဂး ဗီုလဵုဒှ်ဒှ် ကမၠောန်ကၠောန်ပ္တိတ်ဗၞိက်တံဂှ်တှ်ေ ခိုဟ်ကၠုၚ်ညိညဏောၚ်။ ဆ္ဂး ဂွံ၊ ဟွံဂွံဟီုဂှ် ပိုယ်တံလေဝ် ဟွံတီပုဟ်။ ဂွံဂွံဂှ် နူလဵု ကၠောန်အာသာ်လဵုရောဟီုဂှ်လေဝ် ဟွံတီပုဟ်” သာ်ဝွံ သ္ဂးရ။
မွဲလ္ပာ်ဂှ်ပၠန် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ်ဂှ်တှ်ေ ပ္ဍဲကဵုကမၠောန်ပရေၚ်ပိုန်ဒြပ် ပါလုပ်သီုကဵုကမၠောန် MSME တအ်ဂှ် နဲကွတ်ပညာ၊ တမ်ရိုဟ်သြန်၊ ဗွဝ်ဖျာ၊ ဗၞိက်ဒမျိုၚ်၊ ကပေါတ်စက် ကေုာံ ဒၞါဲတိတံဂှ် ဒှ်တၚ်နွံပၟိက်သ္ဇိုၚ်ဂမၠိုၚ်တုဲ ပ္ဍဲကဵုဒၞါဲကွတ်စက်တံဏံ သွက်ဂွံသၠဲပ္တိုန် ကမၠောန်ပ္တိတ်ဗၞိက် မဒှ်ဒတုဲဖဵုသွက်ကၟိန်ဍုၚ်ဍာံဍာံဂှ် ဟီုလဝ်ဏီရ။
သ္အာၚ်နူဂှ်ပၠန် နကဵုဒၞါဲကွတ်စက်တံဏံ မ္ၚးနူဗၞိက်စသုၚ်ဂှ် ကပေါတ်မၞိဟ်ရပ်စပ်ဂမၠိုၚ်ဂှ် သုၚ်စောဲဗၞိက်အပြောံ တိတ်နူအပ္ဍဲဍုၚ်တံဂှ်တုဲ သွက်ဂွံကၠောန်ကမၠောန်ထ္ပက်အဇာ ဗၞိက်ပၠောပ်နူကဵုဍုၚ်သ္အာၚ်တံဂှ်လေဝ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ်ဂှ် စၞောန်ကၠုၚ်လဝ်ရ။
ဒၞါဲကွတ်စက်မတ်မလီုဂှ်ဝွံ ပ္ဍဲလက်ထက်အလဵုအသဳတုဲကၠုၚ်တေံ ဂွံလဝ်ပၟတ်ဓာတ်လလဳ လၟေၚ်ၚ်တုဲ ဂွံကၠောန်လဝ်ကမၠောန်ကၠောန်ပ္တိတ်ဗၞိက် လှဲလှဲလးလးမာန်တုဲ ပ္ဍဲလက်ထက်ကံၚ်ဇြဳပၞာန်ဏံ ပၟတ်ဓာတ်လလဳဂှ် ဟွံဂွံလၟေၚ်ၚ်တုဲ ကမၠောန်ဗွဲမဂၠိုၚ် ဒးဖအောန်ဖျေံလဝ်နွံတုဲ ကမၠောန်လ္ၚဵု ဒးဒေါအ်ဇူလဝ် နွံဂှ် တၠကမၠောန်ဂမၠိုၚ် ဟီုအိုတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− MOI