မတ်မလီု၊ ဂျောန် ၁၄
သၞောတ်တၠအဝဵုပၞာန်သ္ဂောံကျဗြံ၊ သွက်သ္ဂောံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဂှ် လုပ်အာပေါဲဗ္တိုက် ကရောံဇြဟတ်ပၠန်ဂတးဂမၠိုၚ် ပါလုပ်သီုကဵု ဒပ်ပၠတရဴဗၠးၜးတွဵုရးပလံၚ် PSLF/TNLA ဏောၚ်ဂှ် ဗော်ဍုၚ်မန်တၟိ AD/ ဒပ်မန်ရာမည ကဵုလဝ်သမ္တီရ။
ဂကူမန်၊ ဝ၊ တအာၚ် မဒှ်ဂကောံဂကူမန်−ခမာဂှ် စပ်ကဵုပရေၚ်မဒက်ပ္တန်လဝ် ကံၚ်ဇြဳရးတအာၚ် TLC သွက်ဂွံမၚ်မွဲစဵုဒၞါတိဍာ်တအာၚ် ကေုာံ ညးဍုၚ်ကွာန်တအာၚ်တံဂှ်တုဲ ဒဒှ်ရထံက်ဂလာန်ဒုၚ်တၠုၚ်ဂှ် ပ္ဍဲဂိတုဂျောန် ၁၂ တေံ နူကဵုကမ္မတဳက္ဍိုက်ပ်ပရေၚ်ဍုၚ်ကွာန်၊ ပရေၚ်ပၞာန် ဗော်ဍုၚ်မန်တၟိ AD/ ဒပ်မန်ရာမည လလောင်ပ္တိတ်လဝ်ရ။
ဗော်ကောန်ဂကူတအာၚ် TNP၊ ဒပ်ပၠတရဴဗၠးၜးတွဵုရးပလံၚ် PSLF/ TNLA ကေုာံ ကမ္မတဳကဵုကသပ်ပရေၚ်ဍုၚ်ကွာန်တအာၚ် TPCC နူကဵုဂကောံဗွိုၚ်မှာဇန်တအာၚ်တံ မပါလုပ်ဂှ် ပံၚ်ကောံတုဲ နူကဵုကောံဓရီုဂှ် ဒက်ပ္တန်လဝ် ကံၚ်ဇြဳရးတအာၚ်ရ။
နူကဵုကောံဓရီု TPCC ဂှ် သ္ပဒတန်လဝ် အစဳဇန်အလဵုအသဳကာလပၠန်ဂတး ရးတအာၚ်တုဲ သွက်ဂွံထ္မံက်ရုပ်ရဴ အစဳဇန်ဏံဂှ် ကံၚ်ဇြဳရးတအာၚ် ဒက်ပ္တန်ကၠုၚ် နဒဒှ်ဂကောံအဝဵုသၠုၚ်အိုတ် အခိၚ်ကာလပၠန်ဂတးဏံမာန်ဂှ်ဝွံ ဒှ်ပရေၚ်အံၚ်ဇၞးဇၞော်မွဲရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဗော်ဍုၚ်မန်တၟိ AD/ ဒပ်မန်ရာမညဝွံ နကဵုတၚ်ရန်တၟံ သ္ဂောံဗ္တိုက်သရိုဟ်သၞောတ်တၠအဝဵုပၞာန်၊ သွက်အခေါၚ်တုပ်သၟဟ်ကောန်ဍုၚ်အရၚ် ကေုာံ ကၟိန်ဍုၚ်ပံၚ်ကောံဖေဝ်ဒရာ မဍိုက်ပေၚ်ကဵု အခေါၚ်ကံကုသိုလ်ဇကု ဇကုဖန်ဖက်ကေတ်ကဵု ဍုၚ်မန်ဂွံမံက်ဂတဝ်ကၠုၚ်ဂှ်တုဲ လုပ်မံၚ်ပေါဲဗ္တိုက်ရ။
ပ္ဍဲအရာလုပ်ပေါဲဗတိုက်သာ်ဏံဂှ် “ဗၠးၜးမွဲဒကုတ်မွဲဒကဴဂှ် ဗၠးၜးသီုဖအိုတ်ဟွံသေၚ်၊ သီုညးဖအိုတ်ဗၠးၜးမှဟေၚ် ကလိဂွံပရေၚ်သၠးပွးမဍာံစၟတ် ဍိုက်က်ပေၚ်ၚ်ဏောၚ်” သာ်ဝွံ ဒုၚ်ဂိုၚ်ကေတ်လဝ်ရ။
ဗွဲမဗဗွဲကဵုတၚ်ဒုၚ်ဂိုၚ်ကေတ်ဏံဂှ် သွက်သၞောတ်တၠအဝဵုပၞာန်ဂွံသရိုဟ်စှ်ေ၊ သွက်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဂှ် ပံၚ်တောဲလုပ်အာပေါဲဗ္တိုက် ကရောံဒပ်စဵုဒၞါညးဍုၚ်ကွာန် ဂကောံရပ်လွဟ်ကောန်ဍုၚ်အရၚ် ပါလုပ်သီုကဵု TNLA ဏောၚ်ဂှ် ကဵုလဝ်သမ္တီရ။
လၟေၚ်ကမၠောန်အဓာန်ဂတ ကံၚ်ဇြဳရးတအာၚ် သ္ကဵုဂွံအံၚ်ဇၞး ဗွဲမပြဟ်ကီု၊ သွက်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဂှ် ပံၚ်တောဲအာကဵု ဂကောံဇြဟတ်ပၠန်ဂတးဍုၚ်ဗၟာတံဏောၚ်ဂှ် ဗော်ဍုၚ်မန်တၟိ AD/ ဒပ်မန်ရာမည လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− Social Media