မုဟ်ဍုၚ်၊ ဂျောန် ၁၄
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် လ္တူဂၠံၚ်ဇၞော် မုဟ်ဍုၚ်−ဇြပ်ဗု အကြာကွာန်နှေဟ်ဗဒဝ်ကဵု ကွာန်ယေန်ဒံၚ် ပွိုၚ်ဍုၚ်မုဟ်ဍုၚ် တွဵုရးဍုၚ်မန်ဂှ် ဒုဗိုလ်မွဲတၠ ပြဟ်လလုဲအာလဝ်ရောၚ် ဒပ်မန်ရာမည (NMSP-AD/RMA) လလောၚ်ပ္တိတ်လဝ်ပရိုၚ်ရ။
တုဲကၠုၚ်ဂိတုဂျောန် ၁၁ အခိၚ်နူဂယး ၜိုတ် ၅ နာဍဳဂှ် ဂကောံလ္ပာ်ကံၚ်ဇြဳပၞာန် ဇြဟတ်ဒပ် ၜိုတ် ၃၀ ပြၚ်ပါဂှ်ဝွံ အခိၚ်တိတ်ကၠုၚ်ဂေတ်တိဍာ် နကဵုကွဳစက်ဖ္ဍိုက်တိမွဲဖ္ဍိုက်ဂှ် ဒပ်မန်ရာမည (NMSP-AD/RMA) ကြတ်ဗ္တိုက်လဝ်ရ။
နာဲဂံၚ်သကာ ညးမၞုံအခေါၚ်ဟီုဂး NMSP-AD/RMA ဂှ်တှ်ေ ပ္ဍဲပရေၚ်ဗ္တိုက်ဏံဂှ် ဟိုတ်နူဂွံလဝ်ကၠာတဲတုဲ လ္ပာ်ကံၚ်ဇြဳပၞာန် ဇီုကပိုက်ချိုတ်အာ ဂၠိုၚ်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်ၜါလ္ပာ် လအ်အာပွိုၚ်မွဲနာဍဳပြၚ်ဂှ် လ္ပာ်ကံၚ်ဇြဳပၞာန် ၁၀ တၠပြၚ် ချိုတ်မာန်တုဲ ဂွံတီကေတ်ဗွဲလစှ်ေ ဂှ်တှ်ေ ဆက်ဂၠိုက်ဂၠါဲဒၟံၚ်ဖိုဟ်ရောၚ် သ္ဂးရ။
အပ္ဍဲပေါဲဗ္တိုက်ဂှ် ဒုဗိုလ်ဟံသာဗၠာဲ နူဒပ်မန်ရာမည ပြဟ်လလုဲအာတုဲ ညးဇီုကပိုက်ကလိဂွံဝပ် ဟွံမွဲပုဟ်ဂှ် ဂွံတီကေတ်ရ။
တုဲကၠုၚ်ဂိတုမေ ၂၀ တေံဂှ်လေဝ် ဒၞါဲဒပ်ကံၚ်ဇြဳပၞာန်ဖျေံလဝ်ဒပ် ဗ္ဒါဲကွာန်ယေန်ဒံၚ်ဂှ် လုပ်စိုပ်ဗ္တိုက်လဝ်တုဲ လ္ပာ်ဒပ်ကံၚ်ဇြဳပၞာန် ၁ တၠ ချိုတ်တုဲ ၅ တၠ ဇီုကပိုက်ကလိဂွံလဝ်ဝပ်ရောၚ် ဗော်ဍုၚ်မန်တၟိ NMSP-AD လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−NMSP AD