လံၚ်လုၚ်၊ ဂျောန် ၁၅
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ် ပ္ဍဲပွိုၚ်ဍုၚ်လံၚ်လုၚ် ရးတၞၚ်သဳဂှ်တုဲ ညးဒေသ ၄၀၀၀ ပြၚ် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရောၚ် ညးဒေသပါဲဘဲပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူဂိတုဂျောန် စၟတ်တ္ၚဲ ၁၃ ဂှ်တုဲ ကရောၚ်ပၞာန်ကံၚ်ဇြဳပၞာန် ဇြဟတ်မၞုံ ၜိုတ် ၂၀၀ ပြၚ်ဂှ်ဝွံ ထ္ပက်ကၠုၚ်ကရောၚ်ပၞာန် လုပ်စိုပ်ကၠုၚ် ပ္ဍဲကွာန် (ကညုံကျွန်း) ပွိုၚ်ဍုၚ်လံၚ်လုၚ်ရ။
ကရောၚ်ပၞာန်ဏံဝွံ ပ္ဍဲဂိတုဂျောန် ၁၄ ပယျာံနူဂယးဂှ် ပန်နၚ်လဝ်လွဟ်ဇၞော်တုဲ ထပ်လုပ်စိုပ်ကၠုၚ် လ္ပာ်ကွာန်(စပ်ပြဲ) ရ။
ဟိုတ်နူကရောၚ်ပၞာန်ကံၚ်ဇြဳပၞာန်ဏံတုဲ ညးဒေသ ၄၀၀၀ ပြၚ် နူကွာန်(ကညုံကျွန်း၊ လေးသွန်းခံ၊ စပ်ပြဲ၊ ညှၚ်းမော်၊ ပြၚ်ထိန်း) တံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲဂမၠိုၚ်ရ။
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ပ္ဍဲကွာန်(ကညုံကျွန်း) ဝွံ စံၚ်ပလီုလဝ် ဂၠုၚ်စက်ညးဍုၚ်ကွာန်တအ် မွဲမဂှ် ညးဒေသဂမၠိုၚ် ဟီုရ။
ဒပ်ကံၚ်ဇြဳပၞာန် ၜိုန်ထ္ပက်ဒၟံၚ်ကရောၚ်ပၞာန် လ္ပာ်ကွာန်တအ်ဂှ်ကီုလေဝ် က္တဵုဒှ်လဝ်ပေါဲဗ္တိုက် ကုဒပ်ပၠန်ဂတးတအ် ဟွံမွဲဏီရ။
အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE5 Thanintharyi ဂှ်မ္ဂး အပ္ဍဲကာလသီအဝဵုဏံ ဟိုတ်နူပဋိပက္ခပရေၚ်ပၞာန် မက္တဵုဒှ်ဒၟံၚ် ပ္ဍဲရးတၞၚ်သဳဂှ်တုဲ ညးမ္ဒးထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်တအ် နွံကၠုၚ် ၇၅၃၀၀ ပြၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ