မတ်မလီု၊ ဂျောန် ၁၅
ပ္ဍဲဂိတုဂျောန် စၟတ်တ္ၚဲ ၁၃ ဂှ် ကမ္မတဳသ္ပစၞးကၠတ်ထဝ်ကၟိန်ဍုၚ် CRPH သ္ပဒတန်ကၠုၚ် သၞောဝ်သ္ဇိုၚ်ဝန် မဆေၚ်စပ်ကဵုပရေၚ်ချဳဒရာၚ်စှ်ေစးအဝဵု နနဲဟွံပကီုပရာပ်တုဲ သၞောဝ်ဏံဝွံ ပတိတ်ကၠေံညးယိုက်ဝန် Non CDM နူကဆံၚ်ဒၞါဲညးတံဂွံတုဲ ကေတ်အာဒုဟ်ဒဏ် နကဵုသၞောဝ်ဏံမာန်ရ။
တၚ်ရန်တၟံသၞောဝ်ဏံဂှ်ဝွံ သွက်ဂွံရှ်ေသှ်ေအဲပရဲ လ္တူသ္ဇိုၚ်ဝန်မသ္ပလဝ် CDM တံဂှ်တုဲ သွက်ဂွံစဵုဒၞါကဵု အခေါၚ်အရာကောန်ဍုၚ် ကေုာံ အခေါၚ်အရာမၞိဟ်ကီု၊ ကလေၚ်ဂၠါဲပတိတ် ပရေၚ်မဒးဒုၚ်ဝးပ္ကဝ်အခေါၚ်အရာမၞိဟ်တုဲ သွက်ဂွံကလေၚ်လွဳပရာကၠောန်ၜိုတ်ကဵုကီု၊ ကေုာံ စၟဳတ်ညးယိုက်ဝန် Non CDM ဂမၠိုၚ် ဗွဲမဗဗွဲကဵုသၞောဝ်တုဲ သွက်ဂွံကေတ်အာဒုဟ်ဒဏ် လ္တူပြဝမကလိလောန်ဒးတံဂှ်ဏောၚ်ဂှ် သ္ဂးလဝ်ရ။
အရာမကေတ်အာဒုဟ် ပ္ဍဲသၞောဝ်ဏံဂှ်တှ်ေ ညးမၞုံကဵုကဆံၚ်သၞာဲဒဴ ကေုာံ ကဆံၚ်သၠုၚ်နူဏံဂှ် ပတိတ်နူကဆံၚ်ဌာနန္တရညးတံကီု၊ ဒးစုတ်အာပ္ဍဲစရၚ်ယၟုလီုတံဏောၚ်တုဲ သ္ဇိုၚ်ဝန်ကဆံၚ်မသဝ်နူကဵုသၞာဲဒဴတံဂှ်တှ်ေ ဒးပတိတ်နူကဆံၚ်ဒၞါဲညးတံဏောၚ်ဂှ် ပါလုပ်ရ။
သ္အာၚ်နူဂှ်ပၠန် ပ္ဍဲအရာဂကောံပၞာန်တအ် က္တဵုသပုန်ဂှ် ပံၚ်တောဲရေၚ်တၠုၚ်လဝ်ကီု၊ ထံက်ဂလာန်ကဵုဂကောံပၞာန်တုဲ ပံၚ်တောဲရေၚ်တၠုၚ်လဝ်ကီု၊ ညးယိုက်ဝန် Non CDM မဗက်စအဂတိ အပ္ဍဲအခိၚ်ကာလသီအဝဵုဏံဂှ်တှ်ေ ဒးဒုၚ်စောဲအာဂဗုတ် နကဵုသၞောဝ်လၟုဟ်ဏောၚ်ဂှ် သ္ဂးလဝ်ရ။
နကဵုညးယိုက်ဝန် Non CDM ဂမၠိုၚ် ယဝ်ရရပ်စပ်စကာ ဒြပ်ရတ်ကၟိန်ဍုၚ်၊ ဒြပ်ရတ်ပူဂဵု နကဵုနဲကဲဟွံလုပ်သၞောဝ်တံကဵုဒှ် ဟွံသေၚ်မ္ဂး ပလီုပလာ်ဒးလဝ်ကဵုဒှ်၊ ညံၚ်သြန်ဘဏ္ဍာကၟိန်ဍုၚ် ဂွံဆောံလေၚ်ဂှ် ကၠောန်လဝ်နကဵုမွဲမွဲနဲကဵုဒှ်၊ တုဲပၠန် ဍဵုဍိုက်လ္တူညးဍုၚ်ကွာန် ဟွံသေၚ်မ္ဂး ညံၚ်ဂွံဒးဂိဆောံလေၚ်ဂှ် ယဝ်ကၠောန်သ္ပလဝ်မ္ဂး ဒးကေတ်အာဒုဟ်ဒဏ် နကဵုသၞောဝ်လၟုဟ်ဏောၚ်ဂှ် ပါလုပ် ပ္ဍဲသၞောဝ်ဂှ်ရ။
ညးယိုက်ဝန် သ္ပလဝ် CDM မွဲတၠဂှ်တှ်ေ ကၠာဟွံဂွံသ္ပဒတန်သၞောဝ်ဏံဂှ် အကြာညးယိုက်ဝန် CDM ဂမၠိုၚ် စပ်ကဵုပရေၚ်ကေတ်အာဒုဟ်ဒဏ် လ္တူညးယိုက်ဝန် Non CDM တံဂှ်တုဲ ကိစ္စမဒးကယျာန်ဓဝါတ်ဂမၠိုၚ် နွံလဝ်တုဲ အတိုၚ်သၞောဝ် မသ္ပဒတန်လဝ်လၟုဟ်ဂှ်မ္ဂး ကိစ္စမ္ဒးကေတ်ဒုဟ်ဒဏ်တအ်ဂှ် နွံကၠုၚ်ဂှ်တုဲ သၞောဝ်ဏံဝွံ ဒးဟစပ်ရဏောၚ်ဂှ် ဟီုကၠုၚ်ရ။
“ကိစ္စပိုယ်တအ် မဒှ်ကယျာန်ဒၟံၚ်ညးသ္ကအ်တွဵုမွဲဂှ်တှ်ေ ကေတ်အာဒုဟ် လ္တူ Non တံဟာ ဟွံကေတ်ဟာဂှ်ရဏောၚ်။ လ္ပာ် CDM ပိုယ်တံဂှ်တှ်ေ ညးညးအဲအဲ စၟဳလဝ်ဂှ်လေဝ် ဟွံမွဲမံၚ်ကွေံကွေံရ။ ဟွံမွဲဂှ်ရ ဟွံဟီုစညးသ္ကအ်ကွေံပုဟ်။ ဆ္ဂး ပ္ဍဲကဵုပိုယ်တံ ဒှ်ကယျာန်ဒၟံၚ်ညးသ္ကအ်တွဵုမွဲဂှ်တှ်ေ ကေတ်အာဒုဟ် လ္တူ Non တံဏံဟာ ဟွံကေတ်ဟာဂှ်ရဏောၚ်တုဲ ရံၚ်အာတၚ်နၚ်မပါမံၚ်ပ္ဍဲသၞောဝ်ဏံဂှ်မ္ဂး အဃောဒးဟစပ်ရဏောၚ်ဂှ် ထေၚ်ကေတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲဒၞါဲကေတ်ဒုဟ်ဂှ်လေဝ် ကုညးယိုက်ဝန် Non CDM မသ္ပလဝ်ညံၚ်ညးဍုၚ်ကွာန်ဂမၠိုၚ် ဂွံဒှ်ဒဒိုက်ဂှ်ရ ဂၠိုက်ဂၠါဲထ္မံက်ပ္တိတ်တုဲ ဒးကေတ်ဒုဟ်ဒဏ်ထေက်ဏောၚ်တုဲ ပရေၚ်ကေတ်ဒုဟ်ဒဏ် ဗွဲမစှ်ေကဵုသၞောတ်နွံမှဟေၚ် ကလိဂွံဗဗွဲဓဝ်ဏောၚ်ဂှ် ညးဆက်ဟီုရ။
ညးယိုက်ဝန် CDM မွဲတၠဂှ်လေဝ် ဂၠိုက်ဂၠါဲ Non CDM မဓလီုကၠေံသြဇာ လ္တူသ္ဇိုၚ်ဝန် CDM မပတိုန်ဒုဟ်ဖျေံကၠုၚ်ကဝုတံဂှ်တုဲ ဒးကဵုဒုဟ်ဒဏ်ထေက်ဂှ် ညးဟီုကၠုၚ်လဝ်ရ။
“ဍာံဍာံဂှ်တှ်ေ အကြာ CDM ပိုယ်တအ်ဂှ် Non တအ်ဏံ ဓလီုကၠုၚ်ဒၟံၚ်သြဇာဂှ်နွံ။ မိက်ဂွံဂးဂှ်တှ်ေ ဂတ Non တံဂှ်မ္ဂး ပိုယ်တအ် ဟွံဂံၚ်ဟီုဟွံဂံၚ်ဂးပုဟ်။ တုဲပၠန် ယဝ်ပရိုၚ်တိတ်မွဲမွဲမ္ဂး ဍေံတံစွံပွန်ကဵုပိုယ်တံတုဲ ကဵုကၠုၚ်ပရိုၚ်တံဂှ် ဒးဂဗကၠုၚ်တၟာဂလိုၚ်ရ။ Non မ္ဂး Boycott ဏောၚ်။ တုဲတှ်ေ အရာမစွံကၠုၚ်ပွန် ပတိုန်ဒုဟ်ဖျေံကၠုၚ်ကဝုတအ်လ္တူပိုယ်တံဂှ် ဂၠါဲဒဵုဆဵုတုဲ ဒးကဵုဒုဟ်ဒဏ်ထေက်ရ” သာ်ဝွံ သ္ဂးရ။
နကဵုညးယိုက်ဝန် Non CDM ဒးဒုၚ်ကေတ်ဒုဟ် အတိုၚ်သၞောဝ်သ္ဇိုၚ်ဝန် မဆေၚ်စပ်ကဵုချဳဒရာၚ်ဒစဵုဒစးအဝဵု နနဲဟွံပကီုပရာပ် CDM တံဂှ် ယဝ်ဒးဒုၚ်ကေတ်ဒုဟ်ဒဏ်မ္ဂး ပပ္တံနူတ္ၚဲဂှ်တုဲ အပ္ဍဲပွိုၚ် ၆၀ တ္ၚဲဂှ် ပၠောပ်ပ္တိုန်လိက်အာတ်ဒုၚ်ဂုန်မာန်တုဲ အလဵုအသဳဂှ်တှ်ေ ကလေၚ်ပလေဝ်ကီု၊ ရုပ်သီကီု ဟွံသေၚ်မ္ဂး သ္ပဒတန်ကီု ကၠောန်သ္ပမာန်ရောၚ် သ္ဂးလဝ်ရ။
သ္အာၚ်နူဂှ်ပၠန် သွက်ဂွံထံက်ပၚ်ရီုဗၚ် ညးယိုက်ဝန် CDM ကေုာံ သွက်ဂွံစၟဳတ်ကေတ်အာဒုဟ်ဒဏ် လ္တူ Non CDM တံဂှ် ဒးဒက်ပ္တန်ကဝ်မယှေန်ဂၠိုက်ဂၠါဲစၟဳတ် သ္ဇိုၚ်ဝန်စပ်ကဵုချဳဒရာၚ်ဒစဵုဒစးအဝဵု နနဲဟွံပကီုပရာပ်တံဂှ်ဏောၚ်တုဲ နကဵုကဝ်မယှေန် ဒးရေၚ်တၠုၚ်အာ လၟေၚ်ကမၠောန်မဆေၚ်စပ်ဂမၠိုၚ်ဏောၚ်ဂှ် ပါလုပ်ရ။
ပ္ဍဲကဵုသၞောဝ်သ္ဇိုၚ်ဝန် CDM နူကဵုကမ္မတဳသ္ပစၞးကၠတ်ထဝ်ကၟိန်ဍုၚ် CRPH မလလောၚ်ပ္တိတ်လဝ်ဂှ်မ္ဂး ၇ အခန် ပါလုပ်တုဲ ပ္ဍဲဏံဂှ် အဓိပ္ပာယ်တၚ်ဏှ်၊ တၚ်ရန်တၟံဂမၠိုၚ်၊ ပွမသ္ပစၟတ်သမ္တီ ဂၠိုက်ဂၠါဲဓဝ်ဍာံ ကေုာံ ပရေၚ်ကေတ်ဒုဟ်ဒဏ်တံဒှ်တမ် ပါလုပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI