အံက်သဝှတ်၊ ဂျောန် ၁၅
ညးမကၠတ်ကေတ် သ္ၚိဍာ်ထဝ်ၜါတၠ နူကဵုခဒံထ္ၜးပျးကွတ်ပါန် နန်ဗဴလေန်နာန် ဍုၚ်အေန်ဂလာန် ၚုဟ်မးမၞုံ ၄ ဒဿမ ၈ သတာလေန်ပံၚ်ဂှ် ဖျေံလဝ်ဒဏ်ထံၚ်ရ။
ပ္ဍဲသၞာံ ၂၀၁၉ ဂိတုသေပ်တေမ်ဗာတေံ ပေါဲဗ္စဖျူစၞလဒေါဝ်တ္ၚဲမွဲ မကၠောန်ဗဒှ်လဝ် ပ္ဍဲကဵုနန်ဏံ ကြဴနူတုဲဒှ်အာတုဲ ဂွံမွဲလစုတ်ဂှ် မၞိဟ်တြုံၜါတၠဏံ ကလှ်ကေတ်သ္ၚိဍာ်ထဝ် လျိုၚ်မၞုံ ၁၈ ကာရက်ဂှ်တုဲ ဓရိပ်ဏာလဝ်ရ။
ဂျုၚ် ဂျေန်မဳ ယှုၚ် အာယုက်မၞုံ ၄၀ သၞာံဂှ် သွက်ပြဝကၠတ်ဂၠံက်၊ သွက်ပြဝဒုၚ်ဂိုၚ်ကေတ်ကပေါတ်မကၠတ်နၚ်ဂှ်တုဲ လှဲပြံၚ်ကဵုလဝ်၊ သွက်ပြဝပ္တိတ်လဝ်ကသပ် သွက်ဂွံကၠတ်တံဂှ်တုဲ ဒဒှ်ရဒုဟ်မၞုံဂှ် ပ္ဍဲသၞာံ ၂၀၂၄ တေံ ညးဟီုပ္တိတ်လဝ်ရ။
မိုက်ဂဴ ဂျုၚ် အာယုက်မၞုံ ၃၉ သၞာံဂှ်တှ်ေ ပ္ဍဲဂိတုမာတ်တေံ ဒဒှ်ရဒုဟ်နွံ သွက်ပရေၚ်ကၠတ်ဂၠံက်ဏံဂှ် ဟီုပ္တိတ်လဝ်ရ။
ညးတံၜါတၠ မဒှ်ကောန်ဍုၚ်အံက်သဝှတ်ဂှ်ဝွံ ဒးဒုၚ်ဖျေံလဝ်ဒဏ်ထံၚ် ညးမွဲ ၄ သၞာံ၊ ညးမွဲ ၜါသၞာံကဵုပိဂိတုရ။
အခိၚ်ဖျေံအမိၚ် ပ္ဍဲဂိတုဂျောန် ၁၃ ဂှ် နာဲဗ္စာရုၚ်သၞောဝ်ဓဝ် အံက်သဝှတ် မၞုံယၟုအဳရာန် ပေန်ဂဴဂှ်တှ်ေ ဟီုကၠုၚ်လဝ် ဒဒှ်ရညးတံၜါတၠဏံ ကၠတ်ဏာလဝ် အပ္ဍဲပွိုၚ်မသုန်မိနေတ်ဘာ် ဂံၚ်ၚ်သကာသကာရ။
ယှုၚ်ဝွံ ဒှ်ညးတၠဒုဟ် အဓိကမွဲတုဲ သီုဒှ်ညးမဂယိုၚ်ဒၟံၚ်လမျီု နဒဒှ်ကောန်ဒုဟ်မွဲတုဲ သွက်ပြဝ မကၠတ်ဂၠံက်ကေတ်လဝ်သ္ၚိဍာ်ထဝ်ဏံကီု သွက်ပြဝမသွံတြးလဝ်ကီုဂှ် ဒှ်ညးဒုဟ်ဒဏ်ပြာကတ်ဒၟံၚ်ရ။
ကၠတ်ဂွံတုဲ အပ္ဍဲပွိုၚ်ၜါသတ္တာဟဂှ် ယှုၚ် သွံပတိတ်လဝ်ထဝ် ၂၀ ကဳလောတုဲ လျိုၚ်ဏံဂှ် ဒှ်မသုန်ဂအုံမွဲဂအုံ လျိုၚ်သ္ၚိဍာ်ဂှ်ရ။
မၞိဟ်ဟွံတီယၟုမွဲတၠ နူဗာမေန်ဂါန် ရာန်ကေတ်လဝ်ထဝ်တံဏံ နကဵုသြန် ၅၂၀၀၀၀ ပံၚ်ရ။
ကြဴနူသၞာံ ၂၀၀၅ တုဲဂှ် ယှုၚ်ဝွံ ဒးဒုၚ်ဖျေံလဝ်ထံၚ် ၆ ဝါရ။
ညးဝွံ ဍိုက်က္ဍိုပ်ဂိုန်ရာဇဝတ်ဂမၠိုၚ်တုဲ လီဠာန်ကၠတ်ဂၠံက်ကၠုၚ်ဂှ်မွဲကဆံၚ် ကလိဂွံလဝ်သြန် ၅ မဳလျာန်ပံၚ်တုဲ ညံၚ်ဂွံကလေၚ်ဂွံသြန်တံဏံဂှ် သၞာဲဒဴဂမၠိုၚ် ကၠောန်ကၠုၚ်ဟွံမာန်ရ။
ဂျုၚ် မကၠောန်ကဵုဒၟံၚ်ကလောန် သွက်ယှုၚ်ဂှ်လေဝ် ဒှ်ညးမကေၚ်ကလိလောန်လဝ်ဒုဟ်ဒဏ် အမှုရာဇဝတ်ဂှ် ဂွံတီကေတ်ရ။
ပရေၚ်ကၠတ်ဂၠံက်ဏံ ဒှ်ဂွံတုဲ ၜိုတ်မွဲဂိတုပြၚ် ပ္ဍဲသၞာံ ၂၀၁၉ ဂိတုအံက်တဝ်ဗာဂှ် ဒပ်ဗၠာဲသၟိၚ် ရပ်ဂွံလဝ် ယှုၚ်ကေုာံဂျုၚ်တံဂှ်ကီုလေဝ် ဗွဲကြဴဂှ် ကလေၚ်ဗလးကဵုလဝ်တုဲ လအ်ကၠုၚ်စဵုကဵုပွိုၚ်ပန်သၞာံပြၚ် နကဵုဒုဟ်ဒဏ်လဵုမွဲမှ ညးတံ ဟွံဒးဒုၚ်စောဲစပ်လဝ်ရ။
သွက်ဂွံထ္မံက်ပ္တိတ် ညးမကၠတ်ဏာလဝ်သ္ၚိဍာ်ထဝ်ဏံ နကဵုနဲကွတ်ပညာဂဗုတ်တံဂှ် ဒးကေတ်လဝ်အခိၚ်တၟာလအ်တုဲ ဟိုတ်နူယဲကပ်ဂၠးတိတုဲ ပရေၚ်ဂၠိုက်ဂၠါဲစၟဳတ် မ္ဒးလအ်အာရ။
Ref: BBC