နေဗျဳဒဝ်၊ ဂျောန် ၁၅
ဟိုတ်နူပၠန်ဂတးရပ်လွဟ် သၞောတ်တၠအဝဵုပၞာန်ကီု သီုကဵုဒၟါနူပရေၚ်ပၞာန် ၁၀၂၇ တုဲ ဒပ်ပၞာန်ဗၟာ က္ဍိုပ်မဒးကဝ်အာ ပ္ဍဲကဵုပရေၚ်စိုတ်ဓာတ်၊ ပရေၚ်ရုပ်ရဴကာယဂှ်ဝွံ ကလေၚ်ဒက်ပ္တန်ကၠုၚ်ဒၟံၚ် အကြာဇြဟတ်မဍိုန်လျဒၟံၚ်ဂှ်ရောၚ် ညးခါတ်အကာဲပရေၚ်ပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်သၞောဝ်ယိုက်လျိုၚ်ပၞာန် ကံၚ်ဇြဳပၞာန် မပၠောပ်လဝ်လမျီုဂှ်မ္ဂး အခါပကောံကၠုၚ်သၟတ်ဂမၠိုၚ် နဒဒှ်ကောန်ဒပ် နကဵုနဲကဲနာနာသာ်တုဲဂှ် ဂွံကၠုၚ်ဇြဟတ်ဂၠိုၚ်ကဵုဠက်တုဲ သွက်ဂွံကလေၚ်ထ္ပက်ပၞာန်ဂှ် ဒပ်ပၞာန် ဂိုတ်ဂ္စါန်ကၠုၚ်သ္ဂောံယာက္ဍိုပ်မွဲဝါပၠန်ရ။
ဟိုတ်နူနွံပၟိက်ကဵုဇြဟတ်ဒပ်တုဲ ကောန်ဒပ်စှ်ေနူတန်ဗ္တောန်ကွတ်ပၞာန် မဗပေၚ်လဝ်တံဂှ်ဝွံ ဒးဒုၚ်ပလံၚ်ဒၟံၚ် ပ္ဍဲမုက်ပၞာန် ကေုာံ စးပၞာန် မဒးဆေၚ်ဒၟံၚ်မုက် အလုံဍုၚ်မွဲဂှ်တုဲ ဒးဒုၚ်စကာဒၟံၚ် သီုသွက်ပၞာန်ဒုၚ် သီုသွက်ပၞာန်ထ္ပက်ရ။
ဣဏံဝွံ ဒှ်ကၠေၚ်ဍေံ ခၞာဍေံရတုဲ ရပ်ဒၟံၚ်သၟတ်တအ် ဟွံမွဲကဵုသၞောဝ်တုဲ ပလံၚ်ဗစိုပ်ဒၟံၚ် ပ္ဍဲတန်ဗ္တောန်ကွတ်ပၞာန် ဗွဲအဓမ္မတုဲ ဗလးဏာဒၟံၚ် ညံၚ်ရဴဇွောံစဵုဒၞါပၞာန်ဂှ် ညးချဳဒရာၚ်အခေါၚ်အရာမၞိဟ်ဂမၠိုၚ် ထံက်ထ္ၜးလဝ်ရ။
ဗိုလ်ဇၞော် CDM ကံၚ်တူဝေန်ဂှ်တှ်ေ ဒပ်ပၞာန်ဗၟာဝွံ ဂွံကၠုၚ်ဇြဟတ်မၞိဟ်ဗက် နကဵုကပေါတ်ကညောတ်ၜိုတ်နွံဂှ် ညံၚ်အကာဲအရာဂွံကလေၚ်ဒှ်ကၠုၚ်ဗီုတြေံဂှ်တုဲ စကာကၠုၚ်ဒၟံၚ်သာ်ဏံရောၚ် သ္ၚဳဂၠိပ်လဝ်ရ။
“ ပ္ဍဲစက်ယန်ဍေံတံဂှ်တှ်ေ ဂွံကၠုၚ်ဇြဟတ်မၞိဟ်ဗက် ကပေါတ်ကညောတ် မကမ်လွဟ်လက်နက် နွံမံၚ်ရရဂှ် နွံဏောၚ်။ အရာမဒှ်ဇြဟတ်ဍေံတအ် ပၞာန်ကျာနွံဏောၚ်။ တုဲပၠန် ကပစ မကၠောန်ပ္တိတ် မကမ်လွဟ်လက်နက်ဍေံတံဂှ် နွံဏောၚ်။ တုဲပၠန် သြန်ဘဏ္ဍာညးဍုၚ်ကွာန် မဖ္ဍိုက်ဗပေၚ်ကဵုအရာဍေံတံနွံပၟိက်ဂှ်နွံဏောၚ်။ ကေမ်ၛာပ်လဝ်အရာတအ်ဏံတုဲ ညံၚ်အကာဲအရာဍေံတံ ဂွံကလေၚ်ခိုဟ်ကၠုၚ်ဂှ် ဍေံတံစကာကၠောန်ကၠုၚ်ဒၟံၚ်သာ်ဏံရောၚ် ဂွံဆဵုကေတ်ရ” သာ်ဝွံ ဗိုလ်ဇၞော် CDM ကံၚ်တူဝေန် ဟီုရ။
ကံၚ်ဇြဳပၞာန် ထ္ၜးဟိုတ်ကဵု သွက်ဂွံယိုက်လျိုၚ်ကာစဵုဒၞါ ကေုာံ ပရေၚ်ဂီုကၠီုကၟိန်ဍုၚ်ဂှ်တုဲ ဂွံလဝ်လၟိဟ်ကောန်ဒပ် စှ်ေနူတန်ဗ္တောန်ကွတ်ပၞာန် နူလၟေၚ် ၁ စဵုကဵုလၟေၚ် ၁၁ ဂှ် ၜိုတ် မသုန်ဠက်ဘာ်ရ။
ပ္ဍဲကဵုတန်ဗ္တောန်ကွတ်ပၞာန်ဂမၠိုၚ် မွဲမွဲလၟေၚ်ဂှ် ရန်လဝ်လၟိဟ်ကောန်ဒပ် ၅၀၀၀ တုဲ စဵုကဵုတန်ဗ္တောန်ကွတ်ပၞာန် လၟေၚ် ၁၄ မပံက်အာခြာဟွံလအ်ဏံဂှ်မ္ဂး ကလိဂွံဇြဟတ်ကောန်ဒပ် ၜိုတ်ထပှ်ဠက်ဏောၚ်ဂှ် ကၠိုဟ်ကေတ်ရ။
နကဵုကံၚ်ဇြဳပၞာန် ဒးဆောံလေၚ်လဝ် ၉၀ ဍုၚ်ပြၚ်တုဲ ညံၚ်ဂွံဂွံဒေသဆန္ဒမာဲဂၠိုၚ်ၚ် သွက်ပေါဲရုဲမာဲမကၠောန်ဗဒှ်အာဏံ၊ သွက်ဂွံကလေၚ်ကေတ်တိဍာ်မဒးဗလးလဝ်တဲတံဂှ်တုဲ ရပ်စပ်စကာဇြဟတ်ကောန်ဒပ် ပၞာန်မၚ်ကွာန်တအ် ဗွဲမဂၠိုၚ်ဂၠေၚ်တုဲ ထ္ပက်ဒၟံၚ်ပၞာန်ရ။
အတိုၚ်တမ်ရိုဟ်ပရိုၚ်အပ္ဍဲဒေသတံဂှ်မ္ဂး ဒဒှ်ရထ္ပက်ဒၟံၚ်ပၞာန် ဍုၚ်နံၚ်ချဵု ပ္ဍဲရးသေံသၟဝ်ကျာ လ္တူဂၠံၚ်သွံရာန်ဗၞိက်ပယျဵု မာန္တလေဝ်−မူဇြာဂှ်တုဲ လ္ပာ်ကချေၚ် ဖာကတေံ မပါလုပ် မွဲဒမြိပ်ဍုၚ်မိုဝ်ဗျာကဵု ဍုၚ်ဖေဝ်ခုၚ် ပယျဵုသေံ−ကရေၚ်ဍာဲဂှ်လေဝ် ဗ္တိုက်ဒၟံၚ်ရောၚ် ဂွံတီကေတ်ရ။
သ္အာၚ်နူဂှ်ပၠန် ပ္ဍဲကဵုတွဵုရးကရေၚ် ဗ္ဒါဲဍုၚ်ကြုၚ်ဒဵုကဵုကအ်ကြိက်ဂှ် ပါ်ကရောၚ်ပၞာန်တုဲ သွက်ဂွံထ္ပက်အာပၞာန် နကဵုဇြဟတ်ၜိုတ် ၅၀၀ ဂှ် ပ္တိတ်ဒၟံၚ်ဇြဟတ်တုဲ ပေါဲဗ္တိုက်ဆေၚ်မုက်ၜါလ္ပာ်တအ်လေဝ် ဆက်ဒှ်ဒၟံၚ်ရ။
ဥူဗညာ မဒှ်ဒါရိုက်တာ ဂကောံအခေါၚ်အရာမၞိဟ်ကရေၚ်ဍာဲဂှ် ပ္ဍဲကဵုအကာဲအရာဒပ်ပၞာန် မကြပ်သရိုဟ်စှ်ေဒၟံၚ်ဏံ ဗပေၚ်ဇြဟတ်ကဵုသၞောဝ်ယိုက်လျိုၚ်ပၞာန်ဂှ်တုဲ ဒုၚ်ချိုတ်တုဲဗ္တိုက်ဒၟံၚ်ဂှ်ဝွံ ကလေၚ်ဒက်ပ္တန်ဒပ်ပၞာန်ဟွံဂွံတုဲ အစောံစရာဲသ္ဂောံကၠောန်ဗီုကၠာတေံလေဝ် ဟွံမွဲရပုဟ်ဂှ် သ္ၚဳဂၠိပ်လဝ်ရ။
“ အကာဲအရာဒပ်ပၞာန်လီုတုဲ ကလေၚ်ဒက်ပ္တန်ဒၟံၚ်ရ။ ဒုၚ်ချိုတ်အနိၚ်တုဲ ဗ္တိုက်ဒၟံၚ်ဂှ်ဝွံ ဍာ်ဇမၠိၚ်မ္ဂး ဒက်ပ္တန်ဒပ်ဟွံဂွံပုဟ်လေဝ်။ ဟိုတ်ဂှ်ရ ဒက်ပ္တန်ဒပ်ပၞာန်ရောၚ် ဟီုသာ်ဏံဟွံဂွံ၊ အကြာအခိၚ်ကြပ်လီုမံၚ်ဏံ နကဵုသၞောဝ်ယိုက်လျိုၚ်ပၞာန်ဂှ် မၞိဟ်ဂမၠိုၚ်ဒုၚ်ချိုတ်တုဲ စွံလဝ်ကၟာၚ်မၞိဟ် ၜိုတ်ဗီုပြၚ်ဏံရနွံ။ နတဲဏံဂှ်တှ်ေ ပြယာဲပၞာန်ကီု လွဟ်လက်နက်ကီု ဟွံမွဲဂၠိုၚ်ၚ် ဗီုကၠာတေံရပုဟ်။ အစောဲစရာဲဗီုကၠာတေံဟွံမွဲရပုဟ်ဂှ် ပိုယ်တံ ဟီုဂွံရ” သာ်ဝွံ ဟီုကၠုၚ်လဝ်ရ။
ဒပ်ပၞာန်ဝွံ ဗီုပြၚ်ဒက်ပ္တန်ခိုၚ်ၚ်ကၠိုက်က်ဂှ် နွံကၠုၚ် ခေတ်အဆက်က်တုဲ သြန်၊ နဲကဲ၊ ဇြဟတ်မၞိဟ်၊ ဇြဟတ်အရန် ကေုာံ စမြိုၚ်သ္ဇိုၚ်တံဒှ်တမ် လေံထံက်တံဏံဝွံ ဆက်နွံဒၟံၚ် အလုံအေန်သတဳကျုတ်ယှေန်မွဲရ။
ပ္ဍဲပရေၚ်ကလုတ်တမာန်ဂှ်လေဝ် ဂွံလဝ်ဇြဟတ် ပရေၚ်ထံက်ဂလာန် နူကဵုဍုၚ်ဇြဟတ်ဇၞော် ဍုၚ်ကြုက်ကဵု ဍုၚ်ရုယှာတံဂှ်တုဲ ဍုၚ်အာဇြဳယာန်မပါလုပ် ဍုၚ်အပ္ဍဲဒေသဂမၠိုၚ်လေဝ် ဆက်ဆောံဒၟံၚ် လ္ပာ်ပရေၚ်ပိုန်ဒြပ် နွံဒၟံၚ်ရ။
အတိုၚ်တၚ်နၚ် Justice For Myanmar ဂှ်မ္ဂး ကမ္ပဏဳ နူကဵုဍုၚ်ဗဳယေတ်နာမ်၊ ဍုၚ်သေံ၊ ဍုၚ်သေန်ကာပေါဝ်၊ မလေဝ်ယှာ၊ ဍုၚ်အေန်ဒိုဝ်နဳယှာ ၅၄ ဂှ်ဝွံ ထံက်ပၚ်ရီုဗၚ်ကဵုဒၟံၚ် ကံၚ်ဇြဳပၞာန် နကဵုသြန်အခေါန်ဖလှာ၊ ကၠေၚ်က္ၜၚ်ကျာ ကေုာံ နဲကွတ်ပညာတံဂှ် ဂွံတီကေတ်ရ။
မွဲလ္ပာ်ဂှ်ပၠန်လေဝ် နာဲအဲမန် ပရိုဝ်ဂရာမ်ဒါရိုက်တာ ဌာန်သ္ဇိုၚ်အခေါၚ်အရာမၞိဟ်ဍုၚ်မန်ဂှ်တှ်ေ ညံၚ်ညးဍုၚ်ကွာန်ဂမၠိုၚ် ဂွံဒိုက်ဝါတ်ဂှ် ခၞံဗဒှ်တုဲ ညံၚ်ထံက်ပၚ် ဇြဟတ်ပၠန်ဂတးတအ်ဟွံမာန်ဂှ် ကၠောန်သ္ပဒၟံၚ်ရောၚ် ဟီုရ။
“မွဲလ္ပာ်ဂှ်ပၠန်လေဝ် နူညးဍုၚ်ကွာန်တံ မွဲကဆံၚ် ဗ္တိုက်ဒၟံၚ်သြန်ဘဏ္ဍာတံဂှ်ရ။ လၟုဟ်မ္ဂး ရပ်ဒၟံၚ်ယာန်လာၚ်ဇြေန်ဟွံမွဲတအ် ကွဳလိုန်ဓာတ်တအ်၊ ဗက်ရပ်သီဒၟံၚ် စေအ်အ်ရ။ အဓိပ္ပာယ်ဍေံဂှ်တှ်ေ ညံၚ်ဂွံကျာတ်ဝါတ်အာဇဳဒိုဟ်ဂှ် ဖန်ဗဒှ်တုဲ ညံၚ်ဂွိုအ်ထံက်ပၚ်ဇြဟတ်ပၠန်ဂတးတအ်ဂှ် ကၠောန်ဒၟံၚ်ရ။ ပၞာန်ကျာကီု တုဲပၠန် ပ္ဍဲဗလးတိဏံဂှ်လေဝ် စွံပွန်ကဵုကောန်အရာပ်တုဲ ကလိလောန်ဒၟံၚ်ဒုဟ်ဒဏ်ဂမၠိုၚ် အရိုဟ်တ္ၚဲရ” သာ်ဝွံ သ္ဂးရ။
ပေါဲဗ္တိုက်ပၠန်ဂတးဂမၠိုၚ် နွံဒၟံၚ်ကီုလေဝ် ရန်ကဵုသ္ဂောံလုပ်သၞောဝ် ပ္ဍဲပရေၚ်ဍုၚ်ကွာန်ကီု ညံၚ်ဒပ်ပၞာန်ဗၟာ ကေုာံ တၠအဝဵုပၞာန်ဂမၠိုၚ် အဝဵုဂွံတန်ကြန်ဂှ်တုဲ ကံၚ်ဇြဳပၞာန် ပလေဝ်ပလေတ်ဒၟံၚ် သ္ဂောံကၠောန်ဗဒှ်အာ ပေါဲရုဲမာဲရ။
အတိုၚ်စရၚ်ကဝ်မယှေန်ပေါဲရုဲမာဲလၟုဟ်ဂှ်မ္ဂး သ္ဂောံကၠောန်အာပေါဲရုဲမာဲ ပ္ဍဲကဵုဒေသဆန္ဒမာဲ ၂၆၇ ပွိုၚ်ဍုၚ်ဂှ်နွံဂှ် ဂွံတီကေတ်ရ။ ဣဏံဝွံ ပ္ဍဲဍုၚ်ဗၟာဏံ ပ္ဍဲကဵုပွိုၚ်ဍုၚ် နွံ ၃၃၀ ဂှ် ၜိုတ် ၈၀ တၟံကၠံပြၚ်ဂှ်တှ်ေ ကၠောန်ဗဒှ်အာပေါဲရုဲမာဲဏောၚ်ဂှ် ကၠိုဟ်ကေတ်ရ။
ပေါဲရုဲမာဲ ရန်လဝ်သ္ဂောံကၠောန်အာ မွဲဒကုတ်တုဲမွဲဒကုတ်ဂှ်တှ်ေ ရံၚ်ကဵုအကာဲအရာပရေၚ်ဂီုကၠီုတိဍာ်တုဲ ပ္ဍဲကဵုပွိုၚ်ဍုၚ်ကၠောန်ဂွံတံဂှ် ကၠောန်အာဏောၚ်တုဲ တိဍာ်ကၠောန်ဟွံဂွံတံဂှ်လေဝ် လလောၚ်တြးကဵုဏောၚ်ဂှ် ကဝ်မယှေန် ကဵုလဝ်သမ္တီရ။
နာဲအဲမန်ဂှ်တှ်ေ ယဝ်ကုသိုလ်ခိုဟ်မ္ဂး နူဗော်ပရေၚ်ဍုၚ်ကွာန်တံဂှ်မွဲကဆံၚ် လုပ်အာသၞောဝ်မာန်ကီုလေဝ် ကၟိန်ဍုၚ်ဝွံ ပဋိပက္ခဂမၠိုၚ် သာသ္ကာတ်မြဟ်ကၠုၚ်မာန်ဂှ်ရ သွက်ကံၚ်ဇြဳပၞာန် ဟွံလောဲသွာပုဟ်ဂှ် ဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CINCDS