ဘာအၚ်၊ ဂျောန် ၁၅
သွက်သ္ဂောံဒက်ပ္တန်ဍုၚ်ကရေၚ် ကဝ်တူလေ ဂှ် သၟတ်ညးမလေပ်ပညာဂမၠိုၚ် ဒးပူဗိုၚ်ပါလုပ်ကဵုဏောၚ်တုဲ အနာဂတ်ဂတတေံ ကံကုသိုလ်ဇကု ဇကုဖန်ဖက်ကေတ်တုဲ ဒးအုပ်ဓုပ်မာန်ဏောၚ်ဂှ် ဥက္ကဌဗော်သွးကောန်ဂကူကရေၚ် KNU ပဒိုဝ်သဝ်ဂွါထူဝေန် ဟီုရ။
ပ္ဍဲတ္ၚဲကဝ်တူလေ ပေၚ် ၇၆ သၞာံ တ္ၚဲဂိတုဂျောန် ၁၄ ဂှ် ပဒိုဝ်သဝ်ဂွါထူဝေန် ဥက္ကဌ ဗော်သွးကောန်ဂကူကရေၚ် KNU ဟီုလဝ်ဂလာန် သာ်ဏံရ။
နကဵု KNU သွက်အပြံၚ်အလှာဲဍုၚ်ဗၟာဂှ် ပံၚ်တောဲကဵု ဂကောံပၠန်ဂတးကောန်ဂကူဂမၠိုၚ်၊ ဂကောံဒစဵုဒစးသၞောတ်တၠအဝဵုပၞာန်တံဂှ်တုဲ ဂ္စါန်ဒၟံၚ်သ္ဂောံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳတုဲ ပ္ဍဲတိဍာ် KNU ထိၚ်ဒက်လဝ်ဂှ်လေဝ် လးဖျေံအာ ပရေၚ်ကောပ်ကာဲညးဍုၚ်ကွာန် ကေုာံ ပရေၚ်အုပ်ဓုပ်တံဏောၚ်ဂှ် ပဒိုဝ်သဝ်ဂွါထူဝေန် သ္ဂးရ။
တ္ၚဲဏံဂှ် ဒှ်အခိၚ်ပၠန်ဂတးတုဲ သွက်သ္ဂောံဗ္တိုက်သရိုဟ် ကုညးမကေမ်ၛာပ်လဝ် ဝါဒမဟာဂကူ ကေုာံ သၞောတ်တၠအဝဵုပၞာန် မခၞံဗဒှ်ဒၟံၚ်ပဋိပက္ခအပ္ဍဲဍုၚ်တံဂှ် ဒှ်တာလျိုၚ်ဂကူကရေၚ်ရောၚ် ဥက္ကဌ KNU ဟီုရ။
ဒက်ပ္တန်ဍုၚ်ကရေၚ် ကဝ်တူလေ မွဲကရောံမွဲစွံတုဲ မွဲအခိၚ်ဓဝ် ပွမဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ မဒုၚ်ကဵုလျိုၚ် ဂကူတၞဟ်သ္အာၚ်ဂမၠိုၚ် ကေုာံ ညးဍုၚ်ကွာန်သီုဖအိုတ် ဂွံမံၚ်စံၚ် ဗွဲမၜိုဟ်လလမ်မာန်ဂှ်လေဝ် ပ္တိတ်အာဇြဟတ်မွဲစွံဏောၚ်ဂှ် သ္ဂးရ။
သ္အာၚ်နူဂှ်ပၠန် ပွမရပ်စပ်စကာ အခေါၚ်ဖန်ဖက်ကေတ်ကံကုသိုလ်ဇကုဂှ်ဝွံ ဒှ်ပွမစၞောန်ထ္ၜးကဵု ပရေၚ်သ္ဂောံခၞံဗဒှ်ကေတ်ကံကုသိုလ်ပရေၚ်ဍုၚ်ကွာန်ဇကု မဒှ်ဂၠံၚ်တရဴပရေၚ်ဍုၚ်ကွာန် မဒးကေမ်ၛာပ်အာ ပ္ဍဲကာလပၠန်ဂတးဏံဂှ်ကီု၊ သီုစၞောန်ထ္ၜးကဵု ပရေၚ်ကောပ်ကာဲညးဍုၚ်ကွာန် ကေုာံ ပရေၚ်အုပ်ဓုပ် သွက်ဂကူကရေၚ်သၟးဟွံက သီုကောန်ဂကူသီုဖအိုတ် ဂွံဇၞော်မောဝ်တောတက်ဏောၚ်ဂှ် ပဒိုဝ်သဝ်ဂွါထူဝေန် သ္ဂးရ။
အကာဲအရာပရေၚ်ဍုၚ်ကွာန်၊ ပရေၚ်အုပ်ဓုပ် ကေုာံ ပရေၚ်ကောပ်ကာဲညးဍုၚ်ကွာန် မပြံၚ်လှာဲကၠုၚ်ဒၟံၚ် ဗွဲမဗဗွဲကဵုခေတ်ကာလဍေံဂှ် ညံၚ်ဂွံကၠိုဟ်ခၠၚ်ဆိုက်ဗ္ဒက်စိုန်သကီုလဝ်ဂှ် ကတ်လ္ၚတ်တုဲ အနာဂတ်ဂတတေံ ကံကုသိုလ်ဇကု ဇကုဖန်ဖက်ကေတ်တုဲ ဂွံအုပ်ဓုပ်အာမာန်ဂှ် ဒးလွဳၜံၚ်ပ္တိတ်တၞောဝ်ဒတောဝ်တၟိဏောၚ်ဂှ် သ္ဂးလဝ်ရ။
ပၠန်ဂတးဂကူကရေၚ်ဂှ်ဝွံ ဒှ်သွက်သ္ဂောံဒက်ပ္တန်ဍုၚ်ကဝ်တူလေ မဒှ်သွပ်လ္ပအ် ကေုာံ တၚ်ရန်တၟံဂကူကရေၚ်တံဂှ်တုဲ ပ္ဍဲဂၠံသြိုဟ်ဂကူကရေၚ်တအ် ဍုၚ်ကဝ်တူလေဝွံ ခက်ဗာန်အာမံၚ်လၟိုန်ဂှ် တးပါဲဟွံဂွံရောၚ် ဥက္ကဌဗော်သွးကောန်ဂကူကရေၚ် KNU ပဒိုဝ်သဝ်ဂွါထူဝေန် ဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNU